អ្នកស្រី ហ៊ីឡារី គ្លីនតុន (Hillary Clinton) បានយកឱកាស នៃការបង្ហាញវត្តមានរបស់អ្នកស្រី នៅក្នុង​កម្មវិធី​ឧទ្ទិស ដល់ការចាកចេញពីតំណែង របស់​សមាជិកព្រឹទ្ធសភា លោក «Harry Reid» ដើម្បីលើកឡើង​ពី​រឿង​រ៉ាវ​មួយ​ចំនួន ដែលអ្នកស្រីអះអាងថា ជាការបំប៉ោង និងបំភ្លៃទាំងស្រុង។ ហើយនេះ គឺការ​បង្ហាញខ្លួន ជា​សាធារណៈ​លើក​ទីពីរ បន្ទាប់ពីអ្នកស្រី បានប្រកាសទទួលស្គាល់បរាជ័យ នៅចំពោះជ័យជំនះរបស់លោក ដូណាល់ ត្រាំ កាល​ពី​ថ្ងៃទី៩ ខែវិច្ឆិកា។

អ្នកស្រីបានថ្លែង បែបកំប្លែងថា៖ «នេះ វាមិនមែនជាសុន្ទរកថា ចេញពីវិមានកាពីតូល (Capitole - ចង់​មាន​ន័យ​ថា ជាសុន្ទរកថា ដែលប្រធានាធិបតី ជាប់​ឆ្នោតថ្មី ត្រូវធ្វើទៅកាន់ប្រជាជាតិ ដំបូងគេបង្អស់ នៅថ្ងៃ​ស្បថ​ចូល​កាន់​តំណែង) ដែលខ្ញុំបានសង្ឃឹមថា នឹងធ្វើវា នៅក្រោយពេលបោះឆ្នោត នោះទេ។ ប៉ុន្តែបន្ទាប់ពីបានធ្វើ "Selfies" នៅក្នុងឧទ្យានសាធារណៈ​ក្បែរផ្ទះ (នាក្រុងញ៉ូយក) អស់ប៉ុន្មានសប្ដាហ៍នោះមក ខ្ញុំគិតថា វាជា​រឿង​មួយ​ប្រសើរ​ណាស់ ក្នុង​ការ​ចេញ មក​បង្ហាញ​ខ្លួនឡើងវិញ។»

បំប៉ោងព័ត៌មាន គម្រាមដល់ជីវិតមនុស្ស...

អ្នកស្រី មិនបានរំលឹកមកនិយាយ ពីបរាជ័យរបស់អ្នកស្រី នៅក្នុងការបោះឆ្នោតនោះទេ តែអ្នកស្រីបាន​លើក​ឡើង មកបកស្រាយយ៉ាងច្រើន នូវអ្វី​ដែលអ្នកស្រីហៅថា ជា«ជំងឺឆ្លង»​យ៉ាង​រីក​រាល​ដាល​ នៃ​ការ​បំភ្លៃ និង​ការ​ឃោសនាព័ត៌មាន នៅតាមបណ្ដាញសង្គម តាំងពី១ឆ្នាំមកហើយ។ អ្នកស្រី​បាន​ថ្លែង​ឡើងថា៖ «វាពិត​ណាស់​ហើយ ដែល​ការ​បំប៉ោង​ព័ត៌មាន បានបង្កផល់ប៉ះពាល់ និងការគម្រាម ដល់ជីវិតមនុស្សជាច្រើន ខណៈ​អ្នក​ទាំង​នោះ គ្រាន់​តែ​ជា​​មនុស្ស​​សមញ្ញ ធម្មតា ហើយធ្វើតែការងារ​ របស់ពួកគេប៉ុណ្ណោះ»។

ការលើកឡើងនេះ អតីតបេក្ខនារីប្រធានាធិបតី ចង់សំដៅទៅ​ហេតុការណ៍​បាញ់ប្រហារមួយ ពីសំណាក់​យុវជន «Edgar Maddison Welch» អាយុ២៨ឆ្នាំ នៅក្នុងភោជនីយដ្ឋានមួយឈ្មោះ «Comet Ping Pong» ក្នុង​រដ្ឋធានី​វ៉ាស៊ីនតោន កាលពីថ្ងៃអាទិត្យកន្លងទៅ។ យុវជនរូបនោះ បានជឿជាក់​តាម​ព័ត៌មាន​មួយ ដែលគ្មាន​មូលដ្ឋាន​គ្រឹះ ទាក់​ទង​ភោជនីយដ្ឋាន «Pizza» ខាងលើ និងដែលបានអះអាងថា អ្នកបម្រើការនៅ​ក្នុង​ភោជនីយដ្ឋាន បាន​បង្កើត​ឲ្យ​មាន ជា​បណ្ដាញ​អ្នកស្រឡាញ់អនីតិជនមួយ នៅទីនោះ។

តែរឿងដែលគេបានដឹងច្បាស់ ពីហេតុការណ៍នោះ គឺនៅត្រង់ថា ព័ត៌មាន«Pizzagate»នោះ ត្រូវបាន​បង្កើត​ឡើង និងបន្តចែកចាយ​នៅលើបណ្ដាញសង្គម ដោយក្រុមអ្នកគាំទ្រលោក ដូណាល់ ត្រាំ ខណៈម្ចាស់​ភោជនីយ​ដ្ឋាន​នោះ គ្រាន់តែមានទំនាក់ទំនង ជាមួយអ្នកជិតដិតរបស់អ្នកស្រី គ្លីនតុន ប៉ុណ្ណោះ។ សំណាង​​ល្អ ការបាញ់​ប្រហារនោះ មិនបានធ្វើ​ឲ្យនរណាម្នាក់ រងរបួស​នោះទេ។

ប្រយុទ្ធ ទល់នឹងការ«ឃោសនា»ពីបរទេស...

«យើងត្រូវប្រឈមមុខ ដោះស្រាយទល់នឹងគ្រោះថ្នាក់នេះ ជាបន្ទាន់» អ្នកស្រី គ្លីនតុន បានបន្តថ្លែងដូច្នេះ មុន​នឹងសង្កត់ធ្ងន់ ពីការគាំទ្ររបស់អ្នកស្រី ទៅលើ​គម្រោងច្បាប់មួយ ដើម្បីប្រយុទ្ធ ទល់នឹងការ«ឃោសនា» ពី​បរទេស ដោយ​អ្នកស្រី​បានអំពាវនាវ ទៅបណ្ដាសហគ្រាសយក្សនានា នៅក្នុងសង្កាត់ «Silicon Valley» នៃ​រដ្ឋ​កាលីហ្វ័នី ឲ្យ​ចូលរួម​សហការ ក្នុងគម្រោងច្បាប់នេះ។

នៅចំពោះសំនួរ ដែលចង់ដឹងថា តើព័ត៌មានបំប៉ោងទាំងនោះ បានធ្វើឲ្យអតីតបេក្ខនារីរូបនេះ ទទួលបរាជ័យ នៅក្នុង​ការ​បោះឆ្នោត​ប្រធានាធិបតី​អាមេរិកឬ? អ្នកស្រី គ្លីនតុន មិនបានឆ្លើយតបទេ ដោយគ្រាន់​តែ​និយាយ​ថា​ជា​ច្រើន​ដង នូវពាក្យ«អរគុណៗ» តបទៅអ្នកសារព័ត៌មានវិញ មុននឹងអ្នកស្រីបាន​ដើរ​ចាក​ចេញ ពីកម្មវិធី​ខាង​លើ៕