ចម្រៀងឃោសនា ជាភាសាចិន កុកងឺ នេះ មានលក្ខណៈជាចម្រៀងប្រពៃណី មានរយៈពេលជិត៤នាទី និង​មាន​ចំណងជើងថា «Mujahid»។ ចម្រៀងត្រូវបានយកមកបង្ហោះ កាលពីថ្ងៃទី៦ ខែធ្នូ ឆ្នាំ២០១៥ នៅតាម​បណ្ដាញ​អ៊ិនធើណែត ដោយមជ្ឈមណ្ឌល «Al Hayat» ដែលជាស្ថាប័នផ្សព្វផ្សាយ និងទំនាក់ទំនង ជា​ភាសា​បរទេស របស់ក្រុមរដ្ឋអ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​ហៅ EI ពាក្យកាត់​អង់គ្លេស​ហៅ ISIS)។

ក្រុមភេរវជន បានដង្ហោយហៅ តាមរយៈចម្រៀងនោះ ទៅកាន់«បងប្អូនម៉ូស្លីម»ទាំងអស់ ឲ្យ«ភ្ញាក់ឡើង» ដៃ​កាន់​អាវុធដើម្បី«ប្រយុទ្ធ»។ បើតាមការបកប្រែក្រៅផ្លូវការ ដោយប្រព័ន្ធផ្សព្វផ្សាយមួយចំនួន ចម្រៀងនោះ បាន​បញ្ជាក់​ដូច្នេះថា៖ «ពលីជីវិត ក្នុងពេលប្រយុទ្ធនៅសមរភូមិ ជាក្ដីសុបិន្ដរបស់យើង»។

«ជ្រើសរើសជនសកម្មប្រយុទ្ធថ្មីទៀត»

បើទោះជាចម្រៀងនេះ មិនបាននិយាយដល់ ពីមុខសញ្ញារបស់ក្រុមរដ្ឋអ៊ីស្លាម ដែលពួកនេះចង់ឃោសនា ទាក់​ទាញនោះក៏ដោយ តែការផ្សព្វផ្សាយចម្រៀង ជាលើកទីមួយ ជាភាសាចិនរបៀបនេះ បានធ្វើឲ្យក្រុមអ្នកវិភាគ​យល់​ភ្លាមថា វាជាយុទ្ធសាស្ត្រថ្មី ក្នុងការជ្រើសរើស​ជនសកម្មប្រយុទ្ធបន្ថែមទៀត ពីប្រទេសចិន ជាពិសេស​ពី​បណ្ដា​ជន ដែលកាន់សាសនាអ៊ីស្លាម នៅភាគខាងលិចនៃប្រទេស។ ការពន្យល់មួយ របស់គេហទំព័រ «SITE» ដែល​មាន​ជំនាញខាងតាមដាន ការផ្សព្វផ្សាយរបស់ក្រុមរដ្ឋអ៊ីស្លាម ត្រូវបានសារព័ត៌មាន «Wall Street Journal» ដក​ស្រង់​យកមកអះអាងថា៖ «ការថតចម្រៀង ឬសម្លេងឃោសនា ជាភាសាចិន អះអាងពីគំរូថ្មីមួយ របស់​ក្រុម​រដ្ឋអ៊ីស្លាម ក្នុងការស្វែងរកមធ្យោបាយ ដើម្បីពង្រីកឥទ្ធិពលរបស់ខ្លួន»។

ក្រុមរដ្ឋអ៊ីស្លាម ទំនងជាចង់ឆ្លៀតយកឱកាស ពីការបែងចែកពលរដ្ឋច្រើនជាតិសាសន៍ ជាពិសេស ពីការរើ​បម្រះ​ដើម្បីសេរីភាព របស់ក្រុមជនជាតិ អ៊ុយហ្គួរ (Ouïghours) ដែលភាគច្រើន ជាអ្នកកាន់សាសនា​អ៊ីស្លាម ឲ្យ​ធ្វើការ​កាន់អាវុធ ដើម្បីងើបឡើងប្រឆាំង​នឹងប្រទេសចិន។ រហូតមកដល់ម៉ោងនេះ រដ្ឋាភិបាលក្រុងប៉េកាំង នៅ​មិន​ទាន់​​មានប្រតិកម្មអ្វីជាដុំកំភួន ទាក់ទងនឹងការផ្សាយ​ចម្រៀងនេះ​នៅឡើយ។ ប៉ុន្តែសម្រាប់​អ្នកតាមដាន​ព្រឹត្តិការណ៍ បានលើកឡើងថា ការលលេងចាក់ចង្កេះ ឲ្យប្រទេសចិនរសើបលោតឡើងបែបនេះ មិនមែន​ជា​ជម្រើស​ល្អ​ទេ សម្រាប់​ក្រុមភេរវជន៕