លោក សួន សេរីរដ្ឋា ថាគណបក្សរបស់លោក បានព្យាយាមអញ្ជើញលោក សម រង្ស៊ី មេដឹកនាំគណបក្ស​សង្គ្រោះជាតិ មកផ្តល់ជាបទពិសោធ និងបង្ហាញពីភាពជា ជាអ្នកដឹកនាំដល់យុវជន។ លោកបន្តថា តែមេ​គណបក្សធំមួយនេះ ហាក់ដូចជាមិនអើពើ និងយកចិត្តទុកដាក់មើលលិខិត នៃការអញ្ជើញនោះឡើយ។

លោក សួន សេរីរដ្ឋា បានលើកឡើងថា៖ «យើងអញ្ជើញមេដឹកនាំ គណបក្សសង្គ្រោះជាតិ អញ្ជើញលោក សម រង្ស៊ី ឲ្យគាត់ធ្វើជាវាគ្មិនមួយ ក្នុងកម្មវិធីភាពជាអ្នកដឹកនាំ។ (...) យើងព្យាយាមបោះដៃទៅ តែគេមិន​លើក​ដៃចាប់មកវិញ។ (...) បើឆ្លើយថា “yes” យើងសប្បាយចិត្ត បើឆ្លើយថា “No” គួតែមានមូលហេតុ ហេតុអ្វីបាន​ជា No។»

លោកបានចាត់ទុកភាពស្ងៀមស្ងាត់ នៃការឆ្លើយលិខិតរបស់លោក ពីមេបក្សប្រឆាំងរូបនេះថា ជាភាព​ឈ្លើយ​មួយ។ លោកថា លោក សម រង្ស៊ី បាននឹងកំពុងធ្វើការបំបែកផ្លូវ របស់អ្នកស្នេហាជាតិ តាមរយៈការមិន​ចាប់​ដៃ និយាយរកគ្នា ក្នងនាមបក្ស ក្រៅរដ្ឋាភិបាលដូចគ្នានោះ។ លោកបន្ថែមថា៖ «បើលោក សម រង្ស៊ី អាច​ទទួល​យកការអញ្ជើញរបស់យើង ចូលរួមក្នុងកម្មវិធីនេះ យើងអាចជជែកគ្នាបាន យើងអាចនិយាយគ្នា​បាន យើងក៏អាចរកផ្លូវថ្ងៃក្រោយ ធ្វើការជាមួយគ្នាបានដែរ។ (...) “yes” ក៏មិនឆ្លើយ “No” ក៏មិនឆ្លើយ។ “ឈ្លើយ” អត់​ឆ្លើយ​ចឹង តើអ្នកណាជាអ្នកