កូណេ វីលៀវ (Coney Williaws) ស្ត្រីដែលជាអ្នកកាន់ចង្កូតរថយន្ដម្នាក់ នៅក្រុងផ្លេនតាសិន (Plantation) ក្នុងរដ្ឋផ្ល័រីដ (Floride) នោះ បានរកឃើញ«អ្នកដំណើរមិនបានអញ្ជើញម្នាក់» នៅក្នុងរថយន្តរបស់នាង៖ សត្វទីទុយ ជាប់នៅក្នុង​ឃ្លុប​ខាងមុខនៃ​រថយន្ដរបស់នាង។

សត្វទីទុយ ជាប់នៅក្នុងឃ្លុប សម្លឹងមើលមកក្រៅ តាមសំណាញ់របាំងរថយន្ដខាងមុខ។ រូបចម្លងពីអេក្រង់វីដេអូ។

ស្ត្រីអ្នកកាន់ចង្កូតនេះ បើករថយន្ដធុន ៤X៤ របស់នាង ទៅកាន់ក្រុងផ្លេនតាសិន ក្នុងរដ្ឋផ្ល័រីដ។ ពេលនោះជាពេលយប់ ដែលងងឹកមើលអ្វីមិនឃើញ ហើយនាងបានជួបបុកនឹងសត្វអ្វីមួយ ដែលនាងបានគិតថា គ្រាន់តែជាសត្វស្លាប​តូចមួយ​ប៉ុណ្ណោះ។ ដោយហេតុនេះហើយ ទើបកូណេបានជ្រើសរើស ការបន្តដំណើររហូតដល់ទិសដៅ ហើយបានចតរថយន្ដ​របស់​នាង ទៅក្នុងចំណតរថយន្ដ ដោយមិនចាប់អារម្មណ៍ នឹងអ្វីទាំងអស់។

«អ្នកឯងមានអ្វីមួយ នៅក្នុងឃ្លុប ...»

ប៉ុន្តែរហូតមកដល់ព្រឹកស្អែកឡើង ទើបកូណេ បានដឹងថា នាងមិនបានបុកសត្វស្លាបតូចមួយនោះទេ។ គ្រួសារមួយ ដែល​ចតរថយន្ដនៅជាប់ នឹងរថយន្ដរបស់នាង បានទូរស័ព្ទហៅមកនាង ហើយនិយាយប្រាប់ថា «ចូរអ្នកកុំធ្វើអ្វីទាំងអស់ ព្រោះ​មានអ្វីមួយ នៅក្នុងឃ្លុបខាងមុខ នៃរថយន្ដរបស់អ្នក»។ បន្ទាប់ក្រោយមក ពួកគេនោះបានបន្តទៀតថា «ជាសត្វទីទុយ​មួយក្បាល»។ នាងកូណេ ភ្ញាក់ព្រើត «សត្វទីទុយ» !!??

សត្វទីទុយ នៅមានសុខភាពល្អ

នៅពេលនាងមកដល់ និងបានពិនិត្យដោយផ្ទាល់ភ្នែករបស់នាងនោះ ស្ត្រីជនជាតិអាមេរិកាំងរូបនេះ បានយល់និងឃើញ សត្វទីទុយមួយក្បាល មានភ្នែកមូលធំៗមួយគូ បញ្ចេញពន្លឺពណ៌លឿង កំពុងសម្លឺងមកនាងវិញ តាមសំណាញ់​របាំង​ខាងមុខ នៃរថយន្ដរបស់នាង។ នាងកូណេក៏បានហៅជាបន្ទាន់ ទៅកាន់ភ្នាក់ងារការពារសត្វ ដើម្បីសុំកិច្ចអន្តរាគមន៍។ នៅ​ពេលភ្នាក់ងារម្នាក់នោះមកដល់ គាត់បានបើកឃ្លុបរថយន្ដឡើង ហើយចាប់បីដោយថ្នមៗ សត្វទីទុយដ៏កំសត់ យក​ចេញ​មកក្រៅ។

មើលទៅ សត្វស្លាប មិនមានរងរបួសអ្វីឡើយ ហើយទំនងជានៅមានសុខភាពល្អដូចធម្មតា៕

សូមទស្សនាវីដេអូខាងក្រោម ដែលនិយាយពីព័ត៌មានដ៏ពិសេសនេះ៖

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី១០ ខែកុម្ភះ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