ហ៊ុន សែន ព្រមានកំទេច«ពលរដ្ឋ»ចូលរួមបាតុកម្ម
- ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី១២ កញ្ញា ២០១៦
- កែប្រែចុងក្រោយ: September 13, 2016
- ប្រធានបទ: នយោបាយ-កម្ពុជា
- អត្ថបទ: មានបញ្ហា?
- មតិ-យោបល់
-
ជាភាសាថ្មីមួយទៀត ដែលចេញពីថ្នាក់ដឹកនាំរដ្ឋ ដ៏កំពូលរបស់កម្ពុជា និងដែលគេកម្របានជួបប្រទះ ក្នុងពិភពលោក។ កម្របានជួបប្រទះ ដោយសារនាយករដ្ឋមន្ត្រីមួយទាំងមូល ដែលត្រូវដឹកនាំរដ្ឋ ដឹកនាំជាតិ និងប្រជាជន ពីគ្រប់និន្នាការទាំងអស់ នៅក្នុងរដ្ឋប្រជាធិបតេយ្យមួយ បានពោលពាក្យព្រមាន ដែលមានន័យធៀបស្មើនឹងកំទេចចោល នូវជនណាក៏ដោយ ដែលត្រៀមចូលរួមជាមួយ មហាបាតុកម្មរបស់គណបក្សប្រឆាំង។
នាយករដ្ឋមន្ត្រីរបស់ប្រទេសកម្ពុជា លោក ហ៊ុន សែន ដែលមានអតីតភាពជាទាហានខ្មែរក្រហមមួយរូបនោះ បានសរសេរថា លោកត្រូវ «កាត់សាច់» ត្រង់ណាក៏ដោយចោល ប្រសិនជាសាច់នោះ មានជំងឺមហារីក ជាជាងទុកឲ្យសាច់នោះ រីករាលដាលទៅដល់រូបរាងកាយទាំងមូល។ ជាការឆ្លើយតបមួយ ទៅនឹងមតិយោបល់របស់ប្រិយមិត្តមួយរូប ដែល«អង្វរ»ឲ្យលោក ហ៊ុន សែន ពិចារណាចំពោះពលរដ្ឋណា ដែល«លង់តាមគេអូសទាញ» ដើម្បីចូលរួមក្នុងមហាបាតុកម្ម ដែលគណបក្សសង្គ្រោះជាតិ ត្រៀមនឹងរៀបចំឡើង នាពេលខាងមុខ។
ប្រិយមិត្តអ្នកប្រើបណ្ដាញសង្គម ដែលមានឈ្មោះ «Say Samath» បានសរសេរតបទៅនឹងបទបញ្ជា របស់លោក ហ៊ុន សែន កាលពីយប់ម្សិលម៉ិញ ដែលកំណត់ឲ្យកងកម្លាំងប្រដាប់អាវុធជាតិ ត្រៀមកំចាត់ចោល នូវគម្រោងការធ្វើមហាបាតុកម្ម របស់គណបក្សប្រឆាំង ដែលលោក ហ៊ុន សែន ចាត់ទុកថា បានប៉ះពាល់ដល់ស្ថេរភាព និងសន្តិសុខរបស់ជាតិ។ បន្ទាប់ពីបទបញ្ជនោះត្រូវបានប្រកាសរួច នៅប៉ុន្មានម៉ោងក្រោយមក មានការចល័តទ័ពជាច្រើនសិបនាក់ និងជាច្រើនមុខព្រួញ នៅក្នុងរាជធានីភ្នំពេញ ជាពិសេសនៅជុំវិញ ទីស្នាក់ការគណបក្សសង្គ្រោះជាតិ។
» អានអត្ថបទដែលទាក់ទង៖ បាតុកម្ម CNRP៖ ហ៊ុន សែន ព្រមាន«វាយពស់ត្រូវវាយក្បាលមុន»
លោក «Say Samath» បានសរសេរផ្ដល់ជាមតិ នៅពេលនោះថា៖ «កំហឹងទល់នឹងកំហល់ រាស្រ្តខ្មែរជាញាតិសន្តានសម្តេច បើគាត់លង់តាមគេអូសទាញ អញ្ចឹងគួរតែបន្ទូរដៃ ឲ្យគាត់ផង។ សម្តេចដូចជាម៉ែឪរាស្រ្ត កូនខុសម៉ែឪទទួលខុសត្រូវ (បាតដៃក៏សាច់ ខ្នងដៃក៏សាច់)។»។
