«កឹម សុខា សុខចិត្តធ្វើពលិកម្ម តែមិនចូលទៅតុលាការទេ»
- ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី១០ ឧសភា ២០១៦
- កែប្រែចុងក្រោយ: May 10, 2016
- ប្រធានបទ: យុត្តិធម៌-កម្ពុជា
- អត្ថបទ: មានបញ្ហា?
- មតិ-យោបល់
-
ធ្វើពលិកម្ម សុខចិត្តឲ្យគេចាប់ខ្លួន ដើម្បីផ្ដល់កម្លាំងចិត្ត ដល់សមាជិករបស់គណបក្ស។ នេះជាអ្វី ដែលគេអាចអានបាន នៅលើទំព័រហ្វេសប៊ុក របស់ព្រះអង្គម្ចាស់ ស៊ីសុវត្ថិ ធម្មិកោ ដែលជាមន្ត្រីជាន់ខ្ពស់មួយរូបរបស់គណបក្សសង្គ្រោះជាតិ។
ព្រះអង្គម្ចាស់ បានសរសេរថា៖ «ប្រធានស្តីទី កឹម សុខា បានសម្រេចចិត្តធ្វើពលិកម្ម ប្រឈមនឹងច្បាប់ ហើយសុខចិត្តឲ្យគេចាប់ខ្លួន ដើម្បីផ្តល់កំលាំងចិត្ត ឲ្យយើងទាំងអស់គ្នា នៅខាងក្រៅ។ ហេតុដូច្នេះ ដើម្បីផ្តល់សេចក្តីកក់ក្តៅជូនលោកវិញ យើងត្រូវតែរួបរូមគ្នា ប្តេជ្ញាចិត្តបន្តបេសកម្មពិសិដ្ឋ របស់លោករៀងរាល់ថ្ងៃជាមិនខាន ដើម្បីទាមទារសិទ្ធសេរីភាព និងប្រជាធិតេយ្យពេញលេញ ជូនប្រជាពលរដ្ឋខ្មែរ ហើយការពារបូរណភាពទឹកដី និងឯករាជ្យភាពជាតិយើង»។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ បានថ្លែងព្រមានលោក កឹម សុខា កាលពីថ្ងៃចន្ទ ទី៩ ខែឧសភាម្សិលម៉ិញ ថាការខកខានមិនបង្ហាញខ្លួន ទៅកាន់តុលាការសាលាដំបូង នៅថ្ងៃទី១១ ខែឧសភាស្អែកនេះ នឹងបង្កើតរឿងដ៏ធំ យកដាក់ឲ្យខ្លួនលោក បន្ថែមពីលើរឿងអាស្រូវស្នេហា ដែលលោក កឹម សុខា កំពុងមានជាមួយស្ត្រីជាងធ្វើសក់ម្នាក់ ឈ្មោះ ខុម ចាន់តារាទី ហៅស្រីមុំ។ រឿងដ៏ធំនោះ ត្រូវបានលោក ឱម យ៉ិនទៀង និយាយឡើងថា ជាបទល្មើសជាក់ស្ដែង (ព្រោះមិនបង្ហាញខ្លួន) ដែលបើកដៃឲ្យអាជ្ញាធរ អាចចាប់ខ្លួនលោក កឹម សុខា បាន ដោយមិនខ្វល់ពីអភ័យឯកសិទ្ធិសភា។
ថ្លែងតាមរយៈវិទ្យុសំឡេងប្រជាធិបតេយ្យ ប្រធានអង្គភាពប្រឆាំងអំពើពុករលួយ បានឲ្យដឹងថា៖ «គ្រប់គ្នា ដែលមានអភ័យឯកសិទ្ធិ មិនអាចប្រឆាំងនឹងចំណាត់ការរដ្ឋាភិបាលទេ។ ឧទាហរណ៍ បើមនុស្សម្នាក់ មានអភ័យឯកសិទិ្ធបើកឡានបុកគេ នគរបាលនឹងអញ្ជើញគាត់មកបំភ្លឺ។ គាត់ត្រូវតែទៅនគរបាល។ ប៉ុន្តែបើតុលាការចោទប្រកាន់គាត់ គឺក្រោយពេលគេដកអភ័យឯកសិទិ្ធគាត់។ (...) តុលាការមិនអាចចាប់ខ្លួនគាត់ ផ្អែកលើបទចោទពេស្យាកម្ម គេអាចចាប់ខ្លួនគាត់ ផ្អែកលើបទល្មើសថ្មី។»
