ក្រសួងសុខាភិបាល នៃព្រះរាជាណាចក្រកម្ពុជា និងអង្គការសុខភាពពិភពលោក បានប្រកាសពីករណីជម្ងឺផ្ដាសាយបក្សី ចំនួនបួនទៀត ថាត្រូវបានឆ្លងទៅលើមនុស្ស ដោយមេរោគ ប្រភេទ អា (A ឬ H5N1)។ ការបង្ការ និងការស្រាវជ្រាវបន្ត ពី​ជម្ងឺ​ផ្ដាសាយ ត្រូវបានធ្វើភ្លាមៗ ទៅលើបុគ្គលិកពេទ្យដែលមានទំនាក់ទំនងផ្ទាល់ ជាមួយអ្នកជំងឺទាំងនេះ។ រហូតមកទល់​ឥឡូវ​នេះ មិន​មានចំណោទណាផ្សេង ស្ដីពីការចម្លង ត្រូវបានគេរកឃើញពីការរុករកមេរោគ ឃើញលទ្ធផលជាវិជ្ជមាន​នោះទេ។

សត្វស្លាបសមុទ្រ។ MONOROOM.info Photo/ D.KEO

ក្រសួងសុខាភិបាលកម្ពុជាបានបញ្ជាក់ថា កុមារខ្មែរពីរនាក់ ក្នុងនោះទារកម្នាក់អាយុ១៧ខែ និងក្មេងស្រីម្នាក់អាយុ ៩ឆ្នាំ បានស្លាប់នឹងជម្ងឺផ្ដាសាយបក្សីនេះ កាលពីថ្ងៃច័ន្ទ ដែលធ្វើអោយចំនួនអ្នកស្លាប់ បានកើនឡើងដល់ទៅបួននាក់ នៅកម្ពុជា ក្នុងអំឡុងមួយខែនៃដើមឆ្នាំ២០១៣នេះ។

លោកវេជ្ជបណ្ឌិត ដឺនីស ឡូរ៉ង់ (Denis Laurent) នាយករងមន្ទីពេទ្យគន្ធបុប្ផា បានថ្លែងប្រាប់ទីភ្នាក់ងារស៊ីនហួរថា មាន​ក្មេងស្រីពីរនាក់ មកពីស្រុកគងពិសី ខេត្តកំពង់ស្ពឺ និងក្មេងស្រីម្នាក់ទៀត មកពីស្រុកទឹកឈូ ក្នុងខេត្តកំពត បានផ្ទុកមេរោគ​ដ៏អកុសលនេះ។ លោកវេជ្ជបណ្ឌិតបានបន្ថែមថា ក្មេងស្រីពីរនាក់ បានស្លាប់នៅថ្ងៃច័ន្ទនេះ នៅក្រោយពេលទទួល​ការ​ព្យាបាលពីមន្ទីរបស់លោក ក្នុងរាជធានីភ្នំពេញ។

កាលពីសប្ដាហ៍មុន ក្រសួងសុខាភិបាលបានប្រកាសរួចម្ដងហើយ ថាមានករណីចំនួនបីនៃជម្ងឺនេះ ហើយអ្នកជម្ងឺ​លើករណី​ចំនួនពីរបានស្លាប់។ មានទារកតែម្នាក់គត់ មានអាយុ៨ខែ មកពីខ័ណ្ឌពោធិ៍សែនជ័យ ក្នុងរាជធានីភ្នំពេញ ពីក្នុងចំណោម​ប្រាំករណីខាងលើ ដែលនៅរួចរស់ មានអាយុជីវិតមកទល់នឹងសព្វថ្ងៃ។

អ្នកជម្ងឺ ដែលបានរងគ្រោះដោយសារមេរោគ នៃជម្ងឺផ្ដាសាយដ៏សាហាវ ប្រភេទ អា (A ឬ H5N1) ទាំងនេះ  ត្រូវបានអះអាង​ដោយ​វិទ្យាស្ថានប៉ាស្ទ័រ ក្នុងរាជធានីភ្នំពេញ។ នេះបើតាម អង្គការសុខភាពពិភពលោក (OMS)។ ក្រុមការងារធ្វើអន្តរាគម រហ័សថ្នាក់ជាតិ និងប្រចាំតំបន់នានា បានដឹកនាំការស៊ើបអង្កេតមួយ ពីហេតុការណ៍ចំលងអស់ទាំងនេះ និងចាត់វិធានការ  ដើម្បីដាក់អោយ​អនុវត្តន៍ថ្នាក់ជាតិ។

យ៉ាងហោចណាស់ មនុស្សចំនួន២៣នាក់បានស្លាប់បាត់បង់ជីវិត ដោយសារអាការះនៃជម្ងឺនេះ គិតចាប់តាំងពីឆ្នាំ​២០០៣​មកក្នុងប្រទេសកម្ពុជា។ ខេត្តកំពង់ឆ្នាំង ជាខេត្តដែលរងគ្រោះធ្ងន់ធ្ងរជាងគេទាំងអស់ ក្នុងចំណោមខេត្ត ដែលប៉ះពាល់​ដទៃ​ទៀតនៃព្រះរាជាណាចក្រ។

សូមបញ្ជាក់ថា មេរោគនៃជម្ងឺផ្ដាសាយបក្សី ជាភ្នាក់ងារចម្លង ពីសត្វស្លាប មកមនុស្សតែប៉ុណ្ណោះ។ តែអ្នកវិទ្យាសាស្ត្រ​បាន​បារម្ភថា នឹងអាចមានការបន្លែងខ្លួន របស់មេរោគH5N1 នេះនៅថ្ងៃណាមួយ ហើយវានឹងបង្កអោយមានការចម្លង ពីមនុស្ស​ទៅមនុស្ស និងអាចប្រែក្លាយជាជម្ងឺឆ្លងយ៉ាងសាហាវ នៅពេលនោះ។ ចំណោទដែលត្រូវដោះស្រាយ គឺត្រូវបង្កើត​អោយ​បានលឿនជាទីបំផុត នូវវ៉ាក់ស៊ាំងបង្កាមួយ ប្រឆាំងនឹងមេរោគប្រភេទថ្មីនេះ បើទោះជាបច្ចុប្បន្ន វានៅមិនទាន់លេច ជារូប​រាងនៅឡើយក៏ដោយ៕

------------------------------------------------
ដោយ ៖ កេសរកូល - ភ្នំពេញ ថ្ងៃទី២៩ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