កាលពីថ្ងៃពុធកន្លងមកនេះ អង្គការសហប្រជាជាតិ (អ.ស.ប) បានបង្កើតនូវក្រុមការងារមួយ ដែល​មាន​សមាជិក​សុទ្ធជាអ្នកជំនាញ (អ្នកជំនាញ លើបញ្ហាកូរ៉េខាងជើង) ឲ្យទទួលបន្ទុក ដើម្បីធ្វើការពិចារណា​​តាម​យន្ដការ​ច្បាប់ ក្នុងការកំណត់ ពីការទទួលខុសត្រូវ របស់ក្រុមមេដឹកនាំ របស់របបកុម្មុយនីសកូរ៉េខាងជើង ទាក់ទង​នឹង​ឧក្រិដ្ឋកម្ម​ប្រឆាំង​មនុស្សជាតិ។

នៅក្នុងសេចក្ដីសម្រេចមួយ ដែលអនុម័តឡើង ក្នុងក្រុងហ្សឺណែវ (ប្រទេសស្វីស) ក្រុមប្រឹក្សាសិទ្ធិមនុស្សរបស់ អ.ស.ប បានគូសបញ្ជាក់ ពីក្ដីបារម្ភដ៏ជ្រាលជ្រៅរបស់ខ្លួន នៅចំពោះសេចក្ដីសន្និដ្ឋាន របស់គណៈកម្មការ​អង្កេត​របស់ អ.ស.ប ដែលបានធ្វើឡើង តាមរយៈសាក្សី និងព័ត៌មានជាច្រើន។ សេចក្ដីសន្និដ្ឋាននោះ បានអនុញ្ញាត​ឲ្យ​គេ​យល់​ឃើញ​ថា៖ «ឧក្រិដ្ឋកម្មប្រឆាំងមនុស្សជាតិ ត្រូវបានប្រព្រឹត្តិ និងបង្កឡើងដោយ សាធារណរដ្ឋ​ប្រជាមានិត ប្រជាធិបតេយ្យ កូរ៉េ (RPDC - ឈ្មោះផ្លូវការ របស់ប្រទេសកូរ៉េខាងជើង) សម្រាប់​បម្រើ​ឲ្យ​នយោបាយ របស់​ថ្នាក់​ដឹកនាំរដ្ឋជាន់ខ្ពស់ តាំងពីច្រើនទសវត្សន៍មកហើយ»។

អ្នកជំនាញឯករាជ្យពីរនាក់

នៅចំពោះនីទណ្ឌភាព និងភាពងងើល របស់ក្រុម​អ្នកប្រព្រឹត្តិ​ឧក្រិដ្ឋកម្មទាំងនេះ សេចក្ដីសម្រេចនោះបានស្នើរ ទៅស្នងការជាន់ខ្ពស់ របស់ អ.ស.ប ដែលទទួលបន្ទុកខាងសិទ្ធិមនុស្ស ឲ្យតែងតាំងច្រើនបំផុត នូវអ្នក​ជំនាញ​ឯករាជ្យ​ពីរនាក់ សម្រាប់រយៈពេល៦ខែ ដើម្បីជាជំនួយការ ឲ្យអ្នករាយការណ៍ពិសេស របស់អ.ស.ប ស្ដី​ពី​ប្រទេស​កូរ៉េ​ខាង​ជើង។

សេចក្ដីសម្រេចដដែល បានបញ្ជាក់ទៀតថា៖ «ក្រុមអ្នកជំនាញឯករាជ្យទាំងនេះ នឹងមានតួនាទី សិក្សា​ពីនីតិវិធី​ទាំង​ឡាយ ដើម្បីកំណត់​ពីការទទួលខុសត្រូវ នៃ​ការរំលោភសិទ្ធិមនុស្ស ដែលបានកើតឡើង​ក្នុង​សាធារណរដ្ឋ​ប្រជាមានិត ប្រជាធិបតេយ្យ កូរ៉េ»។ ក្រុមអ្នកជំនាញ ត្រូវលើកឡើង ពីយន្ដការចាំបាច់ និង​ច្បាស់​លាស់ ដើម្បី​ផ្ដល់​ជូន​នូវការពិត និងយុត្តិធម៌ សម្រាប់ជនរងគ្រោះ ពីឧក្រិដ្ឋកម្មប្រឆាំងមនុស្សជាតិ នៅក្នុង​ប្រទេស​កុម្មុយនីស។ យន្ដការ​នោះ រាប់​បញ្ចូលទាំងការប្ដឹង ឡើងទៅតុលាការឧក្រិដ្ឋកម្មអន្តរជាតិ (CPI) នោះ​ផង។

ក្នុងរបាយការណ៍មួយ ដែលត្រូវបានចែកផ្សាយ ទៅឲ្យប្រព័ន្ធផ្សព្វផ្សាយ កាលពីថ្ងៃទី១៥ ខែកុម្ភៈកន្លងទៅ លោក ម៉ាហ្សូគី ដារូស្មាន (Marzuki Darusman ជាជនជាតិឥណ្ឌូនេស៊ី) អ្នករាយការណ៍ពិសេស របស់អ.ស.ប ស្ដីពី​ប្រទេសកូរ៉េខាងជើង បានសរសេរថា ស្ថានភាពសិទ្ធិមនុស្ស នៅក្នុងប្រទេសកុម្មុយនីស មិនមាន​ភាព​ជឿន​លឿន​​ទៅមុខ​សោះឡើយ រាប់ចាប់តាំង ពីការផ្សាយរបាយការណ៍ស៊ើបអង្កេត លើកមុន (ខែកុម្ភៈ ឆ្នាំ​២០១៤) ទាក់​ទង​នឹង​ឧក្រិដ្ឋកម្ម ប្រឆាំងមនុស្សជាតិ នោះមក។

សូមជម្រាបជូនដែរថា ទន្ទឹមនឹងការបង្កើត នូវក្រុមអ្នកជំនាញពិសេសនេះ ក្រុមប្រឹក្សាសិទ្ធិមនុស្ស របស់ អ.ស.ប ក៏បានសរសេរលិខិតផ្លូវការមួយដែរ ទៅកាន់មេដឹកនាំកំពូល លោក គីម ជុងអ៊ុន (Kim Jong-Un) របស់​កូរ៉េ​ខាងជើង ដើម្បីព្រមានលោក និងថ្នាក់ដឹកនាំដទៃទៀត ថាពួកគេ អាចរងនូវការស៊ើបអង្កេតមួយ និង​អាច​ចាប់​ឲ្យ​ទទួល​ខុសត្រូវ ពីឧក្រិដ្ឋកម្មប្រឆាំងមនុស្សជាតិ ក្នុងករណីរកឃើញពីទោសកំហុស៕