រ៉ូស្ស៊ី៖ រកឃើញយន្ដហោះដែលបាត់ខ្លួន តែគ្មានអ្នកនៅរស់
- ដោយ: ឈូករ័ត្ន អត្ថបទ៖ ឈូករ័ត្ន ([email protected]) - ភ្នំពេញ ថ្ងៃទី០៤ កក្កដា ២០១៦
- កែប្រែចុងក្រោយ: July 04, 2016
- ប្រធានបទ: គ្រោះអគ្គិ
- អត្ថបទ: មានបញ្ហា?
- មតិ-យោបល់
-
ក្រុមអ្នកជួយសង្គ្រោះ បានរកឃើញតួយន្ដហោះនេះមកវិញ កាលពីរសៀលថ្ងៃអាទិត្យ បន្ទាប់ពីយន្ដហោះ បានបាត់ខ្លួនសូន្យឈឹង ពីប្រព័ន្ធត្រួតពិនិត្យផ្លូវអាកាស កាលពីព្រឹកថ្ងៃសុក្រសប្ដាហ៍មុន ខណៈយន្ដហោះបានហោះចេញ ដើម្បីចូលរួមក្នុងយុទ្ធនាការ ពន្លត់អគ្គិភ័យឆេះព្រៃដ៏សន្ធោសន្ធៅមួយ នាខេត្តស៊ីប៊េរី (Sibérie) ភាគខាងជើងនៃប្រទេសរ៉ុស្ស៊ី។ នេះបើតាមការប្រកាសឲ្យដឹង របស់ប្រភពផ្លូវការរ៉ូស្ស៊ី។
ប្រភពបានដឹងទៀតថា បុគ្គលិកដែលស្ថិតនៅលើយន្ដហោះ ទាំង១០នាក់ បានស្លាប់បាត់បង់ជីវិតទាំងអស់។
យន្ដហោះប្រភេទ «Ilyushin IL-76» នេះ ដែលជាយន្ដហោះដឹកជញ្ជូន នៅក្នុងវិស័យយោធារ៉ូស្ស៊ី ត្រូវបានកៃឆ្នៃឲ្យក្លាយជាយន្ដហោះ ពន្លត់អគ្គិភ័យឆេះព្រៃ។ អ្នកជួយសង្គ្រោះបានរកឃើញ កន្ទុយយន្ដហោះ នៅមានសភាពអាចនៅចំណាំបាន និងសាកសពបុគ្គលិក៤នាក់។ ក្រៅពីនេះ តួខ្លួនផ្សេងទៀតនៃយន្ដហោះ ត្រូវបានឆេះខ្លោចទាំងអស់។ ផ្សែង ដែលបណ្ដាលមកពីភ្លើងឆេះព្រៃ បានបង្កការរំខានដល់អ្នកជួយសង្គ្រោះ មិនអាចរកឃើញសាកសពរបស់បុគ្គលិក ផ្សេងទៀតនៅឡើយ។
ទីភ្នាក់ងារព័ត៌មានរ៉ូស្ស៊ី «Tass» បានស្រង់ប្រភពដែលស្និតនឹងការស៊ើបអង្កេត មកបញ្ជាក់ថា យន្ដហោះទំនងជាបានជួប នឹងខ្យល់ក្ដៅខ្លាំង ខណៈពេលដែលយន្ដហោះ កំពុងព្យាយាមបាញ់ម្សៅផ្សែង ដើម្បីពន្លត់ភ្លើងឆេះព្រៃ។ ខ្យល់ក្ដៅនេះ បានធ្វើម៉ាស៊ីនប្រតិកម្មរបស់យន្ដហោះ មិនអាចបង្កើតសម្ពាធ ដើម្បីរុញយន្ដហោះ ឲ្យហោះឡើងលើវិញបាន ទើបបណ្ដាលឲ្យយន្ដហោះ បានធ្លាក់មកលើដើមឈើទាំងឡាយ។ រូបភាពបង្ហាញពីទិដ្ឋភាព នៃកន្លែងដែលយន្ដហោះធ្លាក់៖
តាំងពីច្រើនសប្ដាហ៍មកហើយ តំបន់«Irkoutsk» នៃខេត្ត«Sibérie» របស់ប្រទេសរ៉ុស្ស៊ី បានរងអគ្គិភ័យឆេះព្រៃ ដែលបានបំផ្លាញព្រៃឈើ អស់ប្រមាណជា ៩០០០ហិចតា។ ជារៀងរាល់ឆ្នាំ ប្រទេសរ៉ូស្ស៊ី តែងបានស្គាល់នូវគ្រោះអគ្គិភ័យបែបនេះ រហូតដល់ទៅជាង ១៨ ០០០ដង។ មូលហេតុដែលបង្កឲ្យភ្លើងឆេះព្រៃនេះ ប្រមាណជា៨០% បណ្ដាលមកពីសកម្មភាពរបស់មនុស្ស ជាពិសេសបណ្ដាលមក ពីការដុតកំទេច ដើម្បីយកដីធ្វើការដាំដុះ៕