ហ៊ុន សែន ហៅ​មេ​ដឹកនាំ​បរទេស ឲ្យ​ជួយ​ឈឺចាប់​រឿង​គេ​ចោទ​«ភរិយា​និង​កូន​យួន»

រឿងសិទ្ធិមនុស្ស រឿងប្រជាធិបតេយ្យ ឬរឿងដឹកនាំប្រទេស កុំខ្វល់! តែសូមមេដឹកនាំបរទេសទាំងនោះ មក​ចូលរួម​សំដែង​ការ​ឈឺចាប់ ជាមួយលោក ហ៊ុន សែន ក្នុងករណីដែលភរិយា និងកូនច្បងរបស់លោក គឺ​អ្នកស្រី ប៊ុន រ៉ានី និង​លោក ហ៊ុន ម៉ាណែត បាន​រង​ការ​ចោទ​ប្រកាន់ថា ជាភរិយា និងកូនលួចលាក់ របស់​អតីត​មន្ត្រី​​វៀតណាម​ម្នាក់។
ហ៊ុន សែន ហៅ​មេ​ដឹកនាំ​បរទេស ឲ្យ​ជួយ​ឈឺចាប់​រឿង​គេ​ចោទ​«ភរិយា​និង​កូន​យួន»
ពីឆ្វេងមកស្ដាំ៖ លោក ឡេ ឌឹកថូ អតីតមេទ័ពវៀតណាម និងលោក ហ៊ុន ម៉ាណែត កូនប្រុសច្បងរបស់លោក ហ៊ុន សែន។ (រូបថតឯកសារ និងរូបថត Lowell)
Loading...
  • ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី១២ ឧសភា ២០១៦
  • កែប្រែចុងក្រោយ: June 14, 2016
  • ប្រធានបទ: នយោបាយ-កម្ពុជា
  • អត្ថបទ: មានបញ្ហា?
  • មតិ-យោបល់

រវាងបញ្ហាជាតិ និងបញ្ហាជីវិតឯកជន តើបញ្ហាណាមួយសំខាន់ជាង ហើយតើគេត្រូវប្រមូលលូកឡំ បញ្ហាទាំងពីរ ដាក់លើតុជាមួយគ្នាឬ? ថាតើហេតុដូចម្ដេច បានជានាយករដ្ឋមន្ត្រីកម្ពុជា លោក ហ៊ុន សែន ខ្លួនលោក ចេះតែ​លើក​យក​រឿងឯកជន​របស់លោក មករំលឹកជាញយដងដូច្នេះ? នៅលើកនេះ លោក ហ៊ុន សែន មិនត្រឹម​តែ​សំដែង​​ការ​ឈឺចាប់​របស់លោក ទៅកាន់អ្នកគាំទ្ររបស់លោក ឬទៅកាន់ពលរដ្ឋខ្មែរនោះទេ តែលោកបាន​ទាំង​ហៅ មេដឹកនាំនានា​ក្នុងពិភពលោក មានទាំងអគ្គលេខាធិការ​អង្គការសហប្រជាជាតិ​ផង ឲ្យមកចូលរួម​ឈឺ​ឆ្អាល ក្នុង​រឿង​ប្រពន្ធ​កូនលោក​​នោះ​ទៀត។

នៅចំពោះការចោទប្រកាន់ភរិយា និងកូនច្បងរបស់លោក គឺអ្នកស្រី ប៊ុន រ៉ានី និងលោក ហ៊ុន ម៉ាណែត ថាជាភរិយា និងជាកូនលួចលាក់ របស់អតីតមេទ័ពវៀតណាម លោក ឡេ ឌឹកថូ នោះ លោក ហ៊ុន សែន បានសម្ដែងក្ដីឈឺចាប់ និងបានអះអាង ជាថ្មីម្ដងទៀតថា រឿងនេះ ត្រូវបានមេដឹកនាំ និងសកម្មជនគណបក្ស​សង្រ្គោះ​ជាតិ ប្រឌិតចោទប្រកាន់ឡើង។ លោកបានថ្លែងដូចនេះ នៅក្នុងពិធីប្រគល់សញ្ញាបត្រ​​ ដល់និស្សិតជ័យលាភី នៃ​សកល​វិទ្យាល័យ​ភូមិន្ទភ្នំពេញ កាលពីព្រឹក​ថ្ងៃ​ទី១៣ ខែមិថុនា ឆ្នាំ២០១៦នេះ នៅកោះពេជ្រ កណ្ដាល​រាជធានី​ភ្នំពេញ។

