ក្នុងយប់ថ្ងៃទី១២ ខែមេសានេះ អាកាសយានដ្ឋានអន្តរជាតិ «Amsterdam-Schipol» បានជម្លៀស​មនុស្ស​ចេញ បន្ទាប់ទទួលបាន​ការប្រកាសអាសន្​នមួយរួចមក។ មនុស្សម្នាក់​ត្រូវបានឃាត់ខ្លួន នៅក្នុង​ហេតុការណ៍​ខាង​លើ ដែលសង្ស័យជាអំពើភេរវកម្ម។ នេះបើតាមមន្ត្រីអ្នកទទួលខុសត្រូវ ដែលបានថ្លែង​ប្រាប់​ទីភ្នាក់ងារ​ព័ត៌មាន​បារាំង «AFP»។

អ្នកនាំពាក្យឲ្យព្រលានយន្ដហោះ លោក ដានៀល ថាមើរ (Danielle Timmer) បានថ្លែងឲ្យដឹងថា៖ «នគរបាល​បានធ្វើការជម្លៀសមនុស្ស ពីផ្នែកមួយ នៃព្រលានយន្ដហោះ ក៏ដូចជាចេញពីសណ្ឋាគារ "Sheraton" ដែល​ស្ថិត​នៅក្បែរនោះ»។

រូបភាពដែលបង្ហាញតាម​ទូរទស្សន៍ក្នុងស្រុក​ បានបង្ហាញឲ្យឃើញថា កងកម្លាំងប្រដាប់ដោយអាវុធ​ធុន​ធ្ងន់​គ្រប់​ដៃ ត្រូវបានបញ្ជូនមកដាក់ប្រចាំការ នៅជុំវិញព្រលានយន្ដហោះ ដែលត្រូវបានដាក់ក្នុងសភាព​«ប្រុង​ជើង​ការ» រាប់ចាប់តាំង ពីភេរវកម្មថ្ងៃទី២២ ខែមីនា កន្លងមក នៅរាជធានីព្រុយសែល ប្រទេសប៊ែលហ្សិក។

សម្រាប់លោក អាលហ្វ្រេដ អែវេនជ័រ (Alfred Ellwanger) អ្នកនាំពាក្យឲ្យកងអាវុធហត្ថវិញ បាន​ប្រកាស​ឲ្យ​ដឹង​ថា៖ «នៅវេលាម៉ោង ២១ និង៤៥នាទី បុរសម្នាក់ត្រូវបានឃាត់ខ្លួន នៅនឹងកន្លែង ពីមុខទ្វាចូលធំជាងគេ របស់​ព្រលានយន្ដហោះ»។ លោកបានបន្ថែមទៀតថា ក្រុមដោះគ្រាប់បែក បានមកដល់នៅនឹងកន្លែង ហើយ​ពួកគេ​បាន​ត្រួត​ពិនិត្យ​កាបូប ហិបឥវ៉ាន់ របស់បុរសម្នាក់នោះ។

អ្នកនាំពាក្យរបស់កងកម្លាំងអាវុធហត្ថ បានបន្ថែមទៀតថា មិនមានជើងហោះហើរណាមួយ បានជួប​នឹង​ភាព​រអាក់​រអួល នោះឡើយ ដោយរាប់បញ្ចូលទាំងខ្សែរថភ្លើងនានា ដែលភ្ជាប់ព្រលានយន្ដហោះ ទៅនឹង​គ្រប់​ទីកន្លែង​ទាំង​អស់ ក្នុងប្រទេសហូឡង់នោះផង។ លោកមិនបានលំអិត ក្នុងពេលភ្លាមៗនេះបានទេ ពីចំនួន​មនុស្ស ដែលត្រូវបានជម្លៀស ចេញពីព្រលានយន្ដហោះ។

សូមបញ្ជាក់ដែរថា ព្រលានយន្ដហោះអន្តរជាតិ «Schipol» របស់ប្រទេសហូឡង់ ស្ថិត​នៅ​មិន​ឆ្ងាយ​ប៉ុន្មាន​ឡើយ ពីរាជធានី អាមស្ទែដាម ហើយជាព្រលានយន្ដហោះទី៥ នៅក្នុងទ្វីបអ៊ឺរ៉ុប ដែលទទួលការ​ហោះហើរ​ប្រចាំថ្ងៃ​ច្រើន​ជាង​គេ ជាមួយនឹងអ្នកដំណើរឆ្លងកាត់ ប្រមាណជា៥០លាននាក់ក្នុងមួយឆ្នាំៗ៕