«ជួប សម្លាប់ មិនមែនជាឃាតករសម្លាប់ កែម ឡី»
- ដោយ: ដារា រិទ្ធ ([email protected]) - ភ្នំពេញ ថ្ងៃទី២១ ធ្នូ ២០១៦
- កែប្រែចុងក្រោយ: December 21, 2016
- ប្រធានបទ: ឧក្រិដ្ឋកម្ម
- អត្ថបទ: មានបញ្ហា?
- មតិ-យោបល់
-
«ជួប សម្លាប់ មិនមែនជាជនដៃដល់ បាញ់លោកបណ្ឌិត កែម ឡីទេ!» នេះជាអ្វី ដែលលោក ហួត វុទ្ធី ដាក់រហស្សនាម ជុន ច័ន្ទបុត្រ នាយករងការផ្សាយ ជាភាសាខ្មែរ នៃវិទ្យុអាស៊ីសេរី បានសរសេរនៅមុននេះបន្តិច ដោយលោក បានដកស្រង់ការថ្លែងឲ្យដឹង នៅល្ងាចថ្ងៃទី២១ ខែធ្នូនេះ ពីសំណាក់លោក ខៀវ សុភ័គ អ្នកនាំពាក្យក្រសួងមហាផ្ទៃមកបញ្ជាក់។
លោក ជុន ច័ន្ទបុត្រ បានសរសេរ នៅលើទំព័រហ្វេសប៊ុក របស់លោកថា៖ «អ្នកដែលសង្ស័យថា ជួប សម្លាប់ មិនមែនជាជនដៃដល់ បាញ់លោកបណ្ឌិត កែម ឡី ពេលនេះ លែងមានការសង្ស័យទៀតហើយ ត្បិតលោក ខៀវ សុភ័គ អ្នកនាំពាក្យក្រសួងមហាផ្ទៃ ក៏មិនជឿថា ជួប សម្លាប់ ជាឃាតកពិតដែរ។ លោកក៏មានប្រសាសន៍ដែរថា ការបាញ់សម្លាប់លោក កែម ឡី ក៏មិនមែនដោយសារ រឿងជំពាក់លុយ៣ពាន់ដុល្លារ នោះឡើយ។»។
បើដូច្នេះ ថាតើនរណាផ្សេងជាឃាតករ?
ប្រសិនជាលោក ខៀវ សុភ័គ បានថ្លែងខាងលើនេះ គឺជារឿងពិត និងមិនគ្រាន់តែ ជាការជឿជាក់របស់លោកនោះ សំនុំរឿងឧក្រិដ្ឋកម្មមួយនេះ នៅមានបន្តភាគទៅវែងឆ្ងាយ ដោយសារដំណើររឿង ដែលបានដើរមកដល់ថ្ងៃនេះ វាហាក់ដូចជា«ជួន»ចំគ្នា ជាច្រើនចំណុច។ បើគ្រាន់តែស្រាវជ្រាវ រកឲ្យឃើញថា តើ ជួប សម្លាប់ (ឈ្មោះពិត អឿត អាង) ម្នាក់នេះ ជាឃាតករពិតឬអត់ តើអាជ្ញាធរមានសមត្ថកិច្ច និងតុលាការខ្មែរ ចាំបាច់ប្រើប្រាស់រយៈពេល រហូតដល់ទៅជាង៥ខែ(?)។
ជាពិសេស បើគេគ្រាន់តែទស្សនារូបភាព ដែលថតដោយកាម៉េរ៉ាសុវត្ថិភាព របស់ហាងលក់ទំនិញនោះ ការពិតនឹងកាន់តែងាយយល់ ជាងរឿងរ៉ាវ ដែលបានអូសបន្លាយ រហូតមកដល់ថ្ងៃនេះ។
ជាការរំលឹកឡើងវិញ លោក កែម ឡី ត្រូវបានខ្មាន់កាំភ្លើងបាញ់សម្លាប់ នៅនឹងកន្លែង ដោយគ្រាប់កាំភ្លើងចំនួនពីរគ្រាប់ មួយគ្រាប់ចំសៀតផ្កា និងមួយគ្រាប់ទៀត ចំទ្រូង នៅម៉ោងប្រមាណជា ៩ព្រឹក ថ្ងៃទី១០ ខែកក្កដា ឆ្នាំ២០១៦ នៅក្នុងហាង «Star Mart» នៃស្ថានីយចាក់ប្រេងឥន្ទនៈ សាខាស្ដុបបូកគោ។
ជួប សម្លាប់ ឆ្លើយទទួលខ្លួន ក្នុងពេលកន្លងមក មានបំណងអ្វី?
