មេធាវីការពារ ថាក់ ឡានី ថាកូនក្ដីមានអភ័យឯកសិទ្ធិព្រឹទ្ធសភា
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី១៧ សីហា ២០១៦
- កែប្រែចុងក្រោយ: August 17, 2016
- ប្រធានបទ: អភ័យឯកសិទ្ធិ
- អត្ថបទ: មានបញ្ហា?
- មតិ-យោបល់
-
ការតតាំងគ្នាតាមផ្លូវច្បាប់ នៃការចោទប្រកាន់ ថាលោកនាយករដ្ឋមន្ត្រី ហ៊ុន សែន នៅក្រោយឃាតកម្ម បាញ់សម្លាប់លោក កែម ឡី កំពុងស្ថិតនៅលើដងផ្លូវដ៏វែងឆ្ងាយមួយ ពិបាកនឹងរកទិសដៅ។ ពិបាករកទិសដៅ ដោយសារភាគីចុងចោទមួយរូប ពីក្នុងចំណោមភាគីចុងចោទ នៃបណ្ដឹងដើមចោទចំនួនពីរ បានបដិសេធជាលើកទីពីរ មិនចូលខ្លួនទៅបំភ្លឺនៅតុលាការ តាមការកោះ នាព្រឹកថ្ងៃទី១៧ ខែសីហា ឆ្នាំ២០១៦នេះ ដោយបានអះអាងថា ភាគីចុងចោទកំពុងមានអភ័យឯកសិទ្ធិ ការពារដោយរដ្ឋធម្មនុញ្ញនៅឡើយ។
លោក សំ សុគង់ មេធាវីការពារក្ដី ឲ្យសមាជិកព្រឹទ្ធសភាគណបក្សសម រង្ស៊ី គឺអ្នកស្រី ថាក់ ឡានី ដែលកំពុងរងបណ្តឹង ពីលោកនាយករដ្ឋមន្ត្រី ហ៊ុន សែន នោះ បានថ្លែងថា ការស៊ើបសួររបស់តុលាការ មិនមែនជាបទល្មើសជាក់ស្ដែង ហើយតុលាការត្រូវអនុវត្តន៍តាមនិតិវិធី ដោយស្នើសុំទៅអង្គព្រឹទ្ធសភា ឲ្យកោះប្រជុំ ដើម្បីដកអភ័យឯកសិទ្ធិ ពីអ្នកស្រី ថាក់ ឡានី ជាមុនសិន។
លោក សំ សុគង់ បានថ្លែងឡើងថា៖ «ដើម្បីឲ្យមានការអនុវត្ដបានត្រឹមត្រូវ គឺត្រូវមានការប្រជុំពីព្រឹទ្ធសភា ដើម្បីព្យួរ ឬដកអភ័យឯកសិទ្ធ ទៅតាមនិតិវិធីច្បាប់ ហើយចាំឲ្យតុលាការដំណើរការនិតិវិធី តាមច្បាប់(តទៅ)ទៀត»។
តាមមាត្រា១០៤ នៃរដ្ឋធម្មនុញ្ញ បានចែងថា៖ «សមាជិកព្រឹទ្ធសភា មានអភ័យឯកសិទ្ធិសភា។ សមាជិកព្រឹទ្ធសភារូបណាក៏ដោយ មិនអាចត្រូវបានចោទប្រកាន់ចាប់ខ្លួន ឃាត់ខ្លួន ឬឃុំខ្លួន ដោយហេតុ ពីបានសំដែងយោបល់ ឬបញ្ចេញមតិ ក្នុងការបំពេញមុខងារ របស់ខ្លួនសោះឡើយ។ ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួនសមាជិកណាមួយ នៃព្រឹទ្ធសភា នឹងអាចធ្វើទៅកើត លុះត្រាតែមានការយល់ព្រម ពីព្រឹទ្ធសភា ឬពីគណៈកម្មាធិការអចិន្ត្រៃយ៍ របស់ព្រឹទ្ធសភា ក្នុងចន្លោះសម័យប្រជុំនៃព្រឹទ្ធសភា វៀរលែង តែក្នុងករណីបទល្មើសព្រហ្មទណ្ឌជាក់ស្ដែង។»
