បងប្រុសជនរងគ្រោះឆេះដុំដាក់ «ខេម» ដែលប្រកាសថាខ្លួនត្រូវ
- ដោយ: ដារី អត្ថបទ៖ ដាវី ([email protected]) - ភ្នំពេញ ថ្ងៃទី១៩ ឧសភា ២០១៦
- កែប្រែចុងក្រោយ: May 19, 2016
- ប្រធានបទ: តារា-គ្រោះចរាចរណ៍
- អត្ថបទ: មានបញ្ហា?
- មតិ-យោបល់
-
នៅចំពោះការឆ្លើយដ៏ខ្លី តែមានន័យវែង របស់តារាចម្រៀង ទៅនឹងសារព័ត៌មានក្នុងស្រុករួចមក នៅពេលនេះបងប្រុស របស់ជនរងគ្រោះ លោក លី ម៉ាត់លី បានជ្រើសរើស ការឆ្លើយតបទៅវិញ យ៉ាងជូរចត់។ ចម្លើយរបស់លោក ប៊ុន សុណារិន ហៅ ខេម បានធ្វើឡើងតាមទូរស័ព្ទ យ៉ាងដូច្នេះថា រថយន្តរបស់ភាគីជនរងគ្រោះ បានមកបុករថយន្តរបស់លោក ពេលលោករកកន្លែងហូបបបរ មុននឹងតារាចម្រៀងសម្លេងស្អករូបនេះ បានទម្លាក់ទូរស័ព្ទទៅវិញ។
ប៉ុន្តែចម្លើយនេះ បានដុតបញ្ឆេះលោក លី ម៉ាត់លី បងប្រុសរបស់ជនរងគ្រោះ លោក លី ការិន ដែលបានស្លាប់កៀបខ្លួន នៅក្នុងគ្រោះច្នាក់ចរាចរណ៍ កាលពីយប់ម៉ោងប្រមាណជា០០ និង៤០នាទី យប់រំលងអាធ្រាត ថ្ងៃទី១៧ ចូលមកថ្ងៃទី១៨ ខែឧសភា ឆ្នាំ២០១៦កន្លងមកនេះ នៅត្រង់ចំណុចមុខឃ្លាំងស្ថានីយ៍ប្រេងសូគីម៉ិច តាមបណ្តោយផ្លូវជាតិលេខ៥ ស្ថិតក្នុងសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។
សម្រាប់លោក លី ម៉ាត់លី និងគ្រួសារ វាជាការទទួលយកមិនបាន ដែលលោក ខេម ឆ្លើយយករួចខ្លួន ខណៈបងស្រីរបស់លោក ខេម បានចូលខ្លួនមកធ្វើការសម្រុះសម្រួល ក្រៅប្រព័ន្ធតុលាការ ជាមួយគ្រួសារជនរងគ្រោះ កាលពីថ្ងៃទី១៨ ខែឧសភាម្សិលម៉ិញ។ នេះបើតាមសារព័ត៌មានក្នុងស្រុក «Post News» ដែលចេញផ្សាយតាមបណ្ដាញអ៊ិនធើណែត។
បងប្រុសជនរងគ្រោះ បានរំលឹកហេតុការណ៍ នៃគ្រោះថ្នាក់ចរាចរណ៍នោះមកវិញថា គឺរថយន្ដលោក ខេម បានបើកលឿន និងជាអ្នកបង្កឲ្យប្អូនប្រុសលោកស្លាប់ តែមិនមែនប្អូនប្រុសរបស់លោក ជាអ្នកទៅបុករថយន្ដរបស់តារាចម្រៀង ទាំងតារាចម្រៀងគ្មានកំហុសអ្វីនោះឡើយ។ លោក លី ម៉ាត់លី បានបន្តទៀតថា បើលោក ខេម មិនប្រើសំដីឲ្យបានត្រឹមត្រូវទេនោះ គ្រួសាររបស់លោក នឹងធ្វើតាមច្បាប់ ហើយការសម្រុះសម្រួល ក្រៅប្រព័ន្ធតុលាការ ក៏មិនអាចបន្ដដំណើរទៅមុខដែរ។ ផ្ទុយទៅវិញ លោក ខេម ត្រូវក្លាហានទទួលស្គាល់ ចំពោះកំហុសឆ្គងនៅថ្ងៃកើតហេតុនោះ មិនមែនខ្លួននិយាយផ្សេង ឯបងស្រីខ្លួននិយាយផ្សឹងនោះឡើយ។
របាយការណ៍នគរបាល ដែលបង្ហើបឲ្យបានដឹង បានអះអាងថា ភាគីលោក លី ការិន (ជនរងគ្រោះ) បានបើករថយន្ដវេពេញថ្នល់ ហាក់ដូចជាស្រវឹង និងបានបើកចូលមកក្នុងចំណែកផ្លូវគេ។ រីឯសាក្សីដែលបានឃើញហេតុការណ៍ ក៏បានអះអាងដែរថា រថយន្ដលោក ខេម ក៏បានបើកយ៉ាងលឿន ហួសល្បឿនកំណត់នោះដែរ។ ការអះអាងពីល្បឿននេះ អាចបង្ហាញបាន តាមរយៈសភាពប៉ះទង្គិច រវាងរថយន្ដទាំងពីរ ដែលរួញផ្នែកខាងមុខចូលគ្នា សឹងតែទាំងស្រុង។
បើតាមសារព័ត៌មានដដែល បានបញ្ជាក់ថា បងស្រីរបស់លោក ខេម បានចូលខ្លួនទៅជជែក ជាមួយគ្រួសារជនរងគ្រោះ នៅដល់គេហដ្ឋានផ្ទាល់ ដើម្បីទទួលយកការទារសំណង និងបានចេញប្រាក់មួយចំនួន ដើម្បីធ្វើបុណ្យសព ធ្វើយ៉ាងណាកុំឲ្យគ្រួសារជនរងគ្រោះ ដាក់ពាក្យបណ្ដឹងផ្នែករដ្ឋប្បវេណី ទៅកាន់តុលាការ។ លោក លី ម៉ាត់លី បានបញ្ជាក់ថា ប្អូនលោកដែលស្លាប់នេះ ជាកូនពៅនៅក្នុងគ្រួសារ និងមិនទាន់មានប្រពន្ធកូននៅឡើយ។ ជាពិសេស លោកបានអះអាងទៀតថា នៅពេលគ្រោះថ្នាក់ ប្អូនលោកមិនបានទទួលទានស្រាទេ ព្រោះលោកបានអោនទៅហិតមាត់លោក នៅក្រោយពេលប្អូនលោក បានផុតដង្ហើមបន្តិច។ លោកបានឲ្យដឹងថា ក្រុមគ្រួសារលោក ជាអ្នកកាន់សាសនាអ៊ីស្លាម ដូច្នេះលោកមិននិយាយនូវពាក្យមិនពិតឡើយ៕