ប្រទេសចំនួន៣៩ប្រកាសរួមគ្នា «ខ្វាយខ្វល់»លើស្ថានភាពសិទ្ធិមនុស្សនៅកម្ពុជា
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី១៤ កញ្ញា ២០១៦
- កែប្រែចុងក្រោយ: September 15, 2016
- ប្រធានបទ: នយោបាយ-កម្ពុជា
- អត្ថបទ: មានបញ្ហា?
- មតិ-យោបល់
-
ពីក្នុងចំណមប្រទេស ទាំង៣៩នោះ ប្រទេសចំនួន៣៦ដំបូង គឺជាអ្នកផ្ដួចផ្ដើម នូវសេចក្ដីប្រកាសរួមនេះឡើង ខណៈប្រទេសបីទៀត គឺប្រទេសប៊ូស្នៀរ-ហេហ្សេហ្គោវិន ប្រទេសអ៊ុយក្រែន និងប្រទេសលិកតេនស្តែន (Liechtenstein ប្រទេសតូចមួយ នៅចន្លោះរវាងប្រទេសស្វីស និងប្រទេសអូទ្រីស៍) ទើបនឹងបញ្ចូលខ្លួន មកក្នុងសេចក្ដីប្រកាសនេះ បន្ទាប់ពីបានចេញផ្សាយរួច។
រីឯប្រទេសទាំង៣៦នោះ រួមមាន ប្រទេសអាល់បានី អូស្ត្រាលី កាណាដា ជប៉ុន ប្រទេសម៉ាសេដ័ន (អតីតយូហ្គោស្លាវី) ណ័រវេស ស្វីស អង់គ្លេស ប្រទេសទាំង ២៧ នៃសហភាពអ៊ឺរ៉ុប និងសហរដ្ឋអាមេរិក។
សេចក្ដីប្រកាសរួមនេះ ត្រូវបានលោក «Keith Harper» ឯកអគ្គរដ្ឋទូតអាមេរិក ប្រចាំនៅក្រុមប្រឹក្សាសិទ្ធិមនុស្ស របស់អង្គការសហប្រជាជាតិ (ស្ថិតក្នុងក្រុងហ្សឺណែវ ប្រទេសស្វីស) ដែលតំណាងឲ្យប្រទេសទាំង៣៦ យកមកថ្លែង ក្នុងថ្ងៃទី១៤ ខែកញ្ញានេះ នៅចំពោះអង្គប្រជុំប្រចាំឆ្នាំមួយ របស់ស្ថាប័នអន្តរជាតិ ដ៏កំពូលមួយនេះ ដើម្បីពិនិត្យមើលស្ថានភាពសិទ្ធិមនុស្ស នៅជុំវិញពិភពលោក។
ប្រទេសទាំងនេះ បានបង្ហាញក្តីកង្វល់ របស់ពួកគេ ចំពោះការកើនឡើងនៃភាពតានតឹង ផ្នែកនយោបាយនៅកម្ពុជា ថាកំពុងគំរាមកំហែង ដល់សកម្មភាពស្របច្បាប់ របស់គណបក្សប្រឆាំង និងអង្គការសមាគមមិនមែនរដ្ឋាភិបាល ដែលធ្វើការផ្នែកសិទ្ធិមនុស្ស។ រឿងរ៉ាវដែលបង្កើនភាពខ្វាយខ្វល់ថែមទៀតនោះ គឺការប្ដឹងឡើងទៅតុលាការដោយមិនទំនង ប្រឆាំងនឹងអ្នករិះគន់រដ្ឋាភិបាល ជាពិសេសស្ថានភាពឈប់ដើរទៅមុខ នៃ«វប្បធម៌សន្ទនា»រវាងគណបក្សនយោបាយ ធំជាងគេទាំងពីរ។
ករណីបាញ់សម្លាប់លោក បណ្ឌិត កែម ឡី ដែលជាអ្នកធ្វើអត្ថាធិប្បាយនយោបាយដ៏ល្បី ក៏ត្រូវបានសេចក្ដីប្រកាសរួមនោះ លើកយកមកបញ្ជាក់ដែរ។ សេចក្ដីប្រកាសរួម បានអះអាងថា «បទឧក្រិដ្ឋនេះ នាំឲ្យសង្គមស៊ីវិល និងសំឡេងឯករាជ្យនៅកម្ពុជា មានការភ័យព្រួយ» និងបានអំពាវនាវ ឲ្យមានការស៊ើបអង្កេតពេញលេញ និងដោយតម្លាភាព ចំពោះការបាញ់សម្លាប់ ដ៏ព្រៃផ្សៃខាងលើ។
ប៉ុន្តែការខ្វាយខ្វល់ របស់បណ្ដាប្រទេសទាំងនេះ ត្រូវបានលោក កែវ រ៉េមី ប្រធានគណៈកម្មាធិការសិទ្ធិមនុស្សកម្ពុជា (ស្ថាប័នសេនាធិការមួយ របស់រដ្ឋាភិបាលកម្ពុជា) ប្រកាសច្រានច្រោល និងប្រាប់ឲ្យប្រទេសទាំងនោះ ថាមិនចាំបាច់មកខ្វាយខ្វល់ ចំពោះរឿងសិទ្ធិមនុស្ស នៅកម្ពុជាឡើយ។
ស្ថានភាពសិទ្ធិមនុស្សនៅកម្ពុជា ល្អជាង...
