លោក រូឌី ហ្គាយលៀនី (Rudy Giuliani) អតីតអភិបាលក្រុង ញ៉ូយក និងជាទីប្រឹក្សាម្នាក់ ពីក្នុង​ចំណោម​ទីប្រឹក្សា ដ៏ជិតដិត របស់លោក ដូណាល់ ត្រាំ (Donald Trump) ប្រធានាធិបតីអាមេរិក​ទើប​នឹង​ជាប់​ឆ្នោត បាន​ថ្លែងបញ្ជាក់នៅចុងសប្ដាហ៍មុនថា កូនបង្កើតទាំងប្រុសស្រី របស់លោក ត្រាំ នឹង​មិន​ចូល​ធ្វើ​ជា​សមាជិក នៅ​ក្នុងរដ្ឋាភិបាលរបស់ឪពុកខ្លួននោះឡើយ។ លោក រូឌី បានផ្ដល់ជាយោបល់ថា ពួកគេ​គប្បី​ចូល​ទៅ​គ្រប់​គ្រង បណ្ដាមុខជំនួញ​​ដ៏ច្រើនពោរពាស របស់ឪពុករបស់ពួកគេ។

កូនៗទាំងបួននាក់របស់លោក ដូណាល់ ត្រាំ មានអ្នកស្រី អាយវ៉ានកា (Ivanka) កញ្ញា ទីហ្វានី (Tiffany) លោក អេរិក (Eric) និងលោក ដូណាល់ ចន ត្រាំ (Donald Jonh Trump)។ លោកអតីតអភិបាល បាន​ថ្លែង​ប្រាប់​បណ្ដាទូរទស្សន៍អាមេរិក «CNN» ថា ពួកគេមិនអាចចូល ធ្វើជាសមាជិករដ្ឋាភិបាលបាន ដោយសារ​តែ​គោល​ការណ៍​របស់រដ្ឋាភិបាល មិនត្រូវឲ្យមានសាច់សារលោហិត ចូលធ្វើការ ឬពាក់ព័ន្ធជាមួយនោះទេ។

យ៉ាងណា ក៏កូនបង្កើតចំនួនបីនាក់ របស់ប្រធានាធិបតីជាប់ឆ្នោតថ្មី គឺអ្នកស្រី អាយវ៉ានកា លោក អេរិក និង​លោក ដូណាល់ ចន កំពុងនៅជាសមាជិក នៃក្រុមការងារផ្ទេរតំណែង ដែលមានតួនាទី ក្នុងការរៀបចំ នូវ​រដ្ឋបាល​ថ្មី​ របស់ឪពុកពួកគេនៅឡើយ។ បន្ថែមពីលើនេះ ស្វាមីរបស់អ្នកស្រី អាយវ៉ានកា គឺលោក ចារ៉េដ គូស្នើរ (Jared Kushner) ក៏មានវត្តមាន នៅក្នុងក្រុមការងារនេះដែរ។

បញ្ជៀសជម្លោះផលប្រយោជន៍...

លោកទីប្រឹក្សា រូឌី បានបន្តអះអាងទៀតថា៖ «យើងត្រូវធ្វើរឿងខ្លះ ដែលមានលក្ខណៈងាយស្រួល រឿងខ្លះ​ដែល​​ត្រឹម​ត្រូវ។ រឿងខ្លះទាំងនោះ ដែលបង្ហាញទៅពលរដ្ឋអាមេរិក ថាប្រធានាធិបតី ត្រាំ មិនមាន​ជាប់​ពាក់​ព័ន្ធ នៅ​ក្នុង​ផល​ប្រយោជន៍ នៃមុខជំនួញ ដែលពេលនេះ គ្រប់គ្រងដោយកូនៗរបស់ខ្លួននោះទេ។»។

ចង់មិនចង់ ការបារម្ភនៅតែកើតមានឡើង ថាប្រធានាធិបតីជាប់ឆ្នោតថ្មី លោក ដូណាល់ ត្រាំ ដែលជា​មហា​សេដ្ឋី​មួយរូបផងនេះ នឹងច្បាស់ជារងការពាក់ព័ន្ធ ទោះមិនច្រើន ក៏មានការពាក់ព័ន្ធតិចតួចដែរ នៅក្នុង​បញ្ហា​ផល​​ប្រយោជន៍ នៃមុខជំនួញរបស់លោក ដែលលោកបានគ្រប់គ្រង អស់ជាច្រើនឆ្នាំមកហើយ។ លោក ត្រាំ មាន​ទ្រព្យសម្បត្តិ​ដ៏មហាសាល ដែលរាប់បញ្ចូល នូវសណ្ឋាគារ សំណង់អាគារ​ប្រណិតៗ​ជាច្រើន និង​មុខរបរ​ផ្សេង​​ទៀត ដែល​​មាន​​ដាក់​ឈ្មោះ «Trump»។ ទ្រព្យសម្បត្តិទាំងនេះ នៅមិនទាន់រាប់ ពីមុខ​ជំនួញ​ផ្សេង​ទៀត ដែល​លោក​បានគ្រប់គ្រង នៅឯបរទេសនោះផងទេ៕