ការចោទប្រកាន់ ទៅលើអ្នកស្រី ប៊ុន រ៉ានី និងលោក ហ៊ុន ម៉ាណែត នេះ មិនមែនជាលើកដំបូង ឬទើប​នឹង​ធ្វើ​ឡើង ក្នុងពេលថ្មីៗនេះទេ។ តែករណីនេះ ត្រូវបានក្រុមអ្នកប្រើប្រាស់​​បណ្ដាញសង្គម និងអ្នកប្រើប្រាស់ប្លុក (Blog) ជាច្រើន យកមកបង្ហោះ និងធ្វើការប្រៀបធៀប តាំងពីច្រើនឆ្នាំមកហើយ។ ពួកគេបាន​យករូបថត​យ៉ាង​ហោច មនុស្ស​បួន​នាក់ ក្នុងនោះមានលោក ហ៊ុន សែន អ្នកស្រី ប៊ុន រ៉ានី លោក ហ៊ុន ម៉ាណែត និងលោក ឡេ ឌឹកថូ (Lê Đức Thọ) មកដាក់តំរៀបជិតៗគ្នា ជាមួយនឹងការធ្វើអត្ថាធិប្បាយថា លោក ហ៊ុន ម៉ាណែត ជា​កូន​ប្រុស​របស់​​អ្នកស្រី ប៊ុន រ៉ានី និងលោក ឡេ ឌឹកថូ តែមិនមែនជាកូនប្រុស របស់​អ្នកស្រី ប៊ុន រ៉ានី និង​លោក ហ៊ុន សែន នោះ​ទេ។

លោក ប៉ាង សុខឿន ម្ចាស់គណនីហ្វេសប៊ុក«សុវណ្ណភូមិខ្មែរ» ដែលល្បីល្បាញ ខាងការរិះគន់រដ្ឋាភិបាល​គណបក្ស​​ប្រជាជន​​កម្ពុជា​​មិន​សំចៃមាត់នោះ បានអះអាងថា គឺអតីតមេទ័ពអាមេរិក នៅឥណ្ឌូចិនមួយរូប ឈ្មោះ ម៉ាក អេស្មីត (Major, Mark A. Smith) ជាអ្នកបង្ហើបឲ្យដឹង ពីអាថ៌កំបាំងនេះ នៅលើគេហទំព័រមួយមួយ។ លោក ប៉ាង សុខឿន ថែមទាំងពន្យល់ទៀតថា អ្នកស្រី ប៊ុន រ៉ានី មិនហ៊ានប្ដឹងលោក ម៉ាក អេស្មីត នេះ ឡើង​ទៅ​តុលាការ​​នៅ​សហរដ្ឋអាមេរិក ពីបទបរិហាកេរ្តិ៍ទេ ដោយហេតុខ្លាចតុលាការបង្គាប់ ឲ្យ​ធ្វើការ​ត្រួត​ពិនិត្យ «ADN» និង​រក​ឃើញ​ការ​ពិត(?)។

ជនប្រឌិតរឿង ទៅលើគ្រួសារលោក ហ៊ុន សែន គឺជា«ឧក្រិដ្ឋជន»

បើទោះអ្នកផងដឹងថា វាគ្មានប្រភពណាផ្សេងទៀត ដើម្បីបញ្ជាក់ពីការលើកឡើងនេះក៏ដោយ តែសម្រាប់​លោក ហ៊ុន សែន វិញ វាជាការប្រមាថមួយ ដែលបុរសមានអំណាចរូបនេះ និយាយថា នឹងមិនអាចលើកលែង ឲ្យ​ក្រុម​ដែល​លោក​ថា បានប្រឌិតរឿងទាំងនេះ​ឡើង​នោះឡើយ។ លោក ហ៊ុន សែន ថែមទាំងបានហៅមេដឹកនាំ​បរទេស​នានា នៅក្នុងពិភពលោក មក​សួរ​ថា តើរឿង​បែបនេះ ជាសិទ្ធិបញ្ចេញមតិ ឬជាការមូលបង្កាច់​ត្រូវមាន​កំហុស?

