«សហគមន៍​អ៊ឺរ៉ុប​ត្រូវ​ជជែក​ជា​មួយ​កម្ពុជា ឲ្យ​ឈប់​គម្រាម​និង​ចាប់​ខ្លួន​ក្រុម​ប្រឆាំង»

នៅក្នុងឱកាស នៃការជួបពិភាក្សារវាងសហគមន៍អ៊ឺរ៉ុប និងរដ្ឋាភិបាលកម្ពុជា ចាប់ពីថ្ងៃទី២ រហូត​ដល់ថ្ងៃ​ទី៤ ខែ​ឧសភា​នេះ សហព័ន្ធអន្តរជាតិដើម្បីសិទ្ធិមនុស្ស រួមនឹងអង្គការសិទ្ធិមនុស្ស​ក្នុង​ស្រុក​ចំនួន​ពីរ បាន​ចេញ​សេចក្ដី​ថ្លែងការណ៍​មួយ ស្នើ​សុំ​ឲ្យ​សហគមន៍​អ៊ឺរ៉ុប ត្រូវ​ប្រាប់​កម្ពុជា ឲ្យ​ឈប់​ធ្វើការ​គម្រាម និង​ការ​ចាប់​ខ្លួន ទៅ​លើ​តំណាង​រាស្ត្រ សមាជិក​របស់​គណបក្ស​ប្រឆាំង។
«សហគមន៍​អ៊ឺរ៉ុប​ត្រូវ​ជជែក​ជា​មួយ​កម្ពុជា ឲ្យ​ឈប់​គម្រាម​និង​ចាប់​ខ្លួន​ក្រុម​ប្រឆាំង»
តំណាងរាស្ត្រពីររូប មកពីគណបក្សសង្គ្រោះជាតិ ត្រូវបានក្រុមបាតុករ របស់គណបក្សប្រជាជនកម្ពុជា វាយដំទាត់ធាក់ រហូតរងរបួសធ្ងន់ធ្ងរ នៅនឹងមាត់របងរដ្ឋសភាជាតិ កាលពីចុងខែតុលា ឆ្នាំ២០១៥។ (រូបថតហ្វេសប៊ុក)
Loading...
  • ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី០២ ឧសភា ២០១៦
  • កែប្រែចុងក្រោយ: May 02, 2016
  • ប្រធានបទ: សិទ្ធិមនុស្ស
  • អត្ថបទ: មានបញ្ហា?
  • មតិ-យោបល់

សហគមន៍អ៊ឺរ៉ុប (EU) ត្រូវប្រើប្រាស់ការជជែក​ជាមួយកម្ពុជា ស្ដីពីស្ថានភាពសិទ្ធិមនុស្ស ដែលនឹងប្រព្រឹត្តិទៅ ចាប់​ពីថ្ងៃទី២ ដល់ថ្ងៃទី៤ ខែឧសភានេះ ដើម្បីទាមទារឲ្យអាជ្ញាធរកម្ពុជា បញ្ឈបនូវការគម្រាម ការចាប់ខ្លួន និង​ការ​ដាក់​ទោសទណ្ឌ ទៅលើក្រុមអ្នកតំណាងរាស្ត្រ និងសមាជិករបស់គណបក្សប្រឆាំង។ នេះ ជាអ្វី​ដែល​គេ​អាច​អាន​បាន នៅក្នុងសេចក្ដីថ្លែងការណ៍រួមគ្នា របស់សហព័ន្ធអន្តរជាតិដើម្បីសិទ្ធិមនុស្ស (International Federation for Human Rights ឬ Fédération internationale des ligues des droits de l'homme ហៅ​កាត់​ថា FIDH) និងអង្គការសិទ្ធិមនុស្សក្នុងស្រុកចំនួន២ទៀត (អាដហុក និងលីកាដូ) ដែល​ចេញ​ផ្សាយ​ពី​រាជធានី បាងកក ប្រទេសថៃ កាល​ពី​ថ្ងៃ​ទី២៩ ខែមេសា ឆ្នាំ២០១៦។

សេចក្ដីថ្លែងការណ៍នេះ ទំនងជាបានចេញផ្សាយ នៅមុនការចាប់ឃាត់ខ្លួន ក្រុមមន្ត្រីសិទ្ធិមនុស្សបួននាក់ និង​មន្ត្រី​ជាន់ខ្ពស់ម្នាក់ របស់គណៈកម្មាធិការជាតិដើម្បីការបោះឆ្នោត (គ.ជ.ប.) កាលពីយប់ថ្ងៃទី២៨ ខែមេសា ដោយ​អង្គភាពប្រឆាំងអំពើពុករលួយ របស់រដ្ឋាភិបាលលោក ហ៊ុន សែន ទាក់ទងនឹងសំនុំរឿងលិខិតចំហរ របស់​ស្ត្រី​ជាង​ធ្វើសក់ អាយុ២៥ឆ្នាំម្នាក់។ ប៉ុន្តែយ៉ាងហោចណាស់ អត្ថន័យរបស់សេចក្ដីថ្លែងការណ៍ បាន​ធ្វើការ​ចោទ​ប្រកាន់ ពីស្ថានភាពរំលោភសិទ្ធិមនុស្ស នៅក្នុងប្រទេសកម្ពុជា ថាកំពុងមានសភាពខ្លាំងក្លាជាទូទៅ និង​មាន​ជម្រៅ​ជ្រៅទៅៗ។

