បក្ស​សង្គ្រោះ​ជាតិ ថា​ការ​ចាប់​ខ្លួន អ៊ុំ សំអាន រំលោភ​រដ្ឋធម្មនុញ្ញ

គណបក្សសង្គ្រោះជាតិ បានចេញសេចក្ដីថ្លែងការណ៍ នៅព្រឹកថ្ងៃទីចន្ទនេះ ថ្កោលទោស​ចំពោះ​ការ​ចាប់​ខ្លួន លោក អ៊ុំ សំអាន ដែលជាតំណាងរាស្ត្រ មកពីគណបក្សផងខ្លួន ពីសំណាក់​កង​កម្លាំង​អាជ្ញាធរ ដោយ​ហៅ​ទង្វើ​នេះ ថា​បាន​រំលោភរដ្ឋធម្មនុញ្ញធ្ងន់ធ្ងរ។
បក្ស​សង្គ្រោះ​ជាតិ ថា​ការ​ចាប់​ខ្លួន អ៊ុំ សំអាន រំលោភ​រដ្ឋធម្មនុញ្ញ
លោក អ៊ុំ សំអាន អ្នកតំណាងរាស្ត្រមណ្ឌលខេត្តសៀមរាប។ (រូបថត MONOROOM.info/ Srun Tith)
Loading...
  • ដោយ: ដារា រិទ្ធ អត្ថបទ និងយកការណ៍៖ ដារា រិទ្ធ ([email protected]) - ភ្នំពេញ ថ្ងៃទី១១ មេសា ២០១៦
  • កែប្រែចុងក្រោយ: April 11, 2016
  • ប្រធានបទ: នយោបាយ
  • អត្ថបទ: មានបញ្ហា?
  • មតិ-យោបល់

គណបក្សសង្គ្រោះជាតិ បានថ្កោលទោសយ៉ាង«ដាច់អហង្ការ» ចំពោះការចាប់ខ្លួន លោក អ៊ុំ សំអាន អ្នក​តំណាង​រាស្ត្រ​មណ្ឌលខេត្តសៀមរាប កាលពីយប់រំលងអាធ្រាត ចូលមកព្រឹកថ្ងៃទី ១១ ខែមេសា ឆ្នាំ២០១៦នេះ នៅ​ខេត្ត​សៀមរាប។

នៅក្នុងសេចក្ដីថ្លែងការណ៍ របស់គណបក្សសង្គ្រោះជាតិ ដែលចេញផ្សាយឲ្យដឹង នៅព្រឹកថ្ងៃចន្ទទី ១១ ខែ​មេសា​នេះ និងដែលទស្សនាវដ្ដីមនោរម្យ.អាំងហ្វូ ទទួលបានមួយច្បាប់ដែរនោះ បានសរសេរឲ្យដឹងថា ការចាប់​ខ្លួន​ខាង​លើ​នេះ ជាទង្វើរំលោភយ៉ាងធ្ងន់ធ្ងរ ទៅលើអភ័យឯកសិទ្ធិអ្នកតំណាងរាស្ត្រ ដែលត្រូវបានធានា​ដោយ​ច្បាប់ និងរដ្ឋធម្មនុញ្ញកម្ពុជា។ សូមអានសេចក្ដីថ្លែងការណ៍នេះទាំងស្រុង នៅផ្នែកខាងក្រោមអត្ថបទ។

បន្ទាប់ពីបានចាកចេញ ពីប្រទេសអស់រយៈពេលជាង ៧ខែ ហើយបានត្រឡប់មកប្រទេសកម្ពុជា​​វិញ កាលពី​ព្រឹក​​ថ្ងៃ​​អាទិត្យ​ ទី១០ ខែមេសា លោក អ៊ុំ សំអាន អ្នកតំណាងរាស្ត្រ ដែលល្បីល្បាញខាងបញ្ហាព្រំដែន ត្រូវបាន​កង​កម្លាំង​អាជ្ញាធរចាប់ខ្លួន នៅយប់ថ្ងៃអាទិត្យ រំលងចូលមកព្រឹកថ្ងៃចន្ទ ទី១១ ខែមេសានេះ នៅក្នុងខេត្ត​សៀមរាប។ ប្រភពស្និតនឹងអាជ្ញាធរ បាននិយាយថា ការចាប់ខ្លួននេះ មានជាប់ពាក់ព័ន្ធ នឹងរឿង​ប្រើប្រាស់​ផែនទី​ក្លែង​ក្លាយ។

អ្នកនាំពាក្យរដ្ឋសភា លោក ឡេង ប៉េងឡុង ត្រូវបានសារព័ត៌មានក្នុងស្រុកស្រង់សំដី មកធ្វើការផ្សាយថា ការ​ចាប់​ខ្លួនលោក អ៊ុំ សំអាន ជាករណីបទល្មើសជាក់ស្ដែង ដែលមានលក្ខណៈដូចគ្នា ទៅនឹងករណី​របស់​លោក ហុង សុខហួរ អតីតព្រឹទ្ធសមាជិកដូច្នេះដែរ។ ប៉ុន្តែទាក់ទងនឹងទិដ្ឋភាពច្បាប់បែបណា ឬយ៉ាងដូចម្ដេច​នោះ រដ្ឋសភា​នៅមិនទាន់ទទួលបាន ការជូនដំណឹង ពីការចាប់ខ្លួននេះនៅឡើយ៕

» សេចក្ដីថ្លែងការណ៍ទាំងស្រុង៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...