នាយករដ្ឋមន្ត្រីកម្ពុជា​ បានថ្លែងឡើងជាសាធារណៈ នៅក្នុងឱកាសចែកសញ្ញាបត្រនោះថា៖ «ខ្ញុំផ្ញើសារនេះ ទៅ​អគ្គ​លេខាធិការ​អង្គការសហប្រជាជាតិ ទៅមេដឹកនាំគ្រប់ប្រទេស ទៅស្ថានទូតទាំងអស់ថា បើគេចោទ​ប្រពន្ធ​អ្នក​ឯង​ថា ជាស្រីខូច កូនអ្នកឯង មិនមែនជាកូនអ្នកឯង តើអ្នកឯងចាត់ទុករឿងនេះ ជាសិទ្ធិ​បញ្ចេញ​មតិ ឬ​ជា​ការ​មូល​​បង្កាច់​​ត្រូវមានកំហុស។ ខ្ញុំមិនអត់ឱនឲ្យទេ ខ្ញុំទាមទារឲ្យប្រើពាក្យឧក្រិដ្ឋជន។»

ការថ្លែងទាក់ទងនឹងជីវិតឯកជនខ្លួនឯង របស់លោក ហ៊ុន សែន បានធ្វើឡើងជាលើកទីពីរហើយ នៅក្នុង​រយៈ​ពេល​តែមួយខែប៉ុណ្ណោះ។ កាលពីថ្ងៃទី១២ ខែឧសភា ឆ្នាំ២០១៦កន្លងទៅ បុរសខ្លាំងកម្ពុជា ដែល​អង្គុយ​ក្នុង​តំណែង​ជា​នាយក​រដ្ឋមន្ត្រី តាំងពីជាង៣ទសវត្សន៍មកនោះ បានថ្លែងឡើងប្រហាក់ប្រហែលគ្នាដែរថា៖ «នេះ​ជា​រឿង​អាណោចអាធម ប៉ុន្តែខ្ញុំអត់នឹកថាពួកប្រឆាំង អាចធ្វើអំពើថោកទាបបែបនេះ។ ដូច្នេះ ខ្ញុំក៏ត្រូវប្រកាន់​ឥរិយាបថ​មួយ ដូចខ្ញុំ​បាន​និយាយ​ហើយ បើអ្នកឯងមិនឲ្យខ្ញុំសុខ ខ្ញុំក៏មិនឲ្យអ្នកសុខដែរ។ ថ្នាក់ដល់កម្រិតថា កូន​របស់​ខ្ញុំ​នេះ ប្រពន្ធខ្ញុំ​ជា​ប្រពន្ធ​របស់​មេដឹកនាំ វៀតណាម ណាមួយនោះ។»

នៅក្រោយពេលនោះភ្លាមៗ គណបក្សសង្គ្រោះជាតិ បានចេញសេចក្ដីថ្លែងការណ៍មួយ ដោយបដិសេធថា ខ្លួន​មិន​បាន​នៅ​ពី​ក្រោយ ឬជាអ្នកប្រឌិត ការចោទប្រកាន់ក្រុមគ្រួសាររបស់លោក ហ៊ុន សែន នោះទេ។ ហើយ​រហូតមកដល់ពេលនេះ មន្ត្រីគណបក្សប្រឆាំង និងសកម្មជន របស់អង្គការក្រៅរដ្ឋាភិបាលជាច្រើននាក់ ដែល​ត្រូវ​បានអាជ្ញាធរកម្ពុជា ចាប់ខ្លួនយកទៅឃុំ​ជាបន្ត​បន្ទាប់​ និងត្រូវបានរដ្ឋាភិបាលបរទេស រួមនឹងស្ថាប័ន​អន្តរជាតិ​​ជា​ច្រើន សម្ដែងប្រតិកម្មនោះ មិនមានករណីណាមួយ ត្រូវបានចោទប្រកាន់ ទាក់ទងនឹង​ករណី​ប្រឌិត​រឿង​វ៉ាវ​​គ្រួសារ​ឯកជន របស់លោក ហ៊ុន សែន នេះឡើយ។

«អង្វរឲ្យមេដឹកនាំបរទេសអាណិត...»

