ប្រសិនជាលោក កែម ឡី អ្នកស្រាវជ្រាវផ្នែកសង្គម តែងធ្វើការវិភាគ ទៅលើព្រឹត្តិការណ៍សង្គម និង​នយោបាយ​ថ្មីៗ​នោះ តែលោកក៏បានឆ្លៀតឱកាស ដើម្បីធ្វើការវិភាគ ទៅលើយុទ្ធសាស្ត្រ​ដ៏សំខាន់មួយចំនួន ដែលធ្វើ​ឲ្យ​​គណបក្ស​​ប្រជាជន​កម្ពុជា មានលទ្ធភាពនឹងឈ្នះឆ្នោត ហើយនៅបន្តកាន់អំណាច តទៅមុខទៀត។ នៅក្នុង​សំណេរ​​​មួយ នៅ​លើ​ទំព័រ​ផ្លូវការ​របស់​លោក អ្នកស្រាវជ្រាវរូបនេះ បានលើកឡើង​ជាសេចក្ដីផ្ដើម ថាលទ្ធភាព​នោះ​​អាច​​ទៅ​រួច លុះ​ត្រា​តែ​គណបក្ស​​កាន់​អំណាច​សព្វថ្ងៃ ធ្វើកំណែទម្រង់ ទៅលើវប្បធម៌បុគ្គល វប្បធម៌ស្ថាប័ន និង​​ភាព​​ជា​អ្នកដឹកនាំ​បើក​ចំហ តម្លាភាព គណនេយ្យភាព ទំនួលខុសត្រូវសង្គមខ្ពស់ តាមបែប​ប្រជាធិបតេយ្យ​ពិត និង​​ជំរុញ​​ឲ្យមាន​ការ​ចូលរួម ពី​សំណាក់​ពលរដ្ឋ ឲ្យបានពេញលេញ និងសកម្ម។

តែផ្ទុយទៅវិញ ក្នុងករណីមិនអាចផ្លាស់ប្តូរ (ឬកែទម្រង់) ខ្លួនឯងបានទេ នោះមានន័យថា គណបក្ស​មួយ​នេះ កំពុង​រង់ចាំ​ឲ្យគេផ្លាស់ប្តូរឲ្យ តាមរយៈការបោះឆ្នោតឬ តាមគោលការណ៍​ប្រជាធិបតេយ្យ។ ទស្សនាវដ្ដី​មនោរម្យ.អាំងហ្វូ សូម​ធ្វើការដកស្រង់​គំនិតយោបល់​របស់​លោក​ទាំងស្រុង ដែលសុទ្ធសឹងជា​​យុទ្ធសាស្រ្ត​​គួរ​​ធ្វើ​ជា​បន្ទាន់ យកមកផ្សាយដូចខាងក្រោម ៖

១) បង្កើតដៃគូថ្នាក់ជាតិ រវាងអង្គការសង្គមសុីវិល និងរដ្ឋាភិបាល និងចាប់ផ្តើមវិភាថថវិការដ្ឋយ៉ាងតិច ១០​ភាគ​រយ សម្រាប់អង្គការសង្គមសុីវិល ទៅអនុវត្តកម្មវិធីណា ដែលរដ្ឋមិនអាចបំពេញបាន។

២) វិភាគស្ថាប័នក្រសួង និងវិភាគមុខងារ ក្នុងការពិនិត្យលទ្ធភាព កាត់បន្ថយក្រសួងនៅត្រឹម១០ គណ:រដ្ឋមន្ត្រី​មក​ត្រឹម​២៣នាក់ និងកាត់បន្ថយការិយាធិបតេយ្យមកត្រឹមថ្នាក់ជាតិ ក្រុង និងសហគមន៍ ឬឃុំ ឬតែ៣កម្រិត ពី​ពលរដ្ឋ​​មក​ថ្នាក់ជាតិ។

៣) រៀបចំផែនការសាងសង់ផ្លូវ តាមខ្សែក្រវាត់ព្រំដែនជា ពិសេសព្រំដែនវៀតណាមមុនគេ។ លើកទឹកចិត្ត និង​ផ្តល់​ប្រាក់ខែគ្រប់គ្រាន់ ដល់កងកម្លាំងការពារព្រំដែន និងមន្រ្តីនានា។

៤) ដកដីសម្បទានសេដ្ឋកិច្ច និងតំបន់កោះទាំងអស់ ពីក្រុមហ៊ុន ដោយពិភាក្សាផ្តល់សំណងសមស្រប ដល់​ក្រុមហ៊ុន (ទាំងនោះ) រួចរៀបចំផែនការសំណង់រដ្ឋបាល តាមកោះទាំងអស់និង ផ្តល់លទ្ធភាពឲ្យពលរដ្ឋ​​រស់នៅ និង​រៀបចំ​តំបន់​ទេសចរណ៍ ជាលក្ខណគ្រួសារ ព្រមទាំងឱកាស (ដើម្បីប្រកប) កសិឧស្សាហកម្ម​ជា​​លក្ខណៈ​​គ្រួសារ។

៤) រៀបចំផែនការយុទ្ធនាការបញ្ជូនជនជាតិវៀតណាមដែល ចូលមកខុសច្បាប់ចេញឲ្យអស់ (ក្នុង)​​រយ:ពេល​៦ខែ ដោយគោរពតាមគោលការណ៍សិទ្ធិមនុស្ស និងយកគំរូតាមរដ្ឋាភិបាលថៃ ដែលធ្លាប់​បញ្ជូន​​ជនជាតិ​​ខ្មែរ​នៅ​​ឆ្នាំ​​២០១៤។

