ឈាង វុន៖ រដ្ឋសភាកំពុងរងសម្ពាធពីសាធារណៈមតិ!
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី២៧ ឧសភា ២០១៦
- កែប្រែចុងក្រោយ: May 27, 2016
- ប្រធានបទ: នយោបាយ-កម្ពុជា
- អត្ថបទ: មានបញ្ហា?
- មតិ-យោបល់
-
បើគេមិនបានស្ដាប់ដោយផ្ទាល់ គេប្រាកដជាមិនជឿ ពីការសារភាពទាំងនេះទេ៖ រដ្ឋសភាកំពុងតែរងសម្ពាធ ពីសាធារណៈមតិ ដោយហេតុបណ្ដាល មកពីគណបក្សប្រឆំាង អ្នកវិភាគ និងសង្គមស៊ីវិលមួយចំនួន បានកំពុងធ្វើការមួលបង្កាច់។ នេះជាការថ្លែងដោយផ្ទាល់ របស់លោក ឈាង វុន តំណាងរាស្ត្រ និងជាអ្នកនាំពាក្យ ឲ្យក្រុមអ្នកតំណាងរាស្ត្រ របស់គណបក្សប្រជាជនកម្ពុជា ទាក់ទងនឹងព្រឹត្តិការណ៍ចុងក្រោយបំផុត ជាពិសេសជុំវិញការចាប់ចង ដែលបានធ្វើទៅលើសមាជិកព្រឹទ្ធិសភា លោក ហុង សុខហួរ - សមាជិកសភា លោក អ៊ុំ សំអាន និងករណីចុងក្រោយ ទៅលើសមាជិកសភា លោក កឹម សុខា ជាដើម។
មិនជឿ ដោយសារគណបក្សប្រជាជនកម្ពុជា ដែលបានកាន់អំណាចច្រើនទសវត្សន៍នៅកម្ពុជា បានគ្រប់គ្រងសឹងតែទាំងស្រុង ទៅលើប្រព័ន្ធផ្សព្វផ្សាយមួយភាគធំនៅកម្ពុជា មានទាំងវិទ្យុទូរទស្សន៍សារព៌ត៌មាន។ល។ ហើយគេនៅមិនទាន់និយាយដល់ ទំព័រហ្វេសប៊ុកផ្លូវការ របស់លោកនាយករដ្ឋមន្ត្រី ហ៊ុន សែន ដែលមានអ្នកតាមដាន រហូតដល់ទៅជាង ៤លាន Likes នោះផងទេ។ ដូច្នេះ សួរថា តើការ«មួលបង្កាច់» របស់គណបក្សប្រឆាំង អ្នកវិភាគ និងសង្គមស៊ីវិល«មួយចំនួន»នោះ ឈរលើមធ្យោបាយ និងមូលដ្ឋានអ្វី ទើបសូម្បីរដ្ឋសភា ដែលមានតំណាងរាស្ត្រ អ្នកគ្រប់គ្រង និងមន្ត្រីបម្រើការភាគច្រើនមកពីគណបក្សប្រជាជនកម្ពុជានោះ នៅតែត្អូញថា កំពុងរងសម្ពាធពីសាធារណៈមតិ?
មិនត្រឹមតែប៉ុណ្ណឹងទេ ព្រោះលោក ឈាង វុន ដែលជាសមាជិកជាន់ខ្ពស់មួយរូប ពីគណបក្សកាន់អំណាច បានអះអាងទៀត ទៅកាន់ក្រុមអ្នកយកព័ត៌មាន នៅវិមានរដ្ឋសភា ក្នុងព្រឹកថ្ងៃទី២៧ ខែឧសភានេះ ថា ការមូលបង្កាច់នោះ ត្រូវបានធ្វើឡើង ដោយខុសពីច្បាប់។ លោកបានពន្យល់លើករណីទាក់ទងលោក ហុង សុខហួរ លោក អ៊ុំ សំអាន និងលោក កឹម សុខាថា៖ «បទល្មើសជាក់ស្តែង អាជ្ញាធរមានសមត្ថកិច្ចអាចឃាត់ខ្លួនចាប់ខ្លួន ឃុំខ្លួនបានភ្លាមៗ ហើយធ្វើរបាយការណ៍ បញ្ជូនមករដ្ឋសភា ដើម្បីសម្រេចដោយមានការបោះឆ្នោត។ (...) មាត្រា៨០ រដ្ឋធម្មនុញ្ញចែងថា បើចាប់ខ្លួនតាមបទល្មើសធម្មតា មានការគំាទ្រ (ឲ្យដកអភ័យឯកសិទ្ធិសភា) ដោយសមាជិកសភា២ភាគ៣។ ប៉ុន្តែបើបទល្មើសជាក់ស្តែង គេចាប់ខ្លួនហើយ (ទើប) សុំមកសភាសម្រេចតែម្តង (តាមក្រោយ)។»។
