ហ៊ុន ម៉ាណែត ថាមេធាវីអាមេរិក ម័រតុន ក្លារ បំផ្លើស
- ដោយ: ដារា រិទ្ធ ([email protected]) - ភ្នំពេញ ថ្ងៃទី០៦ កញ្ញា ២០១៦
- កែប្រែចុងក្រោយ: September 07, 2016
- ប្រធានបទ: នយោាយ-កម្ពុជា
- អត្ថបទ: មានបញ្ហា?
- មតិ-យោបល់
-
យ៉ាងហោចណាស់ ក៏ប្រតិកម្មជាលើកដំបូង នៅលើបណ្ដាញសង្គម តាមរយៈទំព័រផ្ទាល់ខ្លួននេះ បានបង្ហាញថាលោក ហ៊ុន ម៉ាណែត បានទទួលស្គាល់ជាផ្លូវការ នូវករណីក្ដីក្ដាំ នៅក្នុងតុលាការក្រុង ឡូសអេនជឺឡេស ក្រោមពាក្យបណ្ដឹង របស់មេធាវីអាមេរិក លោក ម័រ តុន ក្លារ (Morton Sklar) ការពារក្ដីឲ្យលោក មាជ សុវណ្ណារ៉ា មន្ត្រីគណបក្សសង្គ្រោះជាតិ។ កូនប្រុសនាយករដ្ឋមន្ត្រីរូបនេះ ធ្លាប់បានបដិសេធដំណឹងនេះ ជាច្រើនដង ស្របពេលដែលមន្ត្រីរដ្ឋាភិបាលកម្ពុជាផ្សេងទៀត បានបដិសេធពីយុត្ថាធិការ របស់តុលាការអាមេរិក ថាមិនអាចកាត់ទោស លើ«ឥស្សរជនកម្ពុជា» ដូចលោក ហ៊ុន ម៉ាណែត ឡើយ។
នៅក្នុងប្រតិកម្មខ្លីមួយ នៅលើបណ្ដាញសង្គម លោក ហ៊ុន ម៉ាណែត ដែលមានថានៈជា នាយរងសេនាធិការចម្រុះ នៃកងយោធពលខេមរភូមិន្ទកម្ពុជា បានបដិសេធព័ត៌មាន ដែលអះអាងថាលោក ចាញ់ក្ដីនៅក្នុងសវនាការបថម ដែលធ្វើឡើងកាលពីថ្ងៃទី១ ខែកញ្ញានេះ នាតុលាការក្រុង ឡូសអេនជឺឡេស សហរដ្ឋអាមេរិក។ លោកចាត់ទុកថា ការថ្លែងឡើងរបស់លោក ម័រតុន ក្លារ មេធាវីតំណាងឱ្យដើមបណ្តឹង គឺជាការបំផ្លើសព័ត៌មាន ដោយលោកបានយកការអះអាង របស់លោក ចន ផូស៊ែល (John Purcell) មេធាវីការពារក្ដីឲ្យលោក និងលោក គ្រីស្តូហ្វើរ ប៊ើរ (Christopher Beres) អ្នកជំនាញច្បាប់អាមេរិក (?) មកពន្យល់។
កូនប្រុសច្បងរបស់លោក ហ៊ុន សែន ដែលតែងត្រូវបានចាត់ទុក ជាអ្នក«បន្តតំណែង»ជំនាន់ក្រោយនោះ បានដកស្រង់ការលើកឡើង របស់លោក គ្រីស្តូហ្វើរ ប៊ើរ តាមរយៈសារព័ត៌មាន ខ្មែរថាមស៍ (Khmer Times) មកបញ្ជាក់ថា៖ «ដើមបណ្តឹង មិនទាន់ឈ្នះក្តីនៅឡើយទេ។ ដើមបណ្តឹងបានអះអាង ទៅតុលាការអាមេរិកថា ដើមបណ្តឹងមិនមានអង្គហេតុណា ដើម្បីបញ្ជាក់ថា តុលាការមានសមត្ថកិច្ចឡើយ។ ដូចេ្នះសួរថា តើមេធាវីរបស់ដើមបណ្តឹងនេះ អាចដាក់ពាក្យបណ្តឹងដោយឆន្ទៈសុច្ចរិត ដោយរបៀបណា ប្រសិនគ្មានអង្គហេតុណាមួយដែលបញ្ជាក់ថាតុលាការមានសមត្ថកិច្ចផងនោះ។ មកដល់ពេលនេះ ដើមបណ្តឹងមិនបានបង្ហាញ អង្គហេតុណាមួយ ទៅតុលាការសហរដ្ឋអាមេរិក ដើម្បីអាចតម្រូវឱ្យ លោក ហ៊ុន ម៉ាណែត ត្រូវចូលខ្លួនទៅតុលាការ ដើម្បីឆ្លើយតបទៅនឹងបណ្តឹង ដែលបានដាក់នោះ។»។
» កិច្ចសម្ភាសមួយ រវាងអ្នកស្រី យ៉ុង ខេមរា ជាមួយលោក ចន ផូរស៊ែល ដែលលោក ហ៊ុន ម៉ាណែត យកមកបង្ហោះនៅលើទំព័ររបស់លោក៖
បើតាមការអះអាង របស់លោក ម័រតុន ក្លារ មេធាវីតំណាងឲ្យលោក មាជ សុវណ្ណារ៉ា (ភាគីដើមបណ្ដឹង) ដែលបានធ្វើឡើង នៅក្រោយសវនាការបថម នាក្រុង ឡូសអេនជឺឡេស គ្រាន់តែបាននិយាយថា ក្រុមរបស់លោកបានឈ្នះក្នុងជំហាន«ដំបូង» ឬជំហានទីមួយ ដោយសារតែតុលាការមិនទម្លាក់ចោលពាក្យបណ្ដឹងនេះ តាមការស្នើសុំរបស់មេធាវីចុងចោទ ដែលនិយាយថា តុលាការអាមេរិកមួយនេះ មិនមាន«យុត្ថាធិការ»មកលើពាក្យបណ្ដឹង របស់លោក មាជ សុវណ្ណារា នោះប៉ុណ្ណោះ។ ប៉ុន្តែ គេមិនបានស្ដាប់ឮថា លោកមេធាវី ឬក្រុមដើមបណ្ដឹង ដូចយ៉ាងអ្នកស្រី ចេមី មាជ (ភរិយាលោក មាជ សុវណ្ណារ៉ា) ប្រកាសថា ពួកខ្លួនបានឈ្នះក្ដី«ទាំងស្រុង»នោះឡើយ ដោយករណីនេះត្រូវមាននីតិវិធី និងដំណើរការស៊ើបអង្កេតវែងឆ្ងាយទៀត។
» អានអត្ថបទ ដែលមេធាវីការពារក្ដីលោក មាជ សុវណ្ណរ៉ា និយាយពីលទ្ធផល នៃសវនាការបថមក្នុងតុលាការក្រុង ឡូសអេនជឺឡេស ដោយចុចនៅលើនេះ។
លោក អ៊ុច សុខខាំបូ សហមេធាវីការពារក្ដីឲ្យលោក មាជ សុវណ្ណរ៉ា ក្នុងតុលាការក្រុង ឡូសអេនជឺឡេស បានលើកឡើងក្នុងកិច្ចសម្ភាសមួយ ជាមួយវិទ្យុអាស៊ីសេរីថា ប្រសិនជាតុលាការ បានអនុញ្ញាតឲ្យខាងភាគីដើមបណ្ដឹង បន្តការស៊ើបអង្កេត និងរកភស្ដុតាងដាក់បន្ទុកនោះ វាបញ្ជាក់ច្បាស់ថា វាគឺជាការច្រានចោល នូវការជំទាស់ (និងការសុំឲ្យបញ្ចប់សំនុំរឿង) ពីសំណាក់ភាគីចុងចោទ (ភាគីលោក ហ៊ុន ម៉ាណែត ដែលតំណាងដោយលោក ចន ផូរស៊ែល) ដែលបានលើកឡើងប្រាប់ចៅក្រម ថាតុលាការក្រុង ឡូសអេនជឺឡេស មិនមានយុត្ថាធិការ សម្រាប់បណ្ដឹងខាងលើនេះទេ៕
» នេះជាការលើកឡើង របស់លោក អ៊ុច សុខខាំបូ នៅតាមបណ្ដាញសង្គម៖