៥) រៀបចំបោះឆ្នោតជ្រើសរើសថ្នាក់ដឹកនាំរដ្ឋ និងស្ថាប័នគ្រប់ជាន់ថ្នាក់ ដោយផ្អែកលើគុណភាព និង​ប្រជា​ប្រិយ​​ភាព ប្រសើរ​ជាង​តាមខ្សែ សាច់ឈាម បក្ស និងទឹកប្រាក់។

៦) ដាក់បេក្ខភាពយុវជន ដែលមានសមត្ថភាព និងគុណភាពខ្ពស់ ក្នុងតំណែងរដ្ឋមន្ត្រី​៥០​ភាគរយ អភិបាលនៃ​គណ:អភិបាល​៥០ភាគរយ និងស្ថាប័នដ៏ទៃទៀត។ សមភាពយេនឌ័រ ត្រូវយកចិត្តទុកដាក់ខ្ពស់។

៧) ពិនិត្យលទ្ធភាពបេក្ខភាពនាយករដ្ឋមន្រ្តី ក្នុងដំណាក់កាលនេះ ដោយពិនិត្យលើសមត្ថភាព និង​គុណភាព​​ខ្ពស់ ដោយ​​មិន​​ចាំបាច់​គិត​ពីឋានានុក្រមក្នុងបក្ស ។ ការប្រកួតប្រជែង រកមនុស្សល្អ ស្អាតស្អំ ក្នុង​ចំណោម​អ្នក​ល្អ និង​ស្មោះត្រង់​ជា​ច្រើន​ទៀត ជាការចាំបាច់។

៨) រៀបចំពិធីផ្ទេរតំណែងនាយករដ្ឋមន្រ្តី ក្នុងអាណត្តិ ជាប្រវត្តិសាស្រ្ត ដោយកិតិ្តយស សេចក្តីថ្លៃថ្នូរ និង​មាន​ការ​ចូល​រួម ពី​គ្រប់​ភាគីរួមទាំងព្រះមហាក្សត្រ។

៩) រៀបចំផែនការកាត់បន្ថយភាពក្រីក្រ ជាលក្ខណគ្រួសារ ឲ្យបាន២០ភាគរយ ឬប្រមាណ​៥០០.០០០​​គ្រួសារ ដោយ​ដាក់​ឲ្យ​អង្គការសង្គមសុីវិលដេញថ្លៃ តាមរយៈផែនការអភិវឌ្ឍន៍ សេដ្ឋកិច្ចគ្រួសារ តាម​ភូមិ​​នីមួយៗ (និង​ដោយ) ផ្អែក​លើ​ទិន្ន័ន័យ​​ស្ថានភាពក្រីក្រ នៅថ្នាក់ក្រោមជាតិ របស់ក្រសួងផែនការ។

១០) យន្តការឯករាជ្យនានា ដូចជាគណកម្មការសិទ្ធិមនុស្ស អង្គភាពប្រឆាំងអំពើពុករលួយ អាជ្ញាធរ​​​សាវនកម្ម​​ជាតិ គណ:កម្មការ​ជាតិ​រៀបចំការបោះឆ្នោត និង ស្ថាប័នឯករាជ្យដ៏ទៃទៀត ត្រូវផ្តល់លទ្ធភាពឲ្យអង្គការ​​សង្គម​​សុីវិល​ចូលរួម​ជាសហប្រធាន និងក្រុមការងារដឹកនាំ សម្របសម្រួល។

១១) ផ្តល់ស្វ័យភាពពេញលេញ ទាំងប្រព័ន្ធពន្ធដារ ផែនការអភិវឌ្ឍន៍ ចំណូល ចំណាយ។ល។ ដល់​ថ្នាក់​ក្រោម​​ជាតិ។ ផ្តល់ឱកាស ឲ្យមានការប្រកួតប្រជែងក្នុងការដឹកនាំ និងអនុវត្តន៍ដែលមានក្រុមប្រឹក្សា ជា​យន្តការ​អភិបាល​កិច្ចល្អ និងពលរដ្ឋចូលរួម។

ក្រៅពីយុទ្ធសាស្ត្រ ទាំង១១ចំណុចនេះ លោក កែម ឡី បានអះអាងបន្ថែមថា លោកនៅមានចំណុច​ជា​យុទ្ធសាស្ត្រ​ ជាមួយ​នឹងភាពលំអិតជាក់លាក់ សកម្មភាព និងកត្តាវាស់វែងត្រឹមត្រូវដ៏ទៃទៀត ដែលអាច​ជា​ប្រយោជន៍ ​ទៅ​​ដល់​​គណបក្ស​កាន់អំណាច ឲ្យបន្តកាន់អំណាចទៅមុខវែងឆ្ងាយ។ លោកបានអះអាងថា លោក​អាច​​សរសេរ​យុទ្ធសាស្ត្រ​ទាំងនោះ ជូនគណបក្សប្រជាជនកម្ពុជាបាន ប្រសិន​ណា​ជា​គណបក្ស​មួយ​នេះ​ស្នើ​សុំ៕