កាលពីថ្ងៃសៅរ៍នេះ ប្រទេសរ៉ូស្ស៊ីបានសម្ដែងការប្រឆាំងតវ៉ា ទៅនឹងគម្រោងរបស់រដ្ឋាភិបាលក្រុង គៀវ ដែល​នឹងត្រៀមរៀបចំ ការសាកល្បងកាំជ្រួច នៅក្បែរនឹងឧបទ្វីបគ្រីមៀរ (Crimée) ទឹកដីមួយផ្នែក ដែល​ប្រទេស​រ៉ូស្ស៊ី ទើបនឹងប្រកាសដាក់ចូល ទៅក្នុងទឹកដីរបស់ខ្លួន កាលពីឆ្នាំ២០១៤។ បើតាមវិមានក្រឹមឡាំង (វិមាន​រដ្ឋាភិបាល​រ៉ូស្ស៊ី) បានលើកឡើងថា ប្រទេសអ៊ុយក្រែន កំពុងរំលោភលើកិច្ចព្រមព្រៀង ឬសន្ធិសញ្ញា​អន្តរជាតិ​ទាំង​ឡាយ ដែលចែងពីអធិបតេយ្យភាព នៃបណ្ដារដ្ឋឯករាជ្យនានា នៅក្នុងពិភពលោក។

ទីភ្នាក់ងារអាកាសចរណ៍ស៊ីវិល របស់ប្រទេសរ៉ុស្ស៊ី ឈ្មោះ «Rosaviatsia» បានប្រកាសកាលពីថ្ងៃសុក្រ ថា​ខ្លួន​ទទួលបានដំណឹង ពីសំណាក់ប្រទេសអ៊ុយក្រែន ជុំវិញគម្រោងសាកល្បង បាញ់កាំជ្រួច នៅថ្ងៃទី១​ និង​ទី២ ខែធ្នូ​នេះ ក្នុងលំហរអាកាស នៃតំបន់ «Simferopol» របស់ឧបទ្វីបគ្រីមៀរ ដែលប្រទេសរ៉ូស្ស៊ីចាត់ទុកថា ជា​«លំហ​អាកាស​របស់ខ្លួន»។

ដោយឡែក ក្រសួងការបរទេសរ៉ូស្ស៊ី ក៏បានផ្ញើរកំណត់ការទូតមួយ ទៅកាន់ប្រទេសអ៊ុយក្រែនដែរ ដើម្បី​ធ្វើការ​តវ៉ា ពីការ«រំលោភ»ដែនអាកាស របស់ខ្លួនដូច្នេះ។

ប៉ុន្តែសម្រាប់ប្រទេសអ៊ុយក្រែនវិញ មិនបានគិតថា នោះជាលំហអាកាសរបស់ប្រទេសរ៉ុស្ស៊ីទេ ដោយលើក​ឡើង​ថា ឧបទ្វីបគ្រីមៀរ នៅតែជាទឹកដីរបស់ខ្លួន។ លោក «Oleksander Tourchinov» រដ្ឋលេខាធិការ ក្រសួង​សន្ដិសុខ និងការពារជាតិអ៊ុយក្រែន បានបដិសេធពីការចោទប្រកាន់ ដែលថាប្រទេសអ៊ុយក្រែន រំលោភ​លើ​សន្ធិសញ្ញា​អន្តរជាតិ ហើយបានរុញការចោទប្រកាន់នោះ ត្រឡប់ទៅប្រទេសរ៉ូស្ស៊ីវិញ៕