ព្រឹទ្ធសភា​​ដក​​អភ័យ​ឯក​សិទ្ធិ​ ថាក់ ឡានី ខណៈ​​អ្នកស្រី​បាន​ចេញ​ពី​កម្ពុជា

ដូចការព្រាងទុក។ ព្រឹទ្ធសភានៃប្រទេសកម្ពុជា ដែលមានតែ​សមាជិក​ចូលរួមប្រជុំ មកពីគណបក្សប្រជាជន​កម្ពុជា​ប៉ុណ្ណោះ​​នោះ បាន​សម្រេចជាស្ថាពរ លើកអភ័យឯកសិទ្ធិព្រឹទ្ធសភា របស់អ្នកស្រី ថាក់ ឡានី នៅព្រឹក​ថ្ងៃទី១ ខែកញ្ញា នេះ។ ប៉ុន្តែដំណឹង​មួយផ្សេងទៀត បានអះអាងថា អ្នកស្រី ថាក់ ឡានី បាន​ចាក​ចេញ​ពី​ប្រទេស​កម្ពុជា រួចទៅ​ហើយ។
ព្រឹទ្ធសភា​​ដក​​អភ័យ​ឯក​សិទ្ធិ​ ថាក់ ឡានី ខណៈ​​អ្នកស្រី​បាន​ចេញ​ពី​កម្ពុជា
អ្នកស្រី ថាក់ ឡានី សមាជិកព្រឹទ្ធសភា មកពីគណបក្ស សម រង្ស៊ី។ (រូបថតលើហ្វេសប៊ុក)
Loading...
  • ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី០១ កញ្ញា ២០១៦
  • កែប្រែចុងក្រោយ: September 01, 2016
  • ប្រធានបទ: នយោបាយ-កម្ពុជា
  • អត្ថបទ: មានបញ្ហា?
  • មតិ-យោបល់

ព្រឹទ្ធសភាពេញអង្គ ដែលមានការចូលរួមប្រជុំ ក្នុងព្រឹកថ្ងៃទី០១ ខែកញ្ញា តែសមាជិកមកពីគណបក្ស​ប្រជាជន​កម្ពុជា​នោះ បានសម្រេចដកអភ័យឯកសិទ្ធិ របស់អ្នកស្រី ថាក់ ឡានី ហើយ។ ជាការសម្រេច ដោយឯកច្ឆន្ទ ក្នុង​​សម្លេង​៤៦ លើ៤៦ និងគ្មានសម្លេងប្រឆាំងឡើយ ដោយហេតុថា សមាជិក​ព្រឹទ្ធសភាទាំងអស់​ ពី​​ខាង​​គណបក្ស​​សម រង្ស៊ី បានធ្វើពហិការ ​មិន​ចូលរួម​ប្រជុំនៅព្រឹកនេះទេ។

ប៉ុន្តែដំណឹងផ្សេងទៀត បានទម្លាយឲ្យដឹងថា អ្នកស្រី ថាក់ ឡានី បានចាកចេញពីប្រទេសកម្ពុជា ដើម្បី​ទៅ​ពិនិត្យ​ជំងឺ​បាត់​ហើយ។ នេះ បើទោះជាមានការព្រមាន ពីសំណាក់លោកនាយករដ្ឋមន្ត្រី ហ៊ុន សែន កាលពី​ពេល​កន្លង​មក ហាមអ្នកស្រីដោយមិនបញ្ចេញឈ្មោះ មិនឲ្យចាកចេញ​ពីប្រទេសនោះ​ក៏ដោយ។ ហើយអ្នក​ដែល​ទម្លាយ​ដំណឹងនេះ តាមរយៈវិទ្យបារាំងអន្តរជាតិនោះ គឺលោក ទាវ វណ្ណុល ដែលជា​សមាជិក​ព្រឹទ្ធសភា រួម​​គណបក្ស​ជា​មួយ​អ្នកស្រី ថាក់ ឡានី ផ្ទាល់តែម្ដង។

អ្នកស្រី ថាក់ ឡានី ត្រូវ​បានលោក ហ៊ុន សែន ​ប្ដឹង​កាល​ពី​ដើម​ខែ​សីហា ជុំវិញការថ្លែងមួយរបស់អ្នកស្រី ដែល​លោក​នាយករដ្ឋមន្ត្រី ចាត់ទុកជាការ​ចោទ​ប្រកាន់​រូប​លោក​​ ថានៅ​ពី​ក្រោយ​ខ្នង​ នៃ​ឃាតកម្ម​កណ្ដាលរាជធានី​ភ្នំពេញ សម្លាប់​​លោក កែម ឡី​​ កាលពី​ថ្ងៃ​ទី ១០ ខែកក្កដា​។ នៅក្នុងពាក្យបណ្ដឹងនោះ លោក ហ៊ុន សែន បាន​ស្នើ​សុំ​​​ឱ្យ​តុលាការ​​ផ្ដន្ទាទោស​អ្នក​ស្រី​ ថាក់​ ឡានី តាម​ផ្លូវ​ច្បាប់ និង​ទាម​ទារ​សំណង​ជំងឺ​ចិត្ត ចំនួន ១០០រៀល។

តបនឹងបណ្ដឹងនោះ អ្នកស្រី ថាក់ ឡានី បានអះអាងថា ពាក្យសំដីដែលគេឮ នៅតាមបណ្ដាញសង្គមនោះ គឺ​ជា​សមិទ្ធផល​មួយ កើតឡើងពីការកាត់តសម្លេង​ពិតប្រាកដ របស់អ្នកស្រី។

សម្រាប់លោក ទាវ វណ្ណុល វិញ បានថ្លែងឲ្យដឹងដែរថា រូបលោកផ្ទាល់​បានព្យាយាម​រារាំង និង​សម្រប​សម្រួល​ នៅ​ក្នុង​កិច្ច​ប្រជុំ គណៈកម្មាធិការ​អចិន្ត្រៃយ៍​នៃ​ព្រឹទ្ធសភា កាលពីព្រឹកម្សិលម៉ិញ ឲ្យ​លើក​ចេញ​នូវ​របៀប​វារៈ ដក​អភ័យ​ឯកសិទ្ធិ អ្នក​ស្រី ថាក់ ឡានី ពី​ក្នុង​សម័យ​ប្រជុំ​ព្រឹទ្ធសភា​នៅ​ថ្ងៃ​នេះ។ លោក វណ្ណុល បានស្នើឲ្យអ្នកស្រី ឡានី  សុំទោស​លោក​ ហ៊ុន សែន ​ជា​សាធារណៈ ដើម្បី​បញ្ចប់​បណ្តឹងខាងលើ។ ប៉ុន្តែការព្យាយាម កាល​ពី​ម្សិល​ម៉ិញ របស់​សមាជិកព្រឹទ្ធសភា មកពីគណបក្សប្រឆាំងរូបនេះ ទំនងជាមិនទទួលបាន លទ្ធផលតាម​ការ​រំពឹង​ទុក​នោះ​ទេ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...