រឿងរ៉ាវកាណូតខ្មោចជាច្រើន កំពុងលងប្រទេសជប៉ុន
- ដោយ: កេសរ កូល អត្ថបទ៖ កេសរកូល ([email protected]) - ភ្នំពេញ ថ្ងៃទី០៨ ធ្នូ ២០១៥
- កែប្រែចុងក្រោយ: December 11, 2015
- ប្រធានបទ: ខ្មោចសមុទ្រ
- អត្ថបទ: មានបញ្ហា?
- មតិ-យោបល់
-
តាំងពីខែតុលាមកម្លេះ ឆ្មាំសមុទ្ររបស់ប្រទេសជប៉ុន បានប្រទះយ៉ាងហោចកាណូតចំនួន១៤ នៅក្នុងសមុទ្រជប៉ុន (ឬសមុទ្រខាងកើត បើតាមការហៅរបស់ជនជាតិកូរ៉េ) ជាមួយនឹងសាកសពជាង២០នាក់ នៅក្នុងសភាពសល់តែគ្រោងឆ្អឹង។ អ្នកទទួលខុសត្រូវឆ្មាំសមុទ្រម្នាក់ លោក «Shuichi Hashizume» បាននិយាយថា៖ «អ្នកជ្រមុជទឹករបស់យើង បានរកឃើញសាកសព៣ កាលពីថ្ងៃទី២៣ខែវិច្ឆិកាកន្លងទៅ ក្នុងនោះសាកសពពីរ គ្មានក្បាលនោះទេ។ នៅពេលយើងស្រង់ កាណូតនោះឡើងមក យើងរកឃើញឆ្អឹងខ្មោច ចំនួន៦ទៀត នៅក្នុងនោះ។»
អ្វីដែលគេដឹងនៅពេលនោះ គឺកាណូតមួយចំនួន មានដាក់សញ្ញា តាមបែបជនជាតិកូរ៉េ ដែលធ្វើឲ្យគេគិតថា មកពីប្រទេសកូរ៉េខាងជើង តែគេនៅមិនទាន់ហ៊ានអះអាង ថាពិតនៅឡើយ។ រហូតលុះត្រាមកដល់ថ្ងៃព្រហស្បត្តិ៍សប្ដាហ៍មុន ទើបការអះអាង ពីប្រភពដើមរបស់កាណូត មានភាពច្បាស់លាស់ ដោយសារអាជ្ញាធរបានស្រង់កាណូតមួយទៀត នៅមិនឆ្ងាយប៉ុន្មាន ពីកោះ សាដូ (Sado)។ អ្នកនាំពាក្យឆ្មាំសមុទ្រ លោក «Hiromasa Suzuki» បានឲ្យដឹងថា នៅនឹងតួកាណូត មានអក្សរកូរ៉េ ហើយនៅខាងក្នុង មានកាបូបស្ពាយខ្នងមួយ ដែលគេបានរកឃើញ រូបលោក គីម ជុងអ៊ីល (Kim Jong-Il) បីតារបស់មេដឹកនាំ នៃរបបកុម្មុយនីសសព្វថ្ងៃ។
តាមពិតទៅ ករណីរកឃើញបែបនេះ មិនមែនជារឿងថ្មីទេ ព្រោះក្នុងរយៈពេល៥ឆ្នាំចុងក្រោយនេះ ការប្រទះឃើញករណីដដែលៗ បានកើតឡើងប្រមាណជា ២៥០ដងមកហើយ។ ប៉ុន្តែបើនិយាយថា ការប្រទះឃើញកាណូត និងសាកសពមនុស្សជាច្រើនផ្ទួនៗគ្នាដូច្នេះ នៅក្នុងរយៈពេលខ្លីបែបនេះ ជារឿងមួយដែលខុសធម្មតា។
អ្នកនេសាទដ៏ក្រខ្សត់...
មតិមួយចំនួនបានលើកឡើង ពីការរត់ភៀសខ្លួន របស់បណ្ដាជនកូរ៉េខាងជើង ចេញពីរបបកុម្មុយនីស។ ប៉ុន្តែការលើកឡើងនេះ មិនបានធ្វើឲ្យមានការជឿជាក់ប៉ុន្មានទេ ដោយហេតុថា ជនជាតិកូរ៉េខាងជើង សុខចិត្តភៀសខ្លួុន ចូលទៅកាន់ប្រទេសចិន តាមផ្លូវគោកសិន មុននឹងបន្តដំណើរភៀសខ្លួនរបស់ពួកគេ មករកប្រទេសកូរ៉េខាងត្បូងវិញ។ ការភៀសខ្លួនតាមទូកតូចៗដូច្នេះ នៅតាមសមុទ្រ មានលក្ខណៈគ្រោះថ្នាក់ ខ្លាំងជាងរត់ទៅប្រទេសចិន។
បើតាមអ្នកជំនាញ គេគ្រាន់តែជឿថា នេះអាចជាក្រុមអ្នកនេសាទខ្សត់ខ្សោយមួយចំនួន ដែលព្យាយាមឆ្លៀតឱកាស ចេញមករកត្រីចិញ្ចឹមជីវិត ឲ្យបានកាន់តែច្រើន តែត្រូវបានព្យុះសមុទ្រ បក់គូចទៅកណ្ដាលសមុទ្រ វង្វេងមិនដឹងទៅណា ទើបអត់ឃ្លាន ស្លាប់ទាំងអស់គ្នាយ៉ាងនេះ។
មិនទុកចិត្តកូរ៉េខាងជើង...
តាំងពីសម័យកាលសង្គ្រាម លោកលើកទីពីរនោះមក ប្រទេសជប៉ុននិងប្រទេសកូរ៉េ (ទាំងពីរ) ដែលមិនដែលមើលមុខគ្នាចំឡើយ ជាពិសេស ជាមួយប្រទេសកូរ៉េខាងជើងតែម្ដង។ កាលពីទសវត្សន៍ឆ្នាំ៧០ និង៨០ ជនជាតិជប៉ុនជាច្រើននាក់ ត្រូវបានប្រទេសកុម្មុយនីសចាប់ពង្រត់យកទៅ ដើម្បីឲ្យជនជាតិជប៉ុនទាំងនោះ បង្រៀនភាសា និងទំនៀមទម្លាប់ជប៉ុន ទៅដល់គិញ ឬចារបុរសស្ត្រីកូរ៉េខាងជើង ជាច្រើននាក់។ បូកបន្ថែមនឹងបញ្ហា បង្កើតអាវុធនុយក្លេអ៊ែរ របស់ប្រទេសកុម្មុយនីស នៅពេលនេះផង ប្រទេសជប៉ុនកាន់តែមិនទុកចិត្ត ប្រទេសកូរ៉េខាងជើង ទាក់ទងនឹងកាណូតខ្មោចទាំងនេះដដែល៕