ជាចម្លើយតបវិញ លោក ហ៊ុន សែន បានសរសេរដូច្នេះថា៖ «បើសាច់វាមានជម្ងឺមហារីក ត្រូវតែកាត់វាចោល ដើម្បីកុំឱ្យរាលដាល ដល់ខ្លួនប្រាណទាំងមូល»។
ខាងក្រោមនេះ ជារូបភាពដែលផ្តិតចេញ ពីអេក្រង់ (PrintScreen) នៃសំណេររបស់លោក ហ៊ុន សែន៖
លោក ព្រហ្ម គិត អតីតមន្ត្រីច្បាប់ខ្មែរ ដែលសព្វថ្ងៃចូលនិវត្តន៍ និងរស់នៅក្នុងភាគខាងត្បូង ប្រទេសបារាំង បានចាត់ទុកភាសានេះ របស់មេដឹកនាំកម្ពុជា លោក ហ៊ុន សែន ថាជា«សារជាតិ» នៃមនុស្សដែលធ្លាប់រស់នៅ តស៊ូក្នុងព្រៃ បើទោះជាចូលមករស់នៅក្នុងស្រុក ក៏នៅតែចង់ទៅតស៊ូក្នុងព្រៃដដែល។ អតីតមន្ត្រីរូបនេះ បាននិយាយថា លោក ហ៊ុន សែន គ្រាន់តែចេះដឹកនាំទ័ពប៉ុណ្ណោះ តែលោក ហ៊ុន សែន មិនស្គាល់អ្វីទៅ ជាការដឹកនាំសង្គមនោះឡើយ។
លោក ព្រហ្ម គិត ថា៖ «បើលោកនាយករដ្ឋមន្ត្រី ប្រៀបធៀបសង្គមដែលលោកដឹកនាំ ទៅនឹងជំងឺមហារីក នោះលោក ហ៊ុន សែន ត្រូវគិតថា តើជំងឺនេះបណ្ដាលមកពីអ្វី ហើយលោកត្រូវការពារជំងឺនេះ ឬចាត់វិធានការ ប្រយ័ត្នប្រយ៉ែង តាំងពីដំបូងមក។ តែបើសង្គមនេះ មានជំងឺមហារីកហើយ លោក ហ៊ុន សែន កាត់សាច់មួយដុំចោល មិនប្រាកដថាជាសះឡើយ។ ព្រោះមូលហេតុធំបំផុត គឺបណ្ដាលមកពីលោក ហ៊ុន សែន ខ្លួនឯងនេះហើយ។»។
អតីតមន្ត្រីរាជការខ្មែរ ដែលមានវ័យចំណាស់រូបនេះ បានពន្យល់ថា៖ «ដើម្បីឈឺ ឲ្យទៅជាជំងឺមហារីកកើត លុះត្រាតែបញ្ហានោះ វាមានទំហំធំណាស់ មិនមែនមេបក្សប្រឆាំងពីរ-បីនាក់ មកស្រែកពីរ-បីម៉ាត់ទៅ សម្រាប់តែមានជំងឺមហារីកនេះទេ»។
ដោយឡែក ចំពោះជំងឺមហារីក ដែលសំដៅទៅលើការរីករាលដាល នៃដំបៅស៊ីរូង លើប្រព័ន្ធសេរីរាង្កណាមួយ នៅក្នុងរាងកាយសត្វ ឬមនុស្សនោះ ត្រូវបានលោកវេជ្ជបណ្ឌិត ស សូផាត ដែលកំពុងធ្វើការក្នុងមន្ទីរពេទ្យដ៏ធំមួយ នៃរដ្ឋធានីប៉ារីស ប្រទេសបារាំង ពន្យល់ថា មានច្រើនករណី ហើយការព្យាបាល ក៏មិនប្រាកដថា ត្រូវកាត់សាច់ដែលឈឺនោះចោលដែរ។ លោក សូផាត បានបញ្ជាក់ថា ក្នុងករណីខ្លះ ការកាត់សាច់ឈឺមួយដុំនេះចោល បែរជាអាចបណ្ដាល ឲ្យអ្នកជំងឺស្លាប់ភ្លាមៗទៅវិញ៕