កឹម សុខា ថ្លែងពីការប្រើស្ថាប័នជាតិ ដើម្បីបញ្ចប់ជីវិតនយោបាយរបស់លោក
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី០៩ កញ្ញា ២០១៦
- កែប្រែចុងក្រោយ: September 09, 2016
- ប្រធានបទ: នយោបាយ-កម្ពុជា
- អត្ថបទ: មានបញ្ហា?
- មតិ-យោបល់
-
អនុប្រធាន (សព្វថ្ងៃជាប្រធានស្ដីទី) គណបក្សសង្គ្រោះជាតិ បានថ្លែងនៅថ្ងៃទី៩ ខែកញ្ញានេះ ពីការប្ដេជ្ញាចិត្តរបស់លោក ក្នុងការតស៊ូដោយសន្តិវិធី តទៅមុខទៀត ដើម្បីលិទ្ធិប្រជាធិបតេយ្យ និងប្រកាសថា លោកសុខចិត្តស្លាប់ខ្លួន ដើម្បីឲ្យជាតិខ្មែររស់។ លោកបានប្រកាសទៀតថា ការតស៊ូនេះ នឹងនៅតែបន្តធ្វើ បើទោះជាលោក កំពុងរងនូវការធ្វើទុក្ខបុកម្នេញ តាមគ្រប់រូបភាព ពីសំណាក់បណ្ដាស្ថាប័នជាតិ ដែលត្រូវបានប្រើប្រាស់ ក្នុងគោលបំណងបញ្ចប់«ជីវិតនយោបាយ» របស់លោកនោះក៏ដោយ។
នៅចំពោះអ្នកគាំទ្រ ច្រើនរយនាក់ នៅទីស្នាក់ការគណបក្សសង្គ្រោះជាតិ ដែលជាកន្លែងលាក់ខ្លួនរបស់លោក តាំងពីជិត៤ខែមកហើយនោះ លោក កឹម សុខា បានបន្តអះអាងទៀតថា លោកចង់ឲ្យពលរដ្ឋខ្មែរបានសុខ តាមរយៈការបង្រួបបង្រួមជាតិ ឯកភាពជាតិ និងអនុវត្តគោលការណ៍ លទ្ធិប្រជាធិបតេយ្យពហុបក្សនៅកម្ពុជា។
អនុប្រធានគណបក្សប្រឆាំង បានថ្លែងទៀតថា៖ «ការលះបង់របស់ខ្ញុំ ប្រឈមគ្រោះថ្នាក់ជាច្រើន ដូចជាការគំរាមកំហែង បំភិតបំភ័យ មូលបង្កាច់ ចាប់ដាក់គុក ប៉ុនប៉ងសម្លាប់ ផ្តាច់អាយុជីវិតខ្ញុំ ជាច្រើនដងមកហើយ។ ប៉ុន្តែខ្ញុំនៅតែតស៊ូ រក្សាគោលជំហរដដែល ដោយខ្ញុំយល់ឃើញថា ខ្ញុំអាចគ្រោះថ្នាក់ តែមិនចង់ឃើញជាតិ និងប្រជាពលរដ្ឋខ្មែរគ្រោះថ្នាក់ឡើយ។»។
ការថ្លែងរបស់លោក កឹម សុខា បានធ្វើឡើងស្របពេលនឹងសវនាការ នាសាលាដំបូងរាជធានីភ្នំពេញ ដែលបានបើកធ្វើប្រឆាំងនឹងរូបលោក នៅក្នុងសំនុំរឿង«បដិសេធមិនចូលខ្លួន» តាមការកោះហៅ របស់ចៅក្រមស៊ើបសួរ។ សវនាការនោះ បានធ្វើរហូតដល់ចប់ចុងចប់ដើម ដោយពុំមានវត្តមានរបស់លោក កឹម សុខា និងមេធាវីទាំងបួនរូបរបស់លោកនោះទេ។ រឿងរ៉ាវដែលឈានទៅដល់ ការបដិសេធមិនចូលខ្លួននោះ បានផ្តើមចេញ ពីរឿងអាស្រូវ ចោទប្រកាន់ស្នេហាលួចលាក់មួយ ជាមួយអតីតនារីកាត់សក់ម្នាក់ គឺ នាង ខុម ចាន់តារ៉ាទី ហៅស្រីមុំ។
មន្ត្រីរដ្ឋាភិបាលច្រើននាក់ រួមនឹងលោកនាយករដ្ឋមន្ត្រី ហ៊ុន សែន ផង តែងបាននិយាយថា ចំណាត់ការរបស់តុលាការ ទៅលើអនុប្រធានគណបក្សប្រឆាំង ជារឿងរ៉ាវរបស់តុលាការ ដែលមានឆន្ទានុសិទ្ធិ និងឯករាជ្យភាពរបស់ខ្លួន មិនមានជាប់ពាក់ព័ន្ធ ជាមួយនយោបាយនោះទេ។
ប៉ុន្តែក្រុមអ្នកវិភាគ និងអ្នកឃ្លាំមើលស្ថានការណ៍នេះ មិនបានយល់ដូច្នេះទេ។ របាយការណ៍មួយ ដែលទើបនឹងចេញផ្សាយ ដោយអង្គការឃ្លាំមើលសិទ្ធិមនុស្ស អន្តរជាតិ ហៅជាភាសាអង់គ្លេស ថា«Human Rights Watch» ស្ដីពីរយៈពេល ៣០ឆ្នាំ ក្នុងពេលកាន់តំណែងរបស់លោក ហ៊ុន សែន បានឲ្យដឹងថា លោក ហ៊ុន សែន បានប្រើប្រាស់នូវមធ្យោបាយជាច្រើន ដើម្បីរក្សាតំណែងរបស់លោក បានយ៉ាងយូរជាងគេនៅអាស៊ី (និងជាប់លេខ៦ ក្នុងពិភពលោក ក្នុងការកាន់អំណាចយូរជាងគេ)។ មធ្យោបាយទាំងនោះ រាប់បញ្ចូលទាំងការប្រើប្រាស់អំពើហិង្សា ការគ្រប់គ្រងកងកម្លាំងប្រដាប់អាវុធ ការកេងបន្លំការបោះឆ្នោត ការប្រព្រឹត្តិអំពើពុករលួយ។ល។ រួមទាំងការវាយបំបាក់គូប្រកួត ឲ្យចុះទន់ខ្សោយផង៕
---------
» ការថ្លែងរបស់លោក កឹម សុខា ទាំងស្រុង៖