នៅព្រឹកថ្ងៃទី១២ ខែវិច្ឆិកា ឆ្នាំ២០១៥ ករណីរកឃើញ សាកសពនារីវ័យក្មេង ដេលបានបាត់ខ្លួន និងការ​ចាប់​បាន ជនសង្ស័យនៅខេត្តបាត់ដំបង បានក្លាយជាប្រធានបទ ដ៏ល្បីមិនធម្មតា ដែលត្រូវបានចុះផ្សាយ ស្ទើ​តែ​គ្រប់​បណ្តាញសារពត័មាន និងជាពិសេស នៅតាមបណ្ដាញសង្គម។

រឿងដែលគួរឲ្យសោកសង្វេក របស់នារីវ័យក្មេងរងគ្រោះ គឺនៅពេល ដែលយុវជនជាសង្សារបស់នាង បាន​បង្ហោះ​សារឈឺចាប់ និងការសោកស្តាយ រកពាក្យថ្លែងមិនបាន នៅលើបណ្ដាញសង្គម។ យុវជនរូបនោះ បាន​សរសេរថា៖ «សូមឲ្យអូនទៅបានសេចក្តីសុខ ទៅឋានសួគ បើមាននិស្ស័យជាតិក្រោយ បងនឹងសុំ​ស្រលាញ់​អូន​ម្តងទៀត! បងចង់ប្រាប់ពីអារម្មណ៍ពិតរបស់បង ថាបងស្រលាញ់អូន ដូចធ្លាប់ប្រាប់បង អូន​ស្រលាញ់​បង។»។

សារពត័មានក្នុងស្រុកជាច្រើន បានរាយការណ៍ថា កាលពីវេលាម៉ោង០៧ព្រឹក ថ្ងៃទី១២ ខែវិច្ឆិកា ឆ្នាំ​២០១៥​នេះ នគរបាលស្រុកសង្កែ, និងនគរបាលក្រុងបាត់ដំបង បានចាប់ឃាត់ខ្លួនជនសង្ស័យ នៅនឹងផ្ទះរបស់​ជន​សង្ស័យតែម្ដង ដែលស្ថិតនៅភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង។

ជនសង្ស័យឈ្មោះ ចាន់ កុសល អាយុ២៣ឆ្នាំ មានទីលំនៅ ក្នុងភូមិកើតហេតុខាងលើ និងមានប្រពន្ធពោះធំ ។ ក្រោយពេលកើតហេតុ ជនសង្ស័យបានព្យាយាមពួនសំងំ ក្នុងចម្ការ តែត្រូវកម្លាំងនគរបាលនាំគ្នាស្វែងរក រហូតឃាត់ខ្លួនបានតែម្តង។ ចំណែកឯនារីរងគ្រោះ ដែលបាត់ខ្លួនឈ្មោះ ឆាំ ស្រីរ័ត្ន អាយុ១៨ឆ្នាំ ជាសិស្ស​ថ្នាក់​ទី១២ នៅវិទ្យាល័យនេតយ៉ង់ ។

នៅចំពោះមន្ត្រីស៊ើបអង្កេត ជនសង្ស័យបានសារភាពថា រូបគេពិតជាបានធ្វើសកម្មភាព ចាប់នារីរងគ្រោះ ក្នុង​បំណងចាប់រំលោភ តែត្រូវនាងតដៃ ដោយយកកន្ត្រៃ មកចាក់ចំ«ពោះ»របស់ខ្លួន ។ ពេលនោះ ដោយផ្ទុះ​កំហឹង​ខ្លាំង ខ្លួនបានធ្វើវាយ​ដំ​នាងរហូតដល់សន្លប់ រួចអូសនាងទៅមាត់ស្ទឹងដើម្បីរំលោភ។ តែឱកាសមិន​អំណោយ​ផល ខ្លួនក៏​អូស​នាង​ដល់​កណ្តាលស្ទឹង ហើយទម្លាក់នាងចោល នៅទីនោះ មុននឹងធ្វើការគេចខ្លួន៕