ធី សុវណ្ណថា ព្រមាន សីសុវត្ថិ ធម្មិកោ «កុំ​មាន​គំនិត​ខូច»

«សូមព្រះអង្គពិនិត្យឲ្យច្បាស់ (នូវ)រាជសារព្រះមហាក្សត្រ និងសំណេររបស់នាងខ្ញុំ។ សូមព្រះអង្គកុំ​មាន​គំនិត​ខូច កុំ​បំភ្លៃ​ការ​ពិត នាំឲ្យថោកទាប ដល់កិត្តិយសរបស់ព្រះអង្គ ក្នុងនាមជាខ្សែរាជវង្ស ដ៏ខ្ពង់ខ្ពស់។» នេះ ជា​ពាក្យ​ប៉ុន្មាន​ឃ្លា របស់​អតីត​អ្នកគាំទ្រ គណបក្សសង្គ្រោះជាតិ ដ៏ល្បីឈ្មោះ ធី សុវណ្ណថា ព្រមានយ៉ាងជូរចត់ ទៅ​កាន់​ព្រះអង្គ​​ម្ចាស់ ស៊ីសុវត្ថិ ធម្មិកោ ជុំវិញ​​សំនុំ​រឿង​ប្ដឹងផ្ដល់ ប្រឆាំង​លោក កឹម សុខា។
ធី សុវណ្ណថា ព្រមាន សីសុវត្ថិ ធម្មិកោ «កុំ​មាន​គំនិត​ខូច»
កញ្ញា ធី សុវណ្ណថា (ខាងឆ្វេង) និងព្រះអង្គម្ចាស់ ស៊ីសុវត្ថិ ធម្មិកោ។ (រូបថតលើហ្វេសប៊ុក)
Loading...
  • ដោយ: ដារី ([email protected]) - ភ្នំពេញ ថ្ងៃទី១០ ធ្នូ ២០១៦
  • កែប្រែចុងក្រោយ: December 10, 2016
  • ប្រធានបទ: នយោបាយខ្មែរ
  • អត្ថបទ: មានបញ្ហា?
  • មតិ-យោបល់

ដើម្បីយល់រឿងវ៉ាវ ដែលជាការសប្បាយ សម្រាប់បណ្ដា​ជនមួយចំនួន តែបែរជាបង្កការក្ដៅក្រហាយ ដល់​បណ្ដា​ជនផ្សេងទៀតនោះ គេត្រូវវិលត្រឡប់​ទៅ ប៉ុន្មានថ្ងៃមុននេះវិញ ជាពិសេសនៅក្រោយព្រឹត្តិការណ៍ នៃ​ការ​ប្រោស​ព្រះ​រាជ​ទាន​​លើកលែងទោស ពីសំណាក់ព្រះមហាក្សត្រកម្ពុជា ចំពោះលោក កឹម សុខា អនុប្រធាន (សព្វថ្ងៃ​ជា​ប្រធាន​ស្ដីទី) គណបក្សសង្គ្រោះជាតិ ទាក់ទងនឹងបទ«បដិសេធការចូលខ្លួន» ទៅកាន់តុលាការ។

ប៉ុន្តែការលើកលែងទោស ពីសំណាក់ព្រះមហាក្សត្រ ចំពោះអនុប្រធាន​​គណបក្ស​សង្គ្រោះ​ជាតិ ចុះព្រះ​ហត្ថលេខា​​នៅថ្ងៃទី២ ខែធ្នូ ឆ្នាំ២០១៦ នោះ ទំនង​ជាមិន​បាន​​ធ្វើឲ្យ​មនុស្ស​មួយ​ចំនួន រីកចិត្តរីកថ្លើមនោះឡើយ រាប់​ទាំង​ម្ចាស់​បណ្ដឹង កញ្ញា ធី សុវណ្ណថា ដែលប្ដឹងលោក កឹម សុខា ពីបទ​បរិហាកេរ្ដិ៍​រហូតបង្ក​ឲ្យ​មាន​​ការ​កោះ​​ហៅ​លោក កឹម សុខា ឲ្យ​ចូលខ្លួនទៅបំភ្លឺនោះផង។ អតីតតារាហ្វេសប៊ុក ដែលក្លាយខ្លួន មកជាប្រធាន​អង្គការ​រូប​នេះ បាន​ទាមទារ​ឲ្យ​លោក កឹម សុខា «សុំទោស»​នាង​ជា​សាធារណៈ ដើម្បី​«បញ្ចប់រឿង»។

