ហ៊ុន សែន និមន្តព្រះសង្ឃ ប៊ុត ប៊ុនតិញ ឲ្យរួមពិធី«ការពារបរិស្ថាន»
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី២០ សីហា ២០១៦
- កែប្រែចុងក្រោយ: August 20, 2016
- ប្រធានបទ: នយោបាយ-បរិស្ថាន
- អត្ថបទ: មានបញ្ហា?
- មតិ-យោបល់
-
ព្រះសង្ឃ ប៊ុត ប៊ុនតិញ បានស្រង់មតិមួយចំនួន មកបញ្ជាក់ក្នុងថេរដីកាថា វេទិកា«ការការពារ និងការអភិវឌ្ឍន៍ធនធានធម្មជាតិ» រៀបចំឡើងដោយក្រសួងបរិស្ថាន ដែលបាននិមន្តអញ្ជើញព្រះអង្គ ឲ្យចូលរួមក្នុងវេទិកានោះ មានលក្ខណៈ«នយោបាយ»។ នេះបើតាមអ្វី ដែលគេអានបាន នៅក្នុងសំណេរមួយ លើគណនីហ្វេសប៊ុករបស់ព្រះអង្គ ប៊ុត ប៊ុនតិញ អមទៅនឹងលិខិតអញ្ជើញ របស់ក្រសួងបរិស្ថាន ដែលព្រះអង្គបានបង្ហោះ នៅមុននេះបន្តិច។
វេទិកា«ការការពារ និងការអភិវឌ្ឍន៍ធនធានធម្មជាតិ» នឹងប្រព្រឹត្តិទៅ នៅថ្ងៃទី២២ ខែសីហា ឆ្នាំ២០១៦ ពីរថ្ងៃខាងមុខនេះ នៅក្នុងសាលប្រជុំ«រំដួល» នៅវិមានសន្តិភាព។ ក្រសួងបរិស្ថាន ដែលជាអ្នករៀបចំវេទិកានេះ បានអញ្ជើញស្ថាប័នជាច្រើន ព្រមទាំងសកម្មជន និងអ្នកទទួលខុសត្រូវខាងបរិស្ថាន ជាច្រើននាក់/អង្គ ឲ្យចូលរួមក្នុងវេទិកានេះ ដូចយ៉ាងបានអញ្ជើញ កញ្ញា ធី សុវណ្ណថា ប្រធានអង្គការ «យុវជនកិច្ចការសង្គម» ជាដើម។
ក្នុងលិខិតអញ្ជើញ និមន្តព្រះសង្ឃ ប៊ុត ប៊ុនតិញ ព្រះប្រធានអង្គការព្រះពុទ្ធសាសនាដើម្បីសន្តិភាព និងជាស្ថានិកបណ្ដាញព្រះសង្ឃឯករាជ្យដើម្បីយុត្តិធម៌សង្គម ដែលចុះហត្ថលេខា នៅថ្ងៃទី៩ ខែសីហា ឆ្នាំ២០១៦ ដោយអគ្គនាយករដ្ឋបាល និងហិរញ្ញវត្ថុស្ដីទី លោក ជ្រិន សុខា បានបញ្ជាក់ដូចលិខិតអញ្ជើញកញ្ញា ធី សុវណ្ណថា ដែរថា ការអញ្ជើញនេះ ធ្វើឡើងក្រោមចំណារដ៏«ខ្ពង់ខ្ពស់» និងដោយផ្ទាល់ ពីសំណាក់លោក ហ៊ុន សែន តាំងពីថ្ងៃទី០១ ខែសីហា ឆ្នាំ២០១៦នោះមកម្លេះ។
ប៉ុន្តែបើតាមការអះអាង របស់វិទ្យុសម្លេងព្រះសង្ឃឯករាជ្យ បានបញ្ជាក់ថា ការអញ្ជើញនេះធ្វើឡើងដល់ទៅពីរដង៖ ម្ដង តាមរយៈលិខិតចុះថ្ងៃទី៩ ខែសីហាខាងលើ និងម្ដងទៀត តាមរយៈលិខិតចុះថ្ងៃទី១៨ ខែសីហា ដោយពន្យល់ថា ព្រះសង្ឃ ប៊ុត ប៊ុនតិញ អាចយកតំណាង ជាព្រះសង្ឃ៤អង្គ ដើម្បីចូលរួមពិធីនេះបាន។
សម្រាប់ជំហររបស់ព្រះសង្ឃ ប៊ុត ប៊ុនតិញ ដែលតែងរិះគន់នយោបាយសម្បទានដី និងនយោបាយអភិវឌ្ឍន៍ របស់រដ្ឋាភិបាលនោះ បានបង្ហាញការរារែក នៅពេលដំបូងឡើយ មិននិមន្តចូលរួមក្នុងវេទិកានេះទេ ដោយព្រះអង្គលើកពីមូលេហតុថា ព្រះអង្គត្រូវនិមន្តចេញទៅក្រៅប្រទេស តាមការនិមន្តជាមុន របស់ពុទ្ធបរិស័ទ្ធនៅទីនោះ។ ប៉ុន្តែនៅក្នុងសំណេរ នៅលើគណនីហ្វេសប៊ុកព្រះអង្គ ក្នុងថ្ងៃទី២០ ខែសីហានេះ ព្រះសង្ឃ ប៊ុត ប៊ុនតិញ បានប្ដូរជំហរវិញ ថាព្រះអង្គអាចនឹងនិមន្តចូលរួម ក្នុងវេទិកានោះ ដើម្បី៖
