ការបំផ្ទុះគ្រាប់បែកដ៏រង្គាល ដែលប្រកាសទទួលស្គាល់ ដោយអង្គការភេរវនិយម រដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ពាក្យ​​កាត់​​​អង់គ្លេស​​​ហៅ ISIS) បានកំទេចមណ្ឌលសាសនាឥស្លាមមួយកន្លែង ស្ថិតនៅភាគនារតី នៃប្រទេសប៉ាគីស្តង់។ ការ​វាយ​ប្រហារនេះ បានធ្វើឲ្យមនុស្សស្លាប់យ៉ាងតិច ៥២នាក់ និង​១០៥នាក់​រង​របួស។ នេះ បើតាមការថ្លែងឲ្យដឹង របស់​អាជ្ញាធរ​ក្នុង​តំបន់។

មន្ត្រីសន្តិសុខប្រចាំតំបន់ បានថ្លែងប្រាប់អ្នកសារព័ត៌មានថា នៅមុនការបំផ្ទុះនោះ មនុស្សជាច្រើនរយនាក់ បាន​​ជួបជុំគ្នា នៅ​ក្នុង​វិហារ​ឥស្លាម​ឈ្មោះ «Shah Noorani» ដើម្បីចូលរួមពិធីសាសនាមួយ ឈ្មោះ «Dhamaal»។ មន្ត្រី​បាន​ថ្លែង​ឡើងថា៖ «ជារៀងរាល់ល្ងាច នៅ​ពេល​ព្រះអាទិត្យ​អស្ដង្គត់ គេមានរៀបចំពិធីនេះ ហើយ​មនុស្ស​ម្នា​បាន​ប្រមូល​គ្នា ដើម្បី​ចូលរួម​នៅ​ទីនោះ​ទាំងអស់គ្នា»។

អ្នកទទួលខុសត្រូវ ផ្នែកជួយសង្គ្រោះមួយរូប បានថ្លែងប្រាប់ទូរទស្សន៍ក្នុងស្រុកថា អ្នករងរបួសត្រូវបាន​ដឹក​ជម្លៀស​ជា​បន្ទាន់ ទៅកាន់​តំបន់ជុំវិញ ជាពិសេសទៅកាន់ក្រុង «Hub» និង«Karachi»។ រដ្ឋាភិបាល​ប៉ាគីស្តង់ បាន​បញ្ជូន​រថ​សង្គ្រោះ​ជា​បន្ទាន់ ចំនួន២៥គ្រឿង ពីក្រុង «Hub» ដើម្បីជួយដឹកជម្លៀសជនរងគ្រោះ។ កងទ័ព​ប៉ាគីស្តង់ ក៏ត្រូវបានបញ្ជូន ឲ្យទៅជួយធ្វើយុទ្ធនការ​សង្គ្រោះ​ដូចគ្នា​ដែរ ដោយ​សារស្ថានភាព នៃទីកន្លែងកើតហេតុ មាន​លក្ខណៈ​ដាច់​ស្រយ៉ាល។

ដោយឡែក សម្រាប់អង្គការភេរវនិយម រដ្ឋអ៊ីស្លាមវិញ បានប្រកាសទទួលស្គាល់ការវាយប្រហារនេះ តាមរយៈ​ទីភ្នាក់ងារឃោសនា​ផ្លូវការ​របស់​ខ្លួន ឈ្មោះ «Amaq»។ ក្រុមនេះបានអះអាង នៅក្នុងសេចក្ដីប្រកាសព័ត៌មាន ផ្សាយ​តាមទីភ្នាក់ងារនោះថា យុទ្ធជនម្នាក់ ពីចំណោម​កង​កម្លាំង​ប្រយុទ្ធដើម្បីព្រះអាឡាហ៍​​របស់ខ្លួន គឺជាអ្នក​ដែល​បាន​ធ្វើ «ប្រតិបត្តិការ ប្រកប​ដោយវីរភាព»នេះ។

ចំពោះប្រធានាធិបតីប៉ាគីស្តង់ លោក ម៉ាមនូន ហ៊ូសាន់ (Mamnoon Hussain) វិញ បានថ្លែងប្រតិកម្មភ្លាមៗ តប​ទៅ​នឹង​ការវាយប្រហារនេះថា៖ «រដ្ឋាភិបាល បានកំណត់យ៉ាងច្បាស់ ក្នុងការតាមកំចាត់​ក្រុមភេរវនិយម និង​ក្រុម​និយម​ជ្រុល ឲ្យអស់ពីប្រទេស»។

ការវាយប្រហារភេរវកម្មរបៀបនេះ មិនមែនទើបតែកើតឡើង ជាលើកទីមួយទេ។ កាលពីខែមុន សាលា​នគរបាល​មួយ​កន្លែង នៅក្នុងតំបន់នោះ ក៏បានរង នូវអំពើភេរវកម្មយ៉ាងរង្គាល​ប្រហាក់ប្រហែលនេះដែរ (ច្រើន​ជាង៦០នាក់ បានស្លាប់)។ ទង្វើនោះ ត្រូវបានក្រុមរដ្ឋអ៊ីស្លាម ចេញមុខមកទទួលស្គាល់ដូចគ្នា។

សមាជិករបស់ក្រុមរដ្ឋអ៊ីស្លាម មិនចូលចិត្តវិហារសាសនាឥស្លាម ដូចយ៉ាងវិហារ «Shah Noorani» ដែល​ក្រុម​អ្នក​មានជំនឿ បានគិតថា ជាទីកន្លែងឧទ្ទិស ដល់«សាវ័ករបស់ព្រះ» នោះឡើយ។ សម្រាប់ក្រុម​ឥស្លាម​និយម​តឹង​មួយ​នេះ «សាវ័ករបស់ព្រះ» គឺជារូបភាព ឬគំនិតនៃការប្រឆាំង ទៅនឹងសាសនាឥស្លាម៕