អស់រយៈពេលជាង៥ខែកន្លងទៅហើយ តែរឿងរ៉ាវស៊ើបអង្កេត ចេញពីសំនុំរឿងដ៏ធំនេះ ត្រូវបានគេដឹងតិចតួចជាទីបំផុត។ លោក ជួប សម្លាប់ ដែលជាជនសង្ស័យតែម្នាក់នោះ ត្រូវបានចាប់ខ្លួន នៅប្រមាណជា១ម៉ោងក្រោយឃាតកម្ម ហើយភ្លាមៗនោះ លោកបានសារភាព ថាលោកជា«ឃាតករ» ក្រោមមូលហតុថាលោក ចង់ជម្រះបញ្ជីលើលោក កែម ឡី ព្រោះការជំពាក់ប្រាក់មិនសង ចំនួន៣០០០ដុល្លារ។
ប៉ុន្តែការលើកឡើងរបស់ ជួប សម្លាប់ ត្រូវបានក្រុមគ្រួសារលោក កែម ឡី ជាពិសេសភរិយាលោក គឺអ្នកស្រី ប៊ូ រចនា បដិសេធដាច់អហង្កា និងបានបរិហារពីឃាតកម្ម បែបនយោបាយមួយ។ អ្នកជំនាញច្រើននាក់ ក៏បានគិតភ្លាមៗ នៅក្រោយឃាតកម្មដែរថា ឃាតករគឺជាអ្នកកាន់កាំភ្លើង ដ៏ជំនាញម្នាក់ ដែលដឹងយ៉ាងច្បាស់ ពីចំណុចសំខាន់ «បាញ់ចំគឺស្លាប់ភ្លាម» ហើយឃាតករនោះ មិនអាចជាជនសង្ស័យ «ជួប សម្លាប់» នេះឡើយ។
សូមរំលឹកដែរថា ឃាតកម្មបាញ់សម្លាប់លោក កែម ឡី បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីអ្នកស្រាវជ្រាវផ្នែកសង្គម និងជាអ្នកធ្វើអត្ថាធិប្បាយនយោបាយខ្មែរ ដ៏ល្បីឈ្មោះរូបនេះ បានធ្វើការពន្យល់ពីរបាយការណ៍មួយ របស់អង្គការឃ្លាំមើលពិភពលោក (ហៅជាភាសាអង់គ្លេស Global Witness) ដែលនិយាយពីការរកស៊ីមានបាន ក្នុងទឹកប្រាក់ច្រើនរយលានដុល្លារ របស់ក្រុមគ្រួសារផៅសន្ដាន របស់លោកនាយករដ្ឋមន្ត្រី ហ៊ុន សែន នៅក្នុងវិស័យធំៗសំខាន់ៗ ដែលល្បីល្បាញថាជាវិស័យ ដែលសម្បូរដោយអំពើពុករលួយ៕
-----------
កែតម្រូវ៖
លោក ជុន ច័ន្ទបុត្រ បានត្រឡប់មកបញ្ជាក់ នៅពេលបន្ទាប់មកថា លោក ខៀវ សុភ័គ មិនបានបង្ហាញការមិនជឿជាក់ ថា ជួប សម្លាប់ ជាឃាតករពិត ដែលបានបាញ់សម្លាប់លោក កែម ឡី នោះទេ តែលោក ខៀវ សុភ័គ បាននិយាយថា លោកមិនជឿថា ឈ្មោះ ជួប សម្លាប់ គឺជាឈ្មោះពិត របស់ជនសង្ស័យ។ លោក ជុន ច័ន្ទបុត្រ បានបញ្ជាក់យ៉ាងដូច្នេះ បន្ទាប់ពីលោក និងសហការី បានស្ដាប់កិច្ចសម្ភាស ជាមួយលោក ខៀវ សុភ័គ សារជាថ្មីឡើងវិញ៕