(១) ជជែកអំពីបញ្ហាមួយចំនួនទាក់ទិន នឹងការបំផ្លិចបំផ្លាញ បរិស្ថានធម្មជាតិដ៍ធ្ងន់ធ្ងរ នៅកម្ពុជាបច្ចុប្បន្ន ដែលក្រុមការងារព្រះអង្គបានរកឃើញ ក្នុងរយៈពេល៦ខែកន្លងមក ព្រមទាំងបញ្ហាប្រឈមនានា ក្នុងការបំពេញការងារ។
(២) ទាមទារឲ្យមានការប្តេជ្ញាការពារ ពីលោកនាយករដ្ឋមន្ត្រី និងអាជ្ញាធរដែលពាក់ពន្ធ ឲ្យអនុវត្តន៍នូវគោលនយោបាយការពារព្រៃឈើ និងធនធានធម្មជាតិ ដែលនៅសេសសល់ឲ្យគង់វង្ស។
ក្រុមអ្នកប្រើប្រាស់បណ្ដាញសង្គម បាននិយាយថា ការនិមន្តនេះ មានលក្ខណៈ«នយោបាយ» ច្រើនជាងលក្ខណៈ«បច្ចេកទេស» ដើម្បីសង្គ្រោះធនធានធម្មជាតិ នៅកម្ពុជា។ ប៉ុន្តែពួកគេសុទ្ធតែផ្ដល់យោបល់ ឲ្យព្រះសង្ឃ ប៊ុត ប៊ុនតិញ គួរតែនិមន្តចូលរួមក្នុងវេទិកានេះ បើទោះជាគេដឹងថា វិធានការទប់ស្កាត់ការកាប់បំផ្លាញ ព្រៃឈើ ឬធនធានធម្មជាតិ ក្រោមរដ្ឋាភិបាលរបស់លោក ហ៊ុន សែន ក្នុងពេលកន្លងមករងការរិះគន់ ថាមិនមានប្រសិទ្ធិភាពយ៉ាងណាក្ដី។ លោក ហ៊ុន សែន ខ្លួនលោក ថែមទាំងធ្លាប់សន្យាថា លោកនឹងកាត់ក របស់លោក ប្រសិនណាជាការទប់ស្កាត់ ការកាប់បំផ្លាញព្រៃ មិនថមថយទេនោះ។
នៅក្នុងរបាយការណ៍ «ប្រទេសសម្រាប់លក់» ឬ «COUNTRY FOR SALE» កម្រាសជាង៧០ទំព័រ របស់អង្គការ «Global Witness» ដែលចេញផ្សាយក្នុងខែកុម្ភៈ ឆ្នាំ២០០៩ បានរៀបរាប់ថា កម្ពុជាសព្វថ្ងៃជាប្រទេស សម្រាប់ពុះជ្រែកលក់ឲ្យបរទេស ដោយពួកអ្នកមានអំណាចនៅកម្ពុជា ជាពិសេសញាតិសន្ដាន ដែលនៅជុំវិញលោក ហ៊ុន សែន ដើម្បីប្រមូលទ្រព្យសម្បត្តិយ៉ាងច្រើនសន្ធឹកសន្ធាប់នោះ ដាក់ជាប្រយោជន៍ខ្លួនឯង។ ប្រយោជន៍ទាំងនោះ បានមកពីការកាប់ធនធានព្រៃឈើ ហើយនិងកំពុងច្បាមយកធនធានធម្មជាតិ របស់កម្ពុជាផ្សេងទៀត ដូចជាធនធានជលផល កោះ ឆ្នេរសមុទ្រ សម្រាប់ទេសចរណ៍ ធនធានឧស្ម័ន រ៉ែ និងប្រេងកាតជាដើម។
ប៉ុន្តែការលើកឡើង របស់អង្គការខាងលើ តែងត្រូវបានមន្ត្រីរដ្ឋាភិបាលខ្លួនឯងច្រានចោល។ លោក ហ៊ុន សែន ធ្លាប់បានហៅអង្គការ «Global Witness» ថាជាអង្គការ«ឆ្កួតលីលា»មួយ។ មន្ត្រីជាន់ខ្ពស់របស់រដ្ឋាភិបាល លោក ឱម យ៉ិនទៀង ក៏បានលើកឡើងដែរថា ការចោទប្រកាន់ទាំងនោះ ធ្វើឡើងដើម្បីបំផ្លាញកម្ពុជា។
យ៉ាងណា អ្នកប្រើប្រាស់បណ្ដាញសង្គមខ្លះទៀត បាននិយាយបរិហារចូលស៊ីជម្រៅ ពីការបើកវេទិកា «ការការពារ និងការអភិវឌ្ឍន៍ធនធានធម្មជាតិ» របស់ក្រសួងបរិស្ថាននេះ ថាជាឱកាសឲ្យលោក ហ៊ុន សែន សង្គ្រោះរូបភាព «នយោបាយ» របស់លោក ដោយការកោះអញ្ជើញក្រុមអ្នករិះគន់ ទៅ«អង្អែលក្បាល» បន្ទាប់ពីវិធានការបង្ក្រាប បានធ្វើឡើងយ៉ាងចាស់ដៃ ទៅលើបណ្ដាសកម្មជនបរិស្ថាន និងព្រៃឈើ ក្នុងពេលកន្លងមក៕