ក្រុមមន្ត្រីគណបក្សប្រឆាំង អ្នកវិភាគ និងសង្គមស៊ីវិលមួយចំនួន បានបរិហារថា ការចាប់ខ្លួន ឬការប៉ុនប៉ងចាប់ខ្លួនមន្ត្រីគណបក្សប្រឆាំង បានធ្វើឡើងដោយរំលោភលើ មាត្រា៨០ នៃរដ្ឋធម្មនុញ្ញ ដែលជាច្បាប់កំពូល ស្ថិតនៅខ្ពស់ជាងក្រមព្រហ្មទណ្ឌ ឬក្រមនីតិវិធីព្រហ្មទណ្ឌ ឬច្បាប់កម្ពុជាណាទាំងអស់។ ប៉ុន្តែសម្រាប់ក្រុមមន្ត្រី មកពីគណបក្សកាន់អំណាច និងអាជ្ញាធររដ្ឋ ដែលគ្រប់គ្រងដោយគណបក្សកាន់អំណាច បានចាត់ទុកការបង្ហោះឯកសារកន្លងមក របស់មន្ត្រីគណបក្សប្រឆាំង នៅលើបណ្ដាញសង្គម និងការមិនចូលខ្លួនរបស់លោក កឹម សុខា តាមដីកាកោះរបស់តុលាការ គឺជាបទល្មើស«ជាក់ស្ដែង» ដែលអនុញ្ញាតឲ្យអាជ្ញាធរចាប់ខ្លួន ដោយមិនចាំបាច់ដកអភ័យឯកសិទ្ធិជាមុន។ ការបកស្រាយរបស់ក្រុមមន្ត្រីគណបក្សកាន់អំណាច និងអាជ្ញាធររដ្ឋ ត្រូវបានប្រព័ន្ធផ្សព្វផ្សាយក្នុងស្រុកជាច្រើន យកទៅចុះផ្សាយ ជាច្រើនលើកជាច្រើនសារថែមទៀត។
ដូច្នេះ គេឆ្ងល់ថា បើរដ្ឋាភិបាល អាជ្ញាធររដ្ឋ ដែលគ្រប់គ្រងដោយគណបក្សកាន់អំណាច ឬតុលាការ កំពុងធ្វើកិច្ចការរបស់ខ្លួន តាមច្បាប់ទម្លាប់ប្រកបដោយភាពត្រឹមត្រូវនោះ តើមានមូលហេតុអ្វី ដែលធ្វើឲ្យសាធារណៈមតិ ដាក់សម្ពាធលើរដ្ឋសភា? តើប្រជាពលរដ្ឋកម្ពុជាទាំងអស់ រួមនឹងស្ថានទូតបរទេស សហគមន៍អ៊ឺរ៉ុប ក៏ដូចជាស្នងការជាន់ខ្ពស់ ទទួលបន្ទុកសិទ្ធិមនុស្ស របស់អង្គការសហប្រជាជាតិផង សុទ្ធតែ«ត្រជៀកស» ជឿតាមការ«មួលបង្កាច់»របស់គណបក្សប្រឆំាង អ្នកវិភាគ និងសង្គមស៊ីវិលមួយចំនួនឬ?
យ៉ាងណា សម្រាប់ករណីលោក កឹម សុខា ដែលកើតឡើងចុងក្រោយបង្អស់នេះ លោក ឈាង វុន បានពន្យល់ថា បើទោះជារដ្ឋសភាគ្មានសិទ្ធិ ទៅលូកដៃចូលកិច្ចការផ្ទៃក្នុង របស់តុលាការក៏ដោយ តែរដ្ឋសភាកំពុងតាមឃ្លាំមើល ការអនុវត្តច្បាប់របស់តុលាការ មានភាពត្រឹមត្រូវឬយ៉ាងណា។ លោក ឈាង វុន បានលើកយកសេចក្ដីថ្លែងការណ៍ របស់អយ្យការអមសាលាដំបូងរាជធានី ដែលចេញផ្សាយកាលពីយប់ថ្ងៃព្រហស្បត្តិ៍ មកបញ្ជាក់ថា៖ «គួរតែលោក កឹម សុខា ចូលឆ្លើយជាសាក្សី តាមការអញ្ជើញរបស់តុលាការ នោះនឹងគ្មានបញ្ហាទំាងអស់ (ណ្នឹង) កើតឡើងនោះទេ ។ តាមការវិនិច្ឆ័យរបស់ខ្ញុំ ប្រសិនបើគាត់ចូលតុលាការនោះ នឹងគ្មានការចាប់ចងនោះទេ អត់មានសោះតែម្តង គឺគ្មានទឡ្ហីករណាមួយចាប់គាត់នោះទេ ក្នុងនាមគាត់ជាអ្នកតំណាងរាស្ត្រ។ ប៉ុន្តែកាលដែលគាត់មិនចូលរួមតាមកោះហៅ របស់តុលាការដំបូង ហើយរបាយការណ៍ដែលតុលាការចេញនោះ ផ្សាយនោះ ខ្ញុំយល់ថា តុលាការធ្វើការច្បាស់លាស់។»៕