សង្គ្រាមប្រឆាំងការជួញដូរគ្រឿងញៀន ត្រូវតែបញ្ចប់ទៅ ដោយការបោសសំអាត គ្មានសល់អ្វី។ ហើយការ​អះ​អាង ដែលថាសង្គ្រាមនេះ មានរយៈពេលត្រឹមតែ៦ខែ ដូចជាងាយពេកហើយ។ នេះជាការសញ្ជឹងគិត របស់​លោក រ៉ូឌ្រីចូ ឌុយតែតេ (Rodrigo Duterte) ប្រធានាធិបតីជាប់ឆ្នោតថ្មី របស់ប្រទេសហ្វីលីពីន។ ដោយសារ​ហេតុ​នេះ​ហើយ ទើបលោកបានប្រកាស ឲ្យមានការពន្យាពេល ចំនួន៦ខែបន្ថែមទៀត ដើម្បីបង្ហើយ​យុទ្ធនាការ​របស់​លោក។

លោក ឌុយតែតេ បានថ្លែងឡើងថា៖ «ទោះជាខ្ញុំចង់យ៉ាងណាក៏ដោយ តែខ្ញុំមិនសម្លាប់​ពួកវា​ទាំង​អស់​​បាន​​ទេ។ នៅ​មុនខ្ញុំក្លាយជាប្រធានាធិបតី ខ្ញុំមិនបានគិតថា ការគម្រាមដែលកើតឡើង ពីថ្នាំញៀន សម្រាប់​សាធារណ​រដ្ឋ (ហ្វីលីពីព) មានកម្រិតដល់ថ្នាក់នេះឡើយ។»។

បន្ទាប់ពីបានជាប់ឆ្នោត ជាប្រធានាធិបតី កាលពីថ្ងៃទី៣០ ខែមិថុនាកន្លងទៅរួច លោក រ៉ូឌ្រីចូ ឌុយតែតេ បាន​បើក​យុទ្ធនាការទម្រង់តឹងមួយ ប្រឆាំងនឹងការជួញដូរគ្រៀងញៀន។ ប្រធានធិបតីរូបនេះ ថែមទាំង​បាន​ប្រកាស ប្រគល់​អំណាច និងប្រាក់រង្វាន់ ទៅឲ្យភ្នាក់ងារនគរបាលណាក៏ដោយ ដែលបានសម្លាប់ជនសង្ស័យ ដែល​ខ្លួន​រក​ឃើញ។

យុទ្ធនាការនេះ បានប្រែក្លាយ ទៅជា«សង្គ្រាម»​សម្រាប់​ប្រហារ​ជីវិត​មនុស្ស នៅក្រៅប្រព័ន្ធច្បាប់ ដោយគ្រាន់​មនុស្ស​នោះ រងការសង្ស័យថា មានជាប់ទាក់ទងនឹងបណ្ដាញថ្នាំញៀន។ ក្រុមមនុស្សជាច្រើន បានប្រើប្រាស់​ហេតុ​ផល​នេះ ដើម្បីធ្វើការជម្រះបញ្ជី និងសម្លាប់នរណា ដែលគេចង់សម្លាប់។

នៅក្នុងរយៈពេល២ខែដំបូង នគរបាលបាននិយាយថា បានប្រហារជីវិតជនសង្ស័យ ប្រមាណជា​១១០០នាក់ ខណៈ​មនុស្ស​ជាង ២០០០នាក់ផ្សេងទៀត បានស្លាប់ក្រោមស្នាដៃ​មនុស្ស​ជា​ក្រុម ដែលប្រកាសខ្លួន ថាជា​«ប្រជា​ការពារ» និង​ដែល​ទទួល​បានបញ្ជា ពីលោកប្រធានាធិបតី ឌុយតែតេ៕