មាត្រានេះ បានចែងបន្តទៀតថា៖ «ក្នុងករណីចុងក្រោយនេះ ក្រសួងមានសមត្ថកិច្ច ត្រូវធ្វើសេចក្ដីរាយការណ៍ជូនព្រឹទ្ធសភា ឬជូនគណៈកម្មាធិការអចិន្ត្រៃយ៍ របស់ព្រឹទ្ធសភាជាបន្ទាន់ ដើម្បីសម្រេច។ សេចក្ដីសម្រេច របស់គណៈកម្មាធិការអចិន្ត្រៃយ៍ របស់ព្រឹទ្ធសភា ត្រូវដាក់ជូនសម័យប្រជុំព្រឹទ្ធសភាខាងមុខ ដើម្បីអនុម័តតាមមតិភាគច្រើនពីរភាគបី នៃសមាជិកព្រឹទ្ធសភាទាំងមូល។»។
កាលពីថ្ងៃទី១ ខែសីហា លោក គី តិច មេធាវីតំណាងឲ្យលោក ហ៊ុន សែន បានដាកពាក្យបណ្ដឹងមួយ ចូលមកសាលាដំបូងរាជធានីភ្នំពេញ ដើម្បីប្ដឹងលោក សម រង្ស៊ី និងអ្នកស្រី ថាក់ ឡានី ជុំវិញការចោទប្រកាន់លោកនាយករដ្ឋមន្ត្រី ថាបាននៅពីក្រោយឃាតកម្ម បាញ់សម្លាប់លោក កែម ឡី កាលពីថ្ងៃទី១០ ខែកក្កដា កន្លងមក។ ពាក្យបណ្ដឹងនោះ បានស្នើសុំទៅតុលាការ ឲ្យធ្វើការផ្ដន្ទាទោសភាគីចុងចោទ ទៅតាមច្បាប់ និងទាមទារសំណងជំងឺចិត្ត ក្នុងម្នាក់ ១០០រៀល។
ភ្លាមៗ នៅក្នុងថ្ងៃទី១ ខែសីហា ដដែលនោះ លោក លី សុផាណា ព្រះរាជអាជ្ញារងអមសាលាដំបូង និងជាអ្នកនាំពាក្យ បានចេញដីកាកោះភាគីចុងចោទទាំងពីរ ឲ្យចូលខ្លួនមកបំភ្លឺ ជុំវិញពាក្យបណ្ដឹងនេះ។ ប៉ុន្តែអ្នកស្រី ថាក់ ឡានី បានបដិសេធការចូលខ្លួននេះម្ដងហើយ កាលពីថ្ងៃទី៨ ខែសីហា ហើយតុលាការបានចេញដីកាកោះជាលើកទីពីរ បញ្ជាឲ្យចូលខ្លួន ក្នុងថ្ងៃទី១៧ ខែសីហានេះ។
លោក លី សុផាណ បានថ្លែងតាមប្រព័ន្ធ «Telegram» ថា ការមិនចូលខ្លួនតាមកាលបរិច្ឆេទ នៃការកោះហៅលើកទី២ អយ្យការអមសាលាដំបូង សម្រេចបន្តចំណាត់ការស៊ើបអង្កេត រឿងក្តីនេះទៀត ដោយពិនិត្យលើពាក្យបណ្តឹង ភស្តុតាង និងសាក្សី ដែលមានប្រយោជន៍ ដល់ចំណាត់ការរឿងក្តីនេះ។
ចំពោះការចោទប្រកាន់ខាងលើ ដែលលោក ហ៊ុន សែន បានលើកឡើងក្នុងបណ្ដឹង ដោយយោងលើវីដេអូ ទាក់ទងនឹងការថ្លែងរបស់អ្នកស្រី ថាក់ ឡានី ដែលត្រូវបានយកមកបង្ហោះ នៅតាមបណ្ដាញសង្គមនោះ ត្រូវបានសមាជិកព្រឹទ្ធសភារូបនេះ ច្រានចោល ដោយអះអាងថា សំដីអ្នកស្រីនៅក្នុងវីដេអូនោះ ត្រូវបានគេយកមកកាត់ត ខុសពីការពិត៕