ការសម្រេចចិត្ត តម្លើងគម្រោងថវិកាយោធា ដល់កំពូលដូច្នេះ របស់ប្រទេសជប៉ុន ត្រូវបានប្រព័ន្ធ​ផ្សព្វ​ផ្សាយ​ក្នុង​ស្រុក អះអាងថាមានជាប់ទាក់ទង ទៅអស្ថិរភាពក្នុងតំបន់ ដែលបណ្ដាល​មកពីការគម្រាម ជាញឹកញាប់ ពី​សំណាក់​ប្រទេស​កុម្មុយនីស កូរ៉េខាងជើង និងជាពិសេស ពីសំណាក់ប្រទេសចិន ដែលជាមហាយក្ស​កុម្មុយនីស​មួយ​ទៀត។ ការតម្លើង​គម្រោង​ថវិកាយោធា​របស់​ជប៉ុន មានកំរិតរហូតដល់៤៦កោដដុល្លារ (ប្រមាណ​ជា៤៤កោដ​អ៊ឺរ៉ូ) សម្រាប់ឆ្នាំ២០១៧ខាងមុខនេះ។

សារព័ត៌មានជប៉ុនបានបញ្ជាក់ទៀតថា មួយផ្នែកពីក្នុងថវិកានេះ នឹងត្រូវចំណាយ ទៅលើកងកម្លាំង​អាមេរិកាំង ដែលមានវត្តមាន នៅលើប្រទេសជប៉ុន ក្នុងនោះមានការរើរុះ​មូលដ្ឋានយោធា «Futenma» របស់​អាមេរិក ដែល​ស្ថិត​លើ​កោះ «Okinawa» (ស្ថិតនៅភាគខាងត្បូង កណ្ដាលមហាសមុទ្រប៉ាស៊ីភិក) នោះផង។

សម្រាប់ប្រព័ន្ធផ្សព្វផ្សាយ នៅបស្ចឹមលោកវិញ បានពន្យល់បែបផ្សេងវិញថា នៅក្នុងរយៈពេល​ប៉ុន្មាន​ឆ្នាំ​ចុង​ក្រោយ​នេះ ប្រទេសជប៉ុន បានផ្លាស់ប្ដូរយុទ្ធសាស្ត្រ​ការពារជាតិ​របស់​ខ្លួន ដោយបានពង្រឹកកាន់​តែ​ខ្លាំង​ឡើង វត្តមាន​យោធាជប៉ុន ឲ្យកាន់តែច្រើនឡើង នៅក្នុងសមុទ្រចិន និងក្នុងភាគខាងលិច នៃមហា​សមុទ្រ​ប៉ាស៊ីភិក។

ប្រទេសជប៉ុន និងចិន មានជម្លោះដណ្ដើមដែនទឹកគ្នា នៅជុំវិញប្រជុំកោះ សេនកាគូ (Senkaku ហៅ​តាម​ជប៉ុន) ឬ ដាវយូ (Diaoyu ហៅតាមចិន) ដែលស្ថិតនៅក្នុងសមុទ្រចិនខាងកើត។ ជម្លោះទាស់ទែងគ្នានេះ បាន​ឈាន​ដល់​​មើល​មុខ​មិនចំមែនទែន នៅបន្ទាប់ពីរដ្ឋាភិបាលជប៉ុន បានទិញប្រជុំកោះ​ខាងលើនេះ ពីម្ចាស់​កម្មសិទ្ធិ​​ជនជាតិ​ជប៉ុន​ម្នាក់។

» ប្រជុំកោះតូចៗ ដែលប្រទេសជប៉ុន និងចិន និយាយថា នៅក្នុងអធិបតេយ្យភាពរបស់ផងខ្លួន៖

បើតាមរដ្ឋធម្មនុញ្ញជប៉ុន ដែលបង្កើតឡើង នៅក្រោយពេលជប៉ុន ចាញ់សង្គ្រាមលោកលើកទី២ បានហាម​ប្រទេស​នេះ មិនឲ្យប្រើមធ្យោបាយ«សង្គ្រាម» មកធ្វើជាដំណោះស្រាយ នៅក្នុងជម្លោះទាំងឡាយណា ដែល​មាន​លក្ខណៈ​​ជា​អន្តរជាតិនោះឡើយ។ រដ្ឋធម្មនុញ្ញដដែល ក៏បានហាមឃាត់ជប៉ុន មិនឲ្យ​បង្កើតកងទ័ព​ជើង​គោក ជើង​ទឹក និងកងទ័ពអាកាស ឲ្យលើសពីអ្វីដែលមានកម្រិត ត្រឹមតែការពារខ្លួននោះដែរ។ ហើយ​ភាគ​ច្រើន ពីក្នុង​កង​​កម្លាំង​​ជប៉ុន សម្រាប់ស្វ័យ​​ការពារ​ខ្លួន​នោះ មានលក្ខណៈជាកងកម្លាំងនគរបាល៕