នៅក្នុងសារមួយ ដែលកញ្ញា ធី សុវណ្ណថា បាន​សរសេរ​នៅលើ​ទំព័រ​ហ្វេសប៊ុក​របស់​ខ្លួន ក្នុងថ្ងៃទី៥ ខែធ្នូ (ប៉ុន្មាន​ថ្ងៃ​ក្រោយ​ការ​លើក​លែង​ទោស) អតីត​សកម្មជន​​គណបក្ស​ប្រឆាំង​រូប​នេះ បានអះអាងថា៖ «បណ្តឹងនាងខ្ញុំ បាន​ធ្វើ​ឲ្យ​លោក (កឹម សុខា) ជាប់ឃុំ ៦ខែ ក្នុងស្នាក់ការបក្ស។ នាងខ្ញុំរីករាយ ដែល​បាន​ឃើញ​លោក​ទទួល​ស្គាល់​កំហុស (ហើយ)​​លោក​បាន​ស្នើសុំ និងទទួលព្រះរាជទាន (លើកលែង)​ទោស ពីព្រះមហាក្សត្រ។ នាងខ្ញុំ ក្នុង​នាម​ជា​​​ជន​​​រង​គ្រោះ ពី​អំពើ​​​បរិហា​​​កេរ្តិ៍​របស់​លោក ស្នើឲ្យលោក សុំទោសនាងខ្ញុំជាសាធារណ: ដើម្បី​បញ្ចប់​រឿង។»។

«បើលោក មិនសុំទោសនាងខ្ញុំទេ...»

កញ្ញា ធី សុវណ្ណថា បានបន្តការព្រមាន ទៅលោក កឹម សុខា ទៀតថា៖ «បើលោក មិនសុំទោសនាងខ្ញុំទេ នាង​ខ្ញុំ​នឹង​បន្ត​​ដាក់​​ពាក្យប្តឹង ដើម្បីឲ្យ​តុលាការ​បន្តនិតិវិធី (ក្នុង)សំនុំរឿង​ផ្សេង​ទៀត​​របស់លោក ដូចជា បរិហាកេរ្តិ៍ ជួញ​ដូរ​ផ្លូវភេទ សូកសាក្សី ជាដើម»។

ពីក្នុងចំណោម​ការបញ្ចេញ​មតិយោបល់ (Comment) ប្រមាណជាង៤០០០ដង នៅពីខាងក្រោម​សារបង្ហោះ​ខាង​លើ មាន​មនុស្ស​តិច​ណាស់ ដែល​បាន​គាំទ្រ​​ការលើកឡើង ​របស់អតីតតារាហ្វេសប៊ុក ដែលទទួល​ភាព​ល្បី​ល្បាញ​ខ្លាំង នៅក្នុងអំឡុងពេល នៃការឃោសនាបោះឆ្នោត ឆ្នាំ២០១៣។ ប៉ុន្តែ​ផ្ទុយ​ទៅ​វិញ បណ្ដា​អ្នក​​គាំទ្រ​​គណបក្ស​​​សង្គ្រោះ​ជាតិ និងអ្នកមាន​​និន្នាកា​រ​កណ្ដាល​​មួយចំនួន យល់ថា ទង្វើរបស់កញ្ញា ធី សុវណ្ណថា បាន​ដើរ​ទៅ​ឆ្ងាយ​ជ្រុល ហើយ​មានលក្ខណៈ​​ជាការជម្រះបញ្ជី ដើម្បី​យក​ចាញ់ឈ្នះ​ផ្ទាល់ខ្លួន។

ទោសប្រមាថព្រះរាជា...?