អតីតមន្ត្រីច្បាប់មួយរូប ពីប្រទេសកម្ពុជា លោក ព្រហ្ម គិត បានពន្យល់ការលើកឡើងច្រំដែលៗ របស់លោក ហ៊ុន សែន នេះ ថាមានចំណុចពីរយ៉ាង ដែលពលរដ្ឋខ្មែរត្រូវដឹង។ ទីមួយ លោក ហ៊ុន សែន ដែលកាន់​អំណាច​មក​យូរឆ្នាំ អាចមានបញ្ហាស្មុគ្រស្មាញច្រើន ហើយលោក ហ៊ុន សែន អាចនឹងវង្វេងវង្វាន់ ភ្លេចគិត​ពីអ្វី​ដែល​ខ្លួន​ត្រូវ និង​មិន​ត្រូវ​និយាយ ព្រោះករណីបែបនេះ បើលោកនិយាយតែមួយម៉ាត់ថា នាងចក់ និងកូនចែម ជាភរិយា និង​កូន​របស់​លោក​នោះ វាចប់ហើយ។

អ្នកវិភាគ តាមដានស្ថានការណ៍កម្ពុជារូបនេះ បានថ្លែងពន្យល់លើចំណុចទីពីរថា លោក ហ៊ុន សែន ចង់រុញ​ឲ្យ​ស្ថានការណ៍ ទាក់ទងនឹងការធ្វើទុក្ខបុកម្នេញ ទៅលើក្រុមប្រឆាំង ក្នុងរយៈពេលចុងក្រោយនេះ ឲ្យកាន់​តែ​មាន​ទំងន់​ឡើង និង​ឲ្យផ្អៀង​ទៅខាងលោក។ នាយករដ្ឋមន្ត្រីកម្ពុជា ចង់អង្វរឲ្យមេដឹកនាំបរទេសនានា ទទួល​យក​ការ​ឈឺចាប់ ក្នុងជីវិតឯកជនរបស់លោក ហើយងាកមកអាណិតលោកវិញ។ លោក ហ៊ុន សែន ចង់ប្រាប់​ទៅ​បរទេស​ថា បញ្ហាកម្ពុជា គ្រាន់តែជារឿង​កំប៉ិចកំប៉ុក​អង្ករ​កំប៉ុង ជារឿង​ឯកជន រវាងគ្រួសារលោក និងក្រុមអ្នកប្រឆាំង ដែល​មិន​គោរព​លោក​តែ​ប៉ុណ្ណោះ។

«បើគេចាត់ទុកប្រពន្ធលោកឯង សំផឹង...»

ប៉ុន្តែក្នុងនាមជាអ្នកវិភាគ ដូចយ៉ាងលោក ព្រហ្ម គិត នេះ ក៏ទំនងជាមិនរួចខ្លួនដែរ ព្រោះលោក ហ៊ុន សែន បាន​​ថ្លែង​​បន្ថែម​​ខ្លាំងៗ នៅក្នុងព្រឹកថ្ងៃដដែលនោះថា៖ «ពួកអ្នកវិភាគ បើគេចាត់ទុកប្រពន្ធលោកឯង ជាស្រី​សំផឹង​​ពី​​ពេល​​មុន តើ​លោក​ឯង​​ទទួល​យក​បាន​ (ឬ)ទេ?»។

នៅចំពោះសំដីនេះ លោក ព្រហ្ម គិត បានសម្ដែងការសោកស្ដាយ​ឡើង​ថា ស្រីសំផឹងក៏ជាស្រី និងក៏​ជា​​ពលរដ្ឋ​​មួយ​​រូប​​ដែរ។ លោកបានថ្លែងឡើងថា៖ «ធ្វើនាយករដ្ឋមន្ត្រី មានវ័យចំណាច់ប៉ុណ្ណេះហើយ តែបែរ​ជា​គ្មាន​ចិត្ត​ធ្ងន់ និង​​គ្មាន​​ការ​​យល់​​ដឹង សូម្បីតែអ្វីទៅ ជាអត្ថន័យពិតប្រាកដ នៃពាក្យ"ពលរដ្ឋ ដែលខ្លួនកំពុងដឹកនាំ"។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...