បណ្ដាជនអង់គ្លេស នឹងជ្រើសរើស «ការចាកចេញ»ពីសហគមអ៊ឺរ៉ុប បើប្រជាមតិសន្យាដោយនាយករដ្ឋមន្ត្រីខ្លួន ត្រូវគេ​រៀបចំធ្វើនៅថ្ងៃនេះ។ នេះជាការអោយដឹង ក្នុងលទ្ធផលនៃការស្ទង់មតិ កាលពីសុក្រនេះ ដោយទស្សនាវដ្ដី «ឌឺថែម៍ (The Times)»។

នាយករដ្ឋមន្ត្រីអង់គ្លេស លោកដាវិដ កាមើរូន។ DENIS BALIBOUSE, Reuters/Scanpix

បន្ទាប់ពីការប្រកាសរបស់នាយករដ្ឋមន្ត្រីអង់គ្លេស នៅថ្ងៃពុធទី​២៣​ខែមករាកន្លងមក ថានឹងរៀបចំធ្វើប្រជាមតិ នៅចុងឆ្នាំ​២០១៧ ដើម្បីសម្រេចពីវាសនារបស់ប្រទេសអង់គ្លេស នៅក្នុង​សហគមអ៊ឺរ៉ុបនោះ តាមការលទ្ធផល នៃការស្ទង់មតិជា​លើកដំបូងមួយ បានអោយដឹងថា បណ្ដាជននៅក្នុងប្រទេសនេះ ចំនួន៤០% សម្រេចចិត្តថានឹងចាកចេញ ទល់នឹង៣៧% យល់ថាត្រូវនៅក្នុង សហគមនេះជាបន្តទៅទៀត។

ចំណែកការស្ទង់មតិ របស់វិទ្យាស្ថានប៉ូភូលូស (Populus) សម្រាប់ទស្សនាវដ្ដីថែម៍ បានបញ្ចេញលទ្ធផលថា បណ្ដាជន​រហូតដល់ទៅ៥៣% យល់ថាគួរតែចេញពីអ៊ឺរ៉ូ ទល់នឹង៤៧%ដែលថា ត្រូវនៅក្នុងសហគមតទៅទៀត។

លោកដាវិដ កាមើរូន (David Cameron) បានសន្យានៅក្រោមសម្ពាធ នៃពួកអ្នកមិនចូលចិត្តអ៊ឺរ៉ុប ថានឹងរៀបចំ​បោះ​ឆ្នោត​ប្រជាមតិមួយ នៅដាច់ឆ្នាំ២០១៧ ដើម្បីសម្រេចពីបញ្ហានេះ ប៉ុន្តែនៅក្រោមលក្ខខ័ណ្ឌ បើសិនជារូបលោកនឹង​ត្រូវ​ជាប់​ឆ្នោតជានាយករដ្ឋមន្ត្រីឡើងវិញ។

លោកបានថ្លែងនៅទីក្រុងឡុងដ៍ ក្នុងឱកាសនោះថា «កំហុសក្នុងការធ្វើកំណែទម្រង់ គ្រោះថ្នាក់គឺថា អ៊ឺរ៉ុបបានបរាជ័យ ឯ​អង់គ្លេសត្រូវដើរទៅរកច្រកចេញ។ (...) បើយើងចេញពីសហគមអ៊ឺរ៉ុប វានឹងជាការចេញរហូតមួយ មិនត្រឡប់វិញទេ។»

ការស្ទង់មតិខាងលើ ដែលបានធ្វើឡើងក្នុងថ្ងៃព្រហស្បត្តិ៍ ជាមួយនឹងបណ្ដាជនអង់គ្លេសចំនួន ២០០០នាក់ បានប្រាប់​អោយដឹងដែរថា មនុស្សជាច្រើននាក់បានប្រកាន់ខ្ជាប់ នូវយោបល់របស់ខ្លួនរួចហើយ។

តែនៅមួយថ្ងៃក្រោយ លោកនាយករដ្ឋមន្ត្រី បានត្រឡប់មកប្រឹងប្រែង ធានាអះអាងអ្នកទទួលខុសត្រូវនយោបាយ និង​អ្នកជំនួញ នៅដាវ៉ូស (Davos ប្រទេសស្វីស) ក្នុងថ្ងៃព្រហស្បត្តិ័ ស្ដីពីអនាគតដ៏ចម្រូងចម្រាស់ របស់ប្រទេសលោក នៅ​ក្នុងសហគមអ៊ឺរ៉ុបឡើងវិញ។ នៅចំពោះមុខមនុស្សជាច្រើន ដែលបានលាក់នូវទុក្ខកង្វល់របស់ខ្លួនោះ លោកកាមើរូន ប្រកាសថា «មិនមែនជាការបែកខ្នងរកសហគមអ៊ឺរ៉ុបទេ តែផ្ទុយមកវិញ ទាំងស្រុង។ វាគួរដឹងថា តើធ្វើយ៉ាងដូចម្ដេច ដើម្បីជួយអោយអ៊ឺរ៉ុបមានភាពប្រលងប្រណាំង បើកទូលាយ ប្រែប្រួលផ្លាស់ប្ដូរ និងធានាថាប្រទេសអង់គ្លេស មានសម្លេងមួយនៅក្នុងនោះ៕»

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២៥ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