នៅក្នុងសារប្រតិកម្មមួយ របស់ព្រះអង្គម្ចាស់ ស៊ីសុវត្ថិ ធម្មិកោ ដែល​បង្ហោះ​​នៅលើ​ទំព័រ​​ហ្វេសប៊ុក​​របស់​​ព្រះអង្គ កាល​ពីថ្ងៃទី៨ ខែធ្នូ (ប៉ុន្មានថ្ងៃក្រោយ ការ​បង្ហោះ​​សារទាមទារ របស់កញ្ញា ធី សុវណ្ណថា) ថែមទាំង​បាន​ចាត់​ទុក​ការទាមទារនោះ ថាជាការប្រមាថ លើអង្គព្រះមហាក្សត្រ និងចង់ឃើញ​មាន​ចំណាត់​ការ​តាមផ្លូវច្បាប់ ពី​សំណាក់​​ស្ថាប័ន​ពាក់ព័ន្ធ ទៅលើអ្នក«ប្រមាថ»​វ័យក្មេង​ខាងលើ។ អមនឹងព្រះរាជសារ​​លើកលែង​​ទោស​នោះ​ផង ព្រះអង្គ ធម្មិកោ បាន​​សរសេរ​​ថា៖ «រឿងនេះ ខ្ញុំចាត់ទុកជាការប្រមាថ យ៉ាងធ្ងន់បំផុត លើអង្គ​ព្រះ​មហា​ក្សត្រ ដែល​​បាន​​​ប្រោស​​​ព្រះរាជទាន ព្រះរាជក្រិត្យ​​​លើកលែង​​ទោស​ជូន លោក កឹម សុខា។ ប៉ុន្តែ (មក)​ដល់​ម៉ោង​​នេះ ខ្ញុំ​មិន​​ទាន់​​ឃើញ ស្ថាប័ន​ពាក់ព័ន្ធ​ណាមួយ ប្រតិកម្ម ឬចាត់វិធានការ តាមផ្លូវច្បាប់ (នៅឡើយ)។»

បញ្ហាបន្ទាប់មកទៀត នៅត្រង់ថា សារប្រតិកម្មរបស់ព្រះអង្គម្ចាស់ ធម្មិកោ ទំនងជា​បាន​ចាក់​​ប្រធាន​​អង្គការ​វ័យ​ក្មេង ឲ្យ​ឆេះ​​ច្រឡោត​ឡើង។ នៅព្រឹក​ថ្ងៃទី១០ ខែធ្នូនេះ កញ្ញា ធី សុវណ្ណថា បានបង្ហោះសារ​​តប​ត្រឡប់​ទៅ​វិញ ដោយ «សូមព្រះអង្គពិនិត្យឲ្យច្បាស់ (នូវ)រាជសារព្រះមហាក្សត្រ និងសំណេរ​របស់​នាង»។ កញ្ញា សុវណ្ណថា បាន​សរសេរ​​ពន្យល់​ថា៖ «ព្រះមហាក្សត្រព្រះរាជទាន (លើកលែង)ទោស ឲ្យលោក កឹម សុខា ត្រឹមតែ​បទ​ល្មើស "បដិសេធ​ការ​ចូល​ខ្លួន" ហើយនាងខ្ញុំ គ្រោងប្តឹងបន្ត គឺបទល្មើស បរិហាកេរ្តិ៍ ជួញដូរផ្លូវភេទ សូកសាក្សី (...)»។

អតីតសកម្មជន​គាំទ្រគណបក្សប្រឆាំង បានបន្តរៀបរាប់ នៅក្នុង​ការឆ្លើយតប​នោះ​ទៀតថា៖ «សូមព្រះអង្គ​ពិនិត្យ​​ឲ្យច្បាស់ (នូវ)រាជសារព្រះមហាក្សត្រ និងសំណេររបស់នាងខ្ញុំ។ សូមព្រះអង្គកុំមានគំនិតខូច កុំបំភ្លៃ​ការ​ពិត នាំ​ឲ្យ​ថោកទាប ដល់កិត្តិយសរបស់ព្រះអង្គ ក្នុងនាមជាខ្សែរាជវង្ស ដ៏ខ្ពង់ខ្ពស់។ (...) កាលដែល​នាង​ខ្ញុំ ស្នើ​ឲ្យ​លោក កឹម សុខា សុំទោសនាងខ្ញុំ ដើម្បីបញ្ចប់រឿង នេះគឺជាការផ្តល់ឱកាស ជាគុណធម៌ និងជា​សុជីវធម៌​ដ៏​ល្អ របស់​​​ពលរដ្ឋ​​ខ្មែរ​​ទូទៅ ដែលជនរងគ្រោះ សុំត្រឹមឲ្យជនល្មើស​​ទទួល​​ស្គាល់​កំហុស និងសុំទោស។»។

បញ្ហា​សម្ល​កំពិស ដែលទំនងមើលទៅ ពិបាកនឹងរកទីបញ្ចប់ ជាពិសេស​ ពេលដែលគេពិបាក​​បែងចែក​ឲ្យច្បាស់ ថា​តើ​នរណា​មួយ ជាជនរងគ្រោះ និង​ជនល្មើសពិតប្រាកដ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...