ប្រព័ន្ធផ្សព្វផ្សាយ របស់ក្រុមរដ្ឋអ៊ីស្លាម (ពាក្យអារ៉ាប់ហៅ Daech ពាក្យ​កាត់​​បារាំង​​ហៅ EI ពាក្យ​​កាត់​​​អង់គ្លេស​​​ហៅ ISIS) ជាពិសេសទីភ្នាក់ងារព័ត៌មានផ្លូវការ របស់ក្រុមនេះ ឈ្មោះ «Amaq» បានប្រកាសនៅថ្ងៃអាទិត្យថា ក្រុមស្ថាបនិកនិកាយ ស៊ូនីត (Sunnite) គឺជាអ្នកទទួលខុសត្រូវ នឹងការបាញ់សម្លាប់ ក្នុងរង្គសាលរាំរែកមួយ ស្ថិត​ក្នុងរដ្ឋផ្លរីដា ភាគខាងត្បូងសហរដ្ឋអាមេរិក។ ហេតុការណ៍នេះ បានធ្វើឲ្យមនុស្សយ៉ាងហោច ៥០នាក់​ស្លាប់ និង​៥៣នាក់ផ្សេងទៀត រងរបួស កាលពីយប់ថ្ងៃសៅរ៍ ទី១១ ខែមិថុនា ចូលមកថ្ងៃអាទិត្យទី១២ ខែមិថុនា​នេះ។

ទីភ្នាក់ងារ «Amaq» បានប្រកាសថា៖ «ការវាយប្រហារ ប្រដាប់ដោយអាវុធ ដែលមានមុខព្រួញ ទៅលើ​រង្គសាល នៃ​ជន​ស្រឡាញ់ភេទដូចគ្នាមួយ នៅក្នុងក្រុង អ័រឡេនដូ នៃរដ្ឋផ្លរីដា សហរដ្ឋអាមេរិក និង​ដែល​បាន​ធ្វើ​ឲ្យ​មនុស្ស​​ស្លាប់ ឬរបួស១០០នាក់នោះ ត្រូវបានដឹកនាំដោយយុទ្ធជន នៃក្រុមរដ្ឋអ៊ីស្លាម»។

ទូរទស្សន៍អាមេរិកជាច្រើន បានអះអាងដែរថា ជនសង្ស័យនៃការវាយប្រហារនេះ បានថ្លែងអួតអាង ថាខ្លួនជា​ជន​ស្ម័គ្រប្រយុទ្ធ (Jihadiste) របស់ក្រុមរដ្ឋអ៊ីស្លាម នៅក្នុងសារជាសម្លេង ដែលជននេះបានហៅទូរស័ព្ទ ទៅ​កាន់​លេខ ៩១១ ផ្នែកជួយសង្គ្រោះបន្ទាន់ នៅសហរដ្ឋអាមេរិក។

បើតាមទូរទស្សន៍ «NBC» ដែលបានស្រង់ប្រភព ចេញពីកងកម្លាំងនគរបាល បានអះអាងថា ជននេះបាន​ទូរស័ព្ទ ហៅទៅផ្នែកសង្គ្រោះបន្ទាន់អាមេរិក (ដែលមានលេខ ៩១១) នៅមុនប្រព្រឹត្តិឧក្រិដ្ឋកម្មរបស់ខ្លួន ដើម្បី​ប្រកាស​ថា ខ្លួនជាអ្នកស្មោះស្ម័គ្រនឹងប្រមុខដឹកនាំ របស់ក្រុមរដ្ឋអ៊ីស្លាម។

» ជនសង្ស័យ នៅក្នុងការបាញ់ប្រហារ៖

«វាពិតជាសកម្មភាព នៃភេរវនិយម»

អភិបាលរដ្ឋផ្លរីដា លោក «Rick Scott» បានប្រកាសនៅក្នុងសន្និសីទសារព័ត៌មានថា៖ «នៅពេលដែល​នរណា​ម្នាក់ ចូលទៅក្នុងរង្គសាលរបៀបនេះ បន្ទាប់មកបានបាញ់ និងសម្លាប់មនុស្សជាច្រើននាក់ ទោះជា​មនុស្ស​នោះ មាន​ជីវិតបែបណាក៏ដោយ និងធ្វើឲ្យរបួសមនុស្សជាច្រើនបែបនេះ វាពិតណាស់ថា ជា​សកម្មភាព​ដ៏​គួរ​ភ័យ​ខ្លាច»។

អាជ្ញាធរអាមេរិក បានបើកការស៊ើបអង្កេតមួយហើយ ទាក់ទងនឹងភេរវនិយម ប៉ុន្តែបានអះអាងក្នុង​ជំហាន​ដំបូង ថា​ជន​ខ្មាន់​កាំភ្លើង បានធ្វើការបាញ់ប្រហារនេះ ដោយខ្លួនឯង និងមានតែម្នាក់ឯងប៉ុណ្ណោះ៕