លោកប្រធានាធិបតីម៉ិកស៊ិក លោក ប៉េណា នីអេតូ (Peña Nieto) បានប្រកាសក្នុងគណនីទ្វីសធើរ ដែល​ជា​គណនីផ្លូវការរបស់លោកថា មេឈ្មួញជួញដូរគ្រឿងញៀនជាតិម៉ិកស៊ិក ដ៏ល្បីរន្ទឺពេញទាំងពិភពលោក លោក ជ័គីន អែលឆាប៉ូ ហ្គុម៉ាន់ (Joaquin "El Chapo" Guzman) ត្រូវបានអាជ្ញាធរនៃប្រទេសម៉ិកស៊ិក ចាប់​ខ្លួន​បាន​មក​វិញ​ហើយ។

លោក នីអេតូ ដែលបានជាប់ឆ្នោតជាប្រធានាធិបតី នៃប្រទេសម៉ិកស៊ិក កាលពីឆ្នាំ២០១២ បានសរសេរ​ឲ្យ​ដឹង​ថា៖ «បេសកកម្ម បានបញ្ចប់ទៅ ដោយជោគជ័យ៖ យើងចាប់វាបានហើយ។ ខ្ញុំសូមជម្រាបជូន ពលរដ្ឋ​ម៉ិកស៊ិក​ថា ជ័គីន អែលឆាប៉ូ ហ្គុម៉ាន់ ត្រូវបានឃាត់ខ្លួន (ឡើងវិញ - Editor's note)។»

បើតាមកងកម្លាំង របស់ប្រទេសក្នុងទ្វីបអាមេរិកកណ្ដាលមួយនេះ បានអះអាងថា មេដឹកនាំ នៃបណ្ដាញ​ជួញដូរ​គ្រឿងញៀន ដ៏មានឥទ្ធិពល ត្រូវបានឃាត់ខ្លួន នៅក្នុងលំនៅដ្ឋានមួយ នៃក្រុង «Los Mochis» រដ្ឋ «Sinaloa» ភាគពាយ័ព្យ​នៃប្រទេសម៉ិកស៊ិក។

ចារកម្មអាមេរិក ដឹងពីកន្លែងលាក់ខ្លួន...

អាជ្ញាធរម៉ិកស៊ិក បានបញ្ជាក់បន្ថែមថា ការផ្ទុះអាវុធបានកើតឡើង យ៉ាងខ្លាំងក្លា រវាងក្រុមជនប្រដាប់អាវុធ និង​កងកម្លាំងជាតិ។ មនុស្ស៥នាក់ ត្រូវបានសម្លាប់ និងមនុស្ស៦នាក់ បានរងរបួស។ ប៉ុន្តែចំពោះស្ថានភាព របស់​មេឈ្មួញ អែលឆាប៉ូ ថាមានសភាពបែបណានោះ មិនត្រូវបានអាជ្ញាធរបញ្ជាក់ឲ្យដឹងនោះទេ។

បើតាមប្រព័ន្ធផ្សព្វផ្សាយក្នុងស្រុក បានអះអាងថា បុរសខ្លាំង ដែលជាមេបណ្ដាញជួញដូរ គ្រឿងញៀន​ដ៏ធំ​រូបនេះ ត្រូវបានអាជ្ញាធរម៉ិកស៊ិក និងបណ្ដាញចារកម្មរបស់អាមេរិក តាមដានឃើញស្នាមរបស់លោក តាំង​ពី​ជាង១ខែមកហើយ នៅក្នុងគេហដ្ឋានមួយនេះ បន្ទាប់ពីលោក បានជួបជាមួយនឹងមេធាវី និងអ្នក​ជំនាញ​ខាង​ភាពយន្ដមួយចំនួន ដើម្បីថតភាពយន្ដមួយ ដែលនិយាយពីជីវិតរបស់លោក។

ចាប់ខ្លួន នៅក្នុងសណ្ឋាគារ...

យុទ្ធនាការចាប់ខ្លួនមេឈ្មួញ ជួញដូរគ្រឿងញៀនដ៏ល្បី បានធ្វើឡើងនៅព្រឹកព្រហាម ហើយលោក អែលឆាប៉ូ បានគេចខ្លួនតាមរូងក្រោមដីមួយ ចេញពីគេហដ្ឋាន កន្លែងដែលលោកបានលាក់ខ្លួន ប្រមាណជា​តាំងពី​១ខែ​មកហើយ។ លោក ទំនងជាបានលួចរថយន្ដ ចតនៅក្បែរច្រកចេញ នៃរូងក្រោមដី ហើយបានចូល​ទៅស្នាក់​នៅ ក្នុងសណ្ឋាគារមួយ មុននឹងលោក ត្រូវបានកងកម្លាំងម៉ិកស៊ិក ចូលទៅចាប់ខ្លួនបានជាស្ថាពរ នៅទីនោះ។

ការស្វែងរកចាប់ខ្លួនលោក អែលឆាប៉ូ ត្រូវបានធ្វើឡើង ទាំងនៅក្នុងប្រទេសម៉ិកស៊ិក ទាំងនៅពាស​ពេញ​ពិភព​លោក បន្ទាប់ពីមេឈ្មួញគ្រឿងញៀនមួយនេះ បានគេចខ្លួនពីពន្ធនាគារ កាលពីខែកក្កដា ឆ្នាំកន្លងទៅ តាម​រូង​ក្រោមដីមួយ ដែលជីកចូលទៅកាន់បន្ទាប់ឃុំឃាំង។ រូបភាពដែលបង្ហាញពីមូលហេតុ នៃការ​គេច​ខ្លួន​របស់​លោក អែលឆាប៉ូ ដែលជាការគេចខ្លួន ជាលើកទីពីរនេះ ត្រូវបានផ្សព្វផ្សាយ ពេញទាំងបណ្ដាញ​អ៊ិនធើណែត ជាពិសេសតាមបណ្ដាញសង្គម ហើយបានដាក់សំពាធ លើអាជ្ញាធរម៉ិកស៊ិកមិនតិចទេ ពីប្រព័ន្ធ​សុវត្ថិភាព​ក្នុង​ពន្ធនាគារ និងអំពើពុករលួយ នៅក្នុងប្រទេស។ ការដាក់សំពាធ ដែលបង្ខំអាជ្ញាធរម៉ិកស៊ិក ចាំបាច់ត្រូវ​តែ​តាម​រក​ចាប់​ខ្លួន បុរសដែលបង្គគ្រោះ ដោយមនុស្សជាតិមួយនេះ ឲ្យខាងតែបានមកវិញ៕