តំណាងរាស្ត្រ និងជាសមាជិកសភានីតិកាលទីមួយ ដែលភាគច្រើន ជាអ្នកស្និត​នឹងអតីតរបបយោធា បាន​អនុម័ត​ច្បាប់រដ្ឋធម្មនុញ្ញ ដោយកំហិតមិនឲ្យពលរដ្ឋភូមាណា ដែលមានកូនរបស់ខ្លួនកាន់សញ្ជាតិបរទេស អាច​ឈរឈ្មោះធ្វើប្រធានាធិបតីបានឡើយ។ ការកំហិតនេះ ជាការបាញ់ឆ្ពោះ សំដៅរារាំងមេដឹកនាំប្រឆាំង គឺ​អ្នកស្រី អង់សាន ស៊ូជី ដែលមានស្វាមីជាជនជាតិអង់គ្លេស ហើយកូនទាំងពីររបស់អ្នកស្រី មាន​សញ្ជាតិ​អង់គ្លេស​នោះ មិនឲ្យឡើងឈរឈ្មោះ ជាប្រធានាធិបតី។

នៅក្នុងនីតិវិធី​ជាគោលការណ៍ ដែលមានចែង​នៅក្នុង​រដ្ឋធម្មនុញ្ញ បេក្ខជនប្រធានាធិបតីថ្មី នឹងត្រូវបាន​បោះ​ឆ្នោត​ជ្រើសតាំង ដោយរដ្ឋសភា នៅប៉ុន្មានសប្ដាហ៍ខាងមុន ហើយបេក្ខជនរូបនោះ នឹងក្លាយជាប្រធានាធិបតី​ពេញ​ច្បាប់ នៃប្រទេសភូមា ចាប់ពីថ្ងៃទី១ ខែមេសាតទៅ។ ហើយដើម្បីអាចឲ្យពលរដ្ឋភូមាទូទៅ (ជាពិសេសអ្នកស្រី ស៊ូជី ខ្លួនឯង) អាចឈរឈ្មោះ​ជាប្រធានាធិបតីបាន អ្នកស្រីម្ចាស់ពានរង្វាន់ណូបែលសន្តិភាព បានព្យាយាម​គ្រប់​វិធី ដើម្បី​ស្នើ​សុំ​ទៅ​រដ្ឋសភា​ក្នុងនីតិកាលចាស់ ឲ្យធ្វើវិសោធនកម្មរដ្ឋធម្មនុញ្ញ ទៅលើមាត្រាដែល​ពាក់​ព័ន្ធ​នេះ។ ប៉ុន្តែការព្យាយាមនោះ មិនបានសម្រេចទេ។

ប៉ុន្តែរដ្ឋសភានីតិកាលថ្មី ដែលមានសម្លេងភាគច្រើន មកពីគណបក្ស សម្ព័ន្ធដើម្បីលិទ្ធិប្រជាធិបតេយ្យ ឬ«NLD» របស់អ្នកស្រី អង់សាន ស៊ូជី នោះ នឹងអាចធ្វើវិសោធនកម្ម ទៅលើរដ្ឋធម្មនុញ្ញបាន ប្រសិនណាជា​តំណាង​រាស្ត្រ​យោធា (ដែលគ្មានការបោះឆ្នោត និងត្រូវបានតែងតាំងដោយយោធា) ដែលមានសម្លេងប្រមាណជា ២៥% គាំទ្រ​គម្រោង​កែប្រែ​មាត្រា​ខាងលើនេះ។

យ៉ាងណា បើទោះជារដ្ឋធម្មនុញ្ញ មិនត្រូវបានធ្វើវិសោធនកម្ម និងមានអ្នកផ្សេង ជាប់ជាប្រធានាធិបតីក៏ដោយ ក៏អ្នកស្រី ស៊ូជី ធ្លាប់បានប្រកាសហើយថា អ្នកស្រីនៅតែមានអំណាច ពីលើប្រធានាធិបតីនោះ ជាដរាប៕