លោក កែវ រ៉េមី ដែលធ្លាប់ជាមន្ត្រីគណបក្សប្រឆាំង តែបានមកចុះចូល ជាមួយគណបក្សប្រជាជនកម្ពុជានោះ បានថ្លែងប្រាប់សារព័ត៌មានក្នុងស្រុកមួយថា ប្រទេសកម្ពុជា មានអធិតេយ្យភាពរបស់ខ្លួន និងមិនមែនជាប្រទេសរណប ឲ្យប្រទេសណាមួយទេ។ មន្ត្រីចុះចូលរូបនេះ បានថ្លែងឲ្យដឹងទៀតថា សេចក្ដីថ្លែងការណ៍រួមនានា តែងត្រូវបានធ្វើឡើង ទៅតាមតែគ្នាប៉ុណ្ណោះ ជាពិសេសធ្វើតាមបណ្ដាប្រទេស ដែលមានឥទ្ធិពល និងប្រទេសមហាអំណាច ខណៈស្ថានភាពសិទ្ធិមនុស្សនៅកម្ពុជា មានកម្រិតល្អជាងប្រទេសទាំង៩ផ្សេងទៀត នៅក្នុងសមាគមប្រជាជាតិអាស៊ីអាគ្នេយ៍ ហៅ«ASEAN»។
យ៉ាងណា សេចក្ដីប្រកាសរួមរបស់ប្រទេសទាំងប៉ុន្មានខាងលើ បានរំលឹករដ្ឋាភិបាលកម្ពុជា ដោយយកការអំពាវនាវកន្លងទៅ របស់តំណាងពិសេសនៃអង្គការសហប្រជាជាតិ មកបញ្ជាក់ ដើម្បីស្នើឲ្យមានការ«ធានានូវបរិយាកាស នៃភាពអនុគ្រោះ និងប្រកបដោយសុវត្ថិភាព សំរាប់សង្គមស៊ីវិល និងអ្នកការពារសិទ្ធិមនុស្ស ដែលមានតួនាទីយ៉ាងសំខាន់ ក្នុងការចាប់ឲ្យរដ្ឋាភិបាលមានការទទួលខុសត្រូវ ហើយនាំមកនូវផលប្រយោជន៍ នៃសិទ្ធិមនុស្ស ដល់សង្គមកម្ពុជាទាំងមូល»។
ប្រទេសទាំងអស់នោះ បានអំពាវនាវឲ្យរដ្ឋាភិបាល ខិតខំជាអតិប្បរិមា ដើម្បីបង្កើតឲ្យមានបរិយាកាសនយោបាយមួយ ដែលក្នុងនោះគណបក្សប្រឆាំង និងអង្គការសមាគមសង្គមស៊ីវិល អាចធ្វើសកម្មភាពបានដោយសេរី។ ជាពិសេស ប្រទេសកម្ពុជាគម្បីគោរពតាមការប្តេជ្ញាចិត្តរបស់ខ្លួន នៅចំពោះប្រជាជនកម្ពុជា និងសហគមន៍អន្តរជាតិ ដើម្បីការបោះឆ្នោតដោយសេរី និងយុត្តិធម៌ ដែលនឹងធានាភាពស្របច្បាប់ សម្រាប់រដ្ឋាភិបាលអណត្តិក្រោយៗ៕