លោក ការីម ឡាហ៊ីដជី (Karim Lahidji) នាយកសហព័ន្ធអន្តរជាតិដើម្បីសិទ្ធិមនុស្ស ដែលមាន​ទីតាំងធំ​នៅ​ក្នុង​រដ្ឋធានីប៉ារីស ប្រទេសបារាំង បានថ្លែងឲ្យដឹងថា៖ «សហគមន៍អ៊ឺរ៉ុប ត្រូវបញ្ជូនសារដ៏ខ្លាំង និង​ច្បាស់លាស់​មួយ ទៅឲ្យរដ្ឋបាលរបស់លោក ហ៊ុន សែន ថាការធ្វើទុក្ខបុកម្នេញ ទៅលើក្រុមអ្នកនយោបាយ​ប្រឆាំង ត្រូវ​តែ​បញ្ឈប់ ហើយមនុស្សទាំងឡាយ ដែលត្រូវបានចាប់ខ្លួនកន្លងមក នឹងត្រូវបានដោះលែងជាបន្ទាន់ និងដោយ​គ្មាន​លក្ខខណ្ឌ»។

នៅក្នុងរបាយការណ៍ដ៏វែងអន្លាយមួយ ដែលធ្វើឡើងរួមគ្នា រវាង «FIDH - ADHOC និង LICADHO» បាន​រំលឹក​ឡើងពីការគម្រាមកំហែង ទៅលើតំណាងរាស្ត្រ និងសកម្មជនរបស់គណបក្បប្រឆាំង ពីសំណាក់​អាជ្ញាធរ​ខ្មែរ និង​ពី​សំណាក់​គណបក្សប្រជាជនកម្ពុជា ដែលគិតចាប់តាំងពីខែកក្កដា ឆ្នាំ២០១៥មក។ យ៉ាងហោចមក​ដល់​ថ្ងៃ​នេះ សមាជិកគណបក្សសង្គ្រោះជាតិចំនួន១៧នាក់ កំពុងជាប់ឃុំនៅក្នុងពន្ធនាគារ ដែលក្នុងនោះ​មាន១១នាក់ ត្រូវជាប់ពន្ធនាគាររវាង ពី៧ឆ្នាំដល់២០ឆ្នាំ ដោយសារបទចោទមួយ ដែលរបាយការណ៍បានបរិហារថា ជា​ការ​ប្រឌិត​ឡើង​ទាំង​ស្រុង។

សម្រាប់រដ្ឋាភិបាលកម្ពុជាវិញ រាល់ការចាប់ខ្លួនក្រុមសកម្មជន របស់គណបក្សប្រឆាំង ក្នុងពេលកន្លងមក គឺជា​ការ​អនុវត្តច្បាប់ ដែលស្ថិតក្នុងអំណាច​របស់តុលាការ ដែលក្រុមមន្ត្រីបានអះអាងថា ជាអំណាចមួយ​​ដាច់​ដោយ​ឡែក​​ពីរដ្ឋាភិបាល និងរដ្ឋសភា។ នាយករដ្ឋមន្ត្រី-ប្រធានគណបក្សប្រជាជនកម្ពុជា លោក ហ៊ុន សែន ខ្លួន​លោក ក៏តែងបាន​និយាយ​ជាច្រើនដងដែរថា នៅកម្ពុជា គ្មានអ្នកជាប់គុកនយោបាយទេ តែមាន«​អ្នក​នយោបាយ​ជាប់​គុក»។

សហព័ន្ធអន្តរជាតិដើម្បីសិទ្ធិមនុស្ស ត្រូវបានបង្កើតឡើង តាំងពីឆ្នាំ១៩២២ ហើយមានទីតាំងកណ្ដាល នៅ​ក្នុង​រដ្ឋធានីប៉ារីស ប្រទេសបារាំង និងមានសាខាសឹងនៅគ្រប់ទិសទីទាំងអស់ ជុំវិញផែនដី។ សហព័ន្ធមួយនេះ ដែល​មានសមាជិកជាអង្គការសមាគម​ក្រៅ​រដ្ឋាភិបាល​ចំនួន១៧៨ មកពីប្រទេស​ចំនួន ១២០ នៅលើ​ពិភពលោក មានបុព្វសិទ្ធិសម្រាប់ផ្ដល់ការពិគ្រោះ ទៅឲ្យអង្គការសហប្រជាជាតិ (UN) អង្គការយូនីស្កូ (UNESCO) និងទៅឲ្យក្រុមប្រឹក្សាអ៊ឺរ៉ុប (Council of Europe)។ សមាគមអាដហុក និងអង្គការលីកាដូ ដែល​ជា​អង្គការ​ក្រៅ​រដ្ឋាភិបាល ធ្វើការផ្នែកសិទ្ធិមនុស្សនៅកម្ពុជា ក៏ជាសមាជិករបស់សហព័ន្ធមួយនេះដែរ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...