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ក៏បានអះអាង តាមវិទ្យុសម្លេងអាស៊ីសេរីដែរថា លោក កឹម សុខា នឹងមិនចូលទៅបំភ្លឺ នៅតុលាការនោះទេ។ លោកបានបញ្ជាក់ថា អនុប្រធានគណបក្សសង្គ្រោះជាតិ មានអភ័យឯកសិទ្ធិសភា ដែលផ្ដល់សិទ្ធិពិសេស ឲ្យរួចពីការចាប់ចង និងចោទប្រកាន់នានា តែការចាប់ខ្លួនបាន លុះត្រាតែមានការយល់ព្រម ពីសភាប្រជុំអនុម័តពីរឿងនេះជាមុនសិន។
រីឯអ្នកជំនាញផ្នែកច្បាប់ លោកមេធាវី សុក សំអឿន វិញ មិនបានយល់ស្រប នឹងការលើកឡើងរបស់លោក ឱម យ៉ិនទៀង ខាងលើនេះទេ។ លោកមេធាវីថា អភ័យឯកសិទិ្ធ គួរការពារតំណាងរាស្រ្តពីការចាប់ខ្លួន ហើយថាមិនមានបទចោទ ចំពោះការមិនអនុវត្ត តាមដីកាកោះទេ។ លោក សុខ សំអឿន បានបញ្ជាក់ថា៖ «ចំពោះការកោះទី២ គេអាចនាំខ្លួនទៅតុលាការ ហើយចំពោះលើកទី ៣ គេអាចចាប់ខ្លួនគាត់ ប៉ុន្តែមិនមែនចោទប្រកាន់ទេ គឺគ្រាន់តែបញ្ជូនទៅតុលាការ»។
លោក សុន ឆ័យ តំណាងរាស្ត្រមណ្ឌលខេត្តសៀមរាប មកពីគណបក្សសង្គ្រោះជាតិ បានថ្លែងតាមវិទ្យុសម្លេងប្រជាធិបតេយ្យថា៖ «ប៉ុន្តែអ្វីដែលលោក ឱម យ៉ិនទៀង គាត់មានយោបល់អីផ្ទាល់ខ្លួនអី យើងមិនមានការចាប់អារម្មណ៍ ទៅលើសម្ដីទាំងនោះទេ បាទ»។
កាលពីថ្ងៃទី៣ ខែឧសភា លោក កែវ សុជាតិ ព្រះរាជអាជ្ញារង នៃអយ្យការអមសាលាដំបូងរាជធានី ភ្នំពេញ បានចេញដីកាកោះហៅលោក កឹម សុខា ឲ្យចូលខ្លួនទៅកាន់សាលាដំបូងរាជធានីភ្នំពេញ នៅម៉ោង៩ព្រឹកថ្ងៃទី១១ ខែឧសភាស្អែកនេះ ដើម្បីសាកសួរពីដំណើររឿង របស់បណ្តឹងរបស់តារាហ្វេសប៊ុកដ៏ល្បីល្បាញ កញ្ញា ធី សុវណ្ណថា។
មាត្រា ៨០ នៃរដ្ឋធម្មនុញ្ញចែងថា៖ «តំណាងរាស្ត្រ មានអភ័យឯកសិទ្ធិសភា។ តំណាងរាស្ត្ររូបណាក៏ដោយ មិនអាចត្រូវបានចោទប្រកាន់ ចាប់ខ្លួន ឃាត់ខ្លួន ឬឃុំខ្លួន ដោយហេតុពីបានសំដែងយោបល់ ឬបញ្ចេញមតិ ក្នុងការបំពេញមុខងាររបស់ខ្លួនសោះឡើយ។ ការចោទប្រកាន់ ការចាប់ខ្លួន ការឃាត់ខ្លួន ឬការឃុំខ្លួន សមាជិកណាមួយនៃរដ្ឋសភា នឹងអាចធ្វើទៅកើត លុះត្រាតែមានការយល់ព្រមពីរដ្ឋសភា ឬពីគណៈកម្មាធិការអចិន្ត្រៃយ៍ របស់រដ្ឋសភា ក្នុងចន្លោះសម័យប្រជុំនៃរដ្ឋសភា វៀរលែងតែក្នុងករណីបទល្មើសព្រហ្មទណ្ឌជាក់ស្ដែង។»
ប៉ុន្តែសម្រាប់ក្រសួងយុត្តិធម៌ បានចាត់ទុកដីកាកោះហៅ របស់តុលាការ ថាមានការទាក់ទង នឹងអភ័យឯកសិទ្ធិសភាឡើយ។ នៅក្នុងសេចក្ដីថ្លែងការណ៍មួយ របស់លោក គឹម សន្តិភាព អ្នកនាំពាក្យក្រសួងយុត្តិធម៌ ចុះថ្ងៃទី៥ ខែឧសភា បានបកស្រាយថា ការកោះហៅរបស់តុលាការ ក្នុងសំណុំរឿងព្រហ្មទណ្ឌ និងរដ្ឋប្បវេណីជាដើម ចំពោះតំណាងរាស្ត្រ មកពីគណបក្សប្រឆាំង មិនមានចែងក្នុងមាត្រា៨០ រដ្ឋធម្មនុញ្ញនោះទេ៕