«អាមេរិក មិនបាននៅពីក្រោយយុទ្ធនាការស្លៀកពាក់ខ្មៅទេ»
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី១១ ឧសភា ២០១៦
- កែប្រែចុងក្រោយ: May 11, 2016
- ប្រធានបទ: កម្ពុជា-អាមេរិក
- អត្ថបទ: មានបញ្ហា?
- មតិ-យោបល់
-
នៅក្នុងជំនួបមួយ ជាមួយលោក ប្រាក់ សុខុន រដ្ឋមន្ត្រីការបរទេសកម្ពុជា នៅព្រឹកថ្ងៃទី១១ ខែឧសភា ឆ្នាំ២០១៦នេះ ឯកអគ្គរដ្ឋទូតអាមេរិកប្រចាំកម្ពុជា លោក វីល្លៀម ហេត (William A. Heidt) បានថ្លែងបដិសេធ ថាសហរដ្ឋអាមេរិកមិនបានបញ្ជា ឬស្ថិតនៅពីក្រោយ យុទ្ធនាការស្លៀកពាក់ខ្មៅ ឬ«ថ្ងៃចន្ទពណ៌ខ្មៅ» របស់ក្រុមសមាគមអង្គការសង្គមស៊ីវិល កាលពីថ្ងៃចន្ទ ទី៩ ខែឧសភាកន្លងមកនេះទេ។ នេះបើតាមការអះអាង របស់លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានថ្លែងប្រាប់ក្រុមអ្នកសារព័ត៌មាន នៅក្រោយពីជំនួបនោះ។
លោក សុន្ទរី បានស្រង់សម្ដីរបស់ឯកអគ្គរដ្ឋទូត ដែលថ្លែងនៅចំពោះរដ្ឋមន្ត្រីការបរទេសកម្ពុជា មកអះអាងថា សហរដ្ឋអាមេរិកបានយល់យ៉ាងច្បាស់ថា អ្វីខ្លះដែលខ្លួនគួរធ្វើ អ្វីខ្លះដែលខ្លួនមិនគួរធ្វើ។ អ្នកនាំពាក្យបានថ្លែងឲ្យដឹងថា៖ «ឯកឧត្តមអគ្គរដ្ឋទូត បានបដិសេធដាច់ខាត គឺអាមេរិកអត់បានអំពាវនាវ ឱ្យធ្វើយុទ្ធនាការស្លៀកពាក់ពណ៌ខ្មៅ នៅរៀងរាល់ថ្ងៃចន្ទនោះទេ»។
ព្រឹត្តិការណ៍នៃ«យុទ្ធនាការស្លៀកពាក់ខ្មៅ» ត្រូវបានក្រុមសមាគមអង្គការសង្គមស៊ីវិលមួយក្រុម រៀបចំធ្វើកាលពីថ្ងៃចន្ទទី៩ ខែឧសភាកន្លងមក ដើម្បីទាមទារឲ្យដោះលែង មន្ត្រីការពារសិទ្ធិមនុស្សបួនរូប និងមន្ត្រីគ.ជ.ប មួយរូប ដែលត្រូវបានជាប់ឃុំជាបណ្ដោះអាសន្ន ពីបទសូកប៉ាន់សាក្សី។ ព្រឹត្តិការណ៍នេះ ត្រូវបានក្រុមអ្នកគាំទ្ររដ្ឋាភិបាល គាំទ្រគណបក្សប្រជាជនកម្ពុជា និងសារព័ត៌មានក្នុងស្រុកមួយចំនួន យកមកធ្វើអត្ថាធិប្បាយ ថាជាយុទ្ធនាការមួយ ដែលឈានទៅផ្ដួលរលំរដ្ឋាភិបាល របស់លោក ហ៊ុន សែន សព្វថ្ងៃ។ ក្រុមអ្នកធ្វើអត្ថាធិប្បាយ បានសង្ស័យថា អាមេរិកជាអ្នកនៅពីក្រោយយុទ្ធនាការនោះ បន្ទាប់ពីក្រុមសមាគមអង្គការទាំងនោះ បានចូលជួបជាមួយអគ្គរដ្ឋទូតអាមេរិក ក្នុងពិធីទទួលទានអាហារមួយ។
លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រីក៏បានថ្លែង នៅក្នុងកិច្ចសម្ភាសមួយ ទៅឲ្យសារព័ត៌មានក្នុងស្រុកដែរថា យុទ្ធនាការស្លៀកពាក់ខ្មៅនោះ ជានិមិត្តសញ្ញារបស់ក្រុមខ្មែរក្រហម និងរបស់ក្រុមភេរវនិយមរដ្ឋអ៊ីស្លាម។ លោក ស៊ីផាន បានលើកជាចម្ងល់ឡើងថា៖ «អ្នកខ្លះគេចោទថា (ក្រុមរដ្ឋអ៊ីស្លាម) ជាក្រុមដែលពួកអាមេរិកាំងបង្កើត។ ប្រហែលជាពួកអាមេរិកាំង បង្កើតពួកណ្នឹង (ក្រុមអង្គការសង្គមស៊ីវិល) ដែរឬទេ? ខ្ញុំឆ្ងល់។»។
ដោយឡែក លោក វីល្លៀម ហេត ផ្ទាល់ ក៏បានអះអាង ទៅកាន់អ្នកសារព័ត៌មានដែរថា សហរដ្ឋអាមេរិក ជាអ្នកគាំទ្រដល់អង្គការសមាគម សង្គមស៊ីវិល នៅក្នុងប្រទេសកម្ពុជា តាំងពីឆ្នាំ១៩៩៣មកម្ល៉េះ ហើយលោកថា ពួកគេបានធ្វើនូវរឿងល្អៗជាច្រើន សម្រាប់ប្រទេសកម្ពុជា។
ឯកអគ្គរដ្ឋទូត បានថ្លែងថា៖ «យើងបានជួយសង្គមស៊ីវិល ឲ្យបម្រើការងារនៅទីនេះ ប្រជាធិបតេយ្យ សិទ្ធិមនុស្ស ការអភិវឌ្ឍសេដ្ឋកិច្ច ហើយអ្វីដែលជាការពិតនោះ ភរិយារបស់ខ្ញុំបានកើត និងធំធាត់នៅស្រុកក្រគរ ខេត្តពោធិ៍សាត់ ដែលផ្ទះរបស់គាត់ស្ថិតនៅទឹកនោះ ហើយគាត់ជាអ្នកបម្រើការងារនៅ "NGO" មួយ ដើម្បីជួយយុវជនកម្ពុជា ឲ្យទៅសាលារៀន និងគេចចេញពីពលកម្មការងារ ដូច្នេះ "NGO" គឺជាសង្គមស៊ីវិលនៅកម្ពុជា ដែលបានជួយអ្វីល្អៗ ច្រើនយ៉ាងណាស់ក្នុងសង្គម។ ហេតុដូច្នេះ ទើបនិយាយពីដើមមកថា យើងគាំទ្រចំពោះសង្គមស៊ីវិល។ ខ្ញុំសង្ឃឹមថាពួកគេនឹងបន្ត ការងារបែបនេះទៀត ដោយក្នុងនោះ រួមមានទាំងបុគ្គលិកមួយក្រុមរបស់អង្គការ អាដហុក នោះផងដែរ។»៕