ការប្រកួតបានប្រព្រឹត្តិទៅ ក្នុងយប់ថ្ងៃអង្គារទី២៤ ខែមិថុនា នៅកីឡាដ្ឋាន «Chaudron» នៃក្រុង «Saint-Etienne» ភាគខាងត្បូងប្រទេសបារាំង ហើយនេះ​ជាលើកទីមួយ សម្រាប់ក្រុមជម្រើសជាតិ អាយឡេន ដែល​ធ្វើដំណើរ​ពីភាគខាងជើង កណ្ដាលសមុទ្រអាត្លង់ទិក មកចូលរួមក្នុងការប្រកួត ជាលក្ខណៈអន្តរជាតិដូច្នេះ។

ក្រុមព័រទុយហ្គាល់ បានរកបានគ្រាប់បាល់បានមុន នៅនាទីទី៣១ ដោយសារកីឡាករ «Nani» ប្រើ​ជើងឆ្កិះបាល់ ដែលបញ្ជូនមកពីស្លាបខាងស្ដាំ ដាក់​បញ្ចូលទីក្រុមអាយឡេន។ ប៉ុន្តែក្រុមបាល់ទាត់ មកពីកោះនៅភាគខាង​ជើង បាន​រក​​គ្រាប់​​បាល់​​ស្មើ​មក​វិញ នៅ​នាទី​ទី៥០ ដោយកីឡាករ «Birkir Bjarnason»។

គេត្រូវសរសើក្រុមអាយឡេន ដោយសារតែក្រុមនេះមានខ្សែការពារ ប្រៀបបាននឹងជញ្ជាំងដ៏ក្រាសមួយ នៅ​ចំពោះ​ការវាយលុករបស់ក្រុមព័រទុយហ្គាល់ ជាពិសេសទប់នឹងកម្លាំងជើង របស់កីឡាករ «Cristiano Ronaldo» ដ៏​ល្បី​ឈ្មោះ។

ជាលទ្ធផលចុងក្រោយ នៅក្នុងការប្រកួតទាំងពីរ នៅក្នុងជុំទីមួយ នៃវគ្គជម្រុះ នៅក្នុងពូល F៖ ក្រុមហុងគ្រី បាន​បីពិន្ទុ ក្រុមព័រទុយហ្គាល់ និងអាយឡេន បានមួយពិន្ទុ ខណៈក្រុមអូទ្រីសបានសូន្យពិន្ទុ។

» សូមទស្សនាវីដេអូ នៃការប្រកួតដោយសង្ខេបឡើងវិញ៖