ថៃ៖ សម្លាប់ជនរួមជាតិឯងកាប់ជាដុំៗ ហើយដាក់បង្កប់ក្នុងជញ្ជាំង
- ដោយ: កេសរ កូល ([email protected]) - ភ្នំពេញ ថ្ងៃទី១៤ វិច្ឆិកា ២០១៦
- កែប្រែចុងក្រោយ: November 17, 2016
- ប្រធានបទ: ឧក្រិដ្ឋកម្ម
- អត្ថបទ: មានបញ្ហា?
- មតិ-យោបល់
-
នគរបាលថៃបានប្រកាស កាលពីចុងសប្ដាហ៍នេះថា ជនសង្ស័យមានវ័យជាង៥០ឆ្នាំ និងជាជនជាតិអ៊ីស្ត្រាអែលម្នាក់ ត្រូវបានឃាត់ខ្លួន ពីបទសង្ស័យក្នុងអំពើមនុស្សឃាតដ៏សាហាវមួយ ដែលបានរញ្ជួលអស់ទាំងប្រទេសថៃ។ ជនរងគ្រោះ ដែលជាជនជាតិអ៊ីស្ត្រាអែលដែរនោះ ត្រូវបានគេប្រទះឃើញសាកសព កាប់ជាដុំៗ ដាក់ខ្ចប់ថង់ផ្លាស្ទីក ក្នុងជញ្ជាំងបិតជិត នៃលំនៅដ្ឋានរបស់ជនសង្ស័យ ដែលស្ថិតនៅភាគខាងជើង រាជធានីបាងកក។
អ្នកស៊ើបអង្កេតថៃ បានពន្យល់ថា ដំណើរដែលឈានទៅរកឃើញ ទង្វើមនុស្សឃាត ដ៏ស្ងាត់ស្ងៀម តែសាហាវមួយនេះ ដោយសារស្ថានទូតអ៊ីស្ត្រាអែល ប្រចាំនៅប្រទេសថៃ និងអ្នកជិតដិតម្នាក់ របស់ជនរងគ្រោះ បានប្ដឹងទៅអាជ្ញាធរ កាលពីសប្ដាហ៍មុន ហើយបានស្នើសុំ ឲ្យអាជ្ញាធរស្វែងរកជនរងគ្រោះ ដែលបានបាត់ខ្លួនយ៉ាងអាថ៌កំបាំង។
» វីដេអូ បង្ហាញពីការចាប់ខ្លួនជនសង្ស័យ៖
ប្រើកាតឥណទាន របស់ជនរងគ្រោះ...
លោក «Suthin Suppuang» នាយនគរបាលទទួលបន្ទុក ផ្នែកប្រឆាំងឧក្រិដ្ឋកម្ម នៃនគរបាលថៃ បានអះអាងប្រាប់ទីភ្នាក់ងារព័ត៌មានបារាំង «AFP» ថា ការស្វែងរកនោះ បានមកដល់ដំណាក់កាលមួយ ហើយធ្វើឲ្យអាជ្ញាធរផ្ដោតការសង្ស័យ ទៅលើជនជាតិអ៊ីស្ត្រាអែលម្នាក់ ដែលរស់នៅក្នុងសង្កាត់ ននថាបូរី (Nonthaburi) ស្ថិតនៅភាគខាងជើង នៃរាជធានីបាងកក។ លោកបានបន្តទៀតថា៖ «មូលហេតុមួយ ពីក្នុងចំណោមមូលហេតុជាច្រើន ដែលធ្វើឲ្យយើងដាក់ការសង្ស័យនោះ គឺអាជ្ញាធរបានរកឃើញ ថាមានការព្យាយាមប្រើកាតឥណទាន របស់ជនរងគ្រោះ ដែលបានបាត់ខ្លួន»។
អ្នកទទួលខុសត្រូវរូបនេះ បានបញ្ជាក់ថា៖ «យើងបានចូល ទៅឆែកឆេរលំនៅដ្ឋាន របស់ជនសង្ស័យ ហើយក៏បានរកឃើញ សាកសពរបស់ជនរងគ្រោះ ដែលត្រូវបានកាត់ដាច់ ជាបីដុំៗ ដាក់រំក្នុងថង់ផ្លាស្ទិក»។
» វីដេអូ ជារបាយការណ៍របស់ទូរទស្សន៍ក្នុងស្រុក៖
សារភាពពីឧក្រិដ្ឋកម្មរបស់ខ្លួន...
បើតាមលោក «Krissana Pattanacharoen» អ្នកនាំពាក្យនគរបាលថៃ បានបញ្ជាក់បន្ថែមថា ជនសង្ស័យបានសារភាព ពីទង្វើមនុស្សឃាតរបស់ខ្លួន ហើយហេតុផល ដែលឈានទៅសម្លាប់ជនរងគ្រោះ ដោយសារអ្នកទាំងពីរ មានបញ្ហា «ស្នេហាត្រីកោណ»។ ជនរងគ្រោះមានឈ្មោះ «Eliyahu Cohen» អាយុ៦២ឆ្នាំ រីឯជនសង្ស័យ មានឈ្មោះ «Simon Beton» អាយុ៥២ឆ្នាំ៕