ប្រសិនជាអ្នកផង បានសរសេរចម្រៀង កំណាព្យ ឬសារលិខិតមរណទុក្ខ ដើម្បីសម្ដែងការអាឡោះអាល័យ ចំពោះ​មរណភាព​របស់លោក កែម ឡី នោះ តែសម្រាប់កញ្ញា ឯក សុជាតា ហៅ សាសា វិញ បានជ្រើសរើស​រឿង​កំប្លែងខ្លីមួយ មកបង្ហោះផ្សាយ​។ រឿងខ្លីនោះ ទំនងជាអតីតពិធីការិនីទូរទស្សន៍រូបនេះ ចង់និយាយចំអក​ពីពូជផៅសន្ដាន និងបងប្អួនត្រកូលជាប់ខ្សែ ជាមួយជនសង្ស័យ «ជួប សម្លាប់» ដែលត្រូវ​បាន​អាជ្ញាធរកម្ពុជា ចាប់ខ្លួននៅក្រោយឃាតកម្មភ្លាមៗ ហើយបញ្ជូនទៅតុលាការនៅប៉ុន្មានថ្ងៃក្រោយមក។

នេះជាអត្ថន័យទាំងស្រុង នៃរឿងកំប្លែងខ្លី របស់អតីតតារាទូរទស្សន៍ មានឈ្មោះហៅក្រៅ សាសា ដែល​នាង​បាន​បង្ហោះ នៅលើគណនីហ្វេសប៊ុករបស់នាង ក្នុងថ្ងៃនេះ៖

-----------

ពេលនាំឃាតករមកសួរចម្លើយ...

ចៅក្រម: អ្នកឯងឈ្មោះអី?

ឃាតករ: ខ្ញុំឈ្មោះ ជួប សម្លាប់។

ចៅក្រម: ស្អី? ចុះឪពុកម្តាយឈ្មោះអី?

ឃាតករ: ឪពុកខ្ញុំឈ្មោះ ជួប សម្លុត ម្តាយឈ្មោះ ជួប សំឡេះ។

ចៅក្រម: វាមិនដែល... អ្នកឯងកុហកយើងទេដឹង?

ឃាតករ: នេះជាការពិតលោក។

ចៅក្រម: ចុះប្រពន្ធកូនឈ្មោះអី?

ឃាតករ: ប្រពន្ធឈ្មោះ ជួប សម្លឹង កូនខ្ញុំឈ្មោះ ជួប សុំលុយ។

ចៅក្រម: យីអើ!... ចឹងយើងសូមប្រាប់ថា: ថ្ងៃនេះលោកព្រះរាជអាជ្ញាឈ្មោះ ជួប ចោទ បានចោទ​ប្រកាន់​អ្នក​ឯង​មកដល់យើង ដោយមានលោកក្រឡាបញ្ជីឈ្មោះ ជួប កត់ ជាអ្នកកត់ត្រា យើងជាចៅក្រម​សើុបអង្កេត​ឈ្មោះ ជួប ឃុំ សម្រេចបញ្ជូនអ្នកឯង ទៅពន្ធនាគារឈ្មោះ ជួប គ្មានថ្ងៃចេញ ជាបណ្តោះអាសន្ន។

ឯណាលោក ជួប វ៉ៃខ្នោះ យកជនល្មើសចេញទៅ !!

ឃាតករ: វាមិនដែល...

--------------

សូមរំលឹកជូនថា លោក កែម ឡី អ្នកស្រាវជ្រាវផ្នែកសង្គម និងជាអ្នកធ្វើអត្ថាធិប្បាយ​នយោបាយ​ដ៏ល្បី​ឈ្មោះ ត្រូវ​​បាន​ជនប្រដាប់អាវុធ បាញ់សម្លាប់យ៉ាងព្រៃផ្សៃ នៅក្នុងហាង ស្តាម៉ាត នៃស្ថានីយឥន្ទនៈ កាល់តិច សាខា​បូកគោ កណ្ដាល​​រាជធានីភ្នំពេញ កាលពីថ្ងៃទី១០ ខែកក្កដា ឆ្នាំ២០១៦។ មកដល់ថ្ងៃនេះ ជនសង្ស័យ​តែ​មួយ​គត់ ដែល​ដាក់​រហស្សនាម​ខ្លួន ជួប សម្លាប់ ត្រូវបានឃាត់ខ្លួន និងចោទពីបទធ្វើឃាតកម្ម ដោយគ្រោង​ទុក​ជា​មុន។ រីឯ​សព​​លោក កែម ឡី វិញ ត្រូវបានដង្ហែ​ទៅកាន់​ស្រុក​កំណើត​របស់​លោក នាខេត្តតាកែវ កាល​ពីថ្ងៃ​ទី​២៤ ខែ​កក្កដា​ម្សិលម៉ិញ និងត្រូវបានទៅបញ្ចុះ ក្នុងថ្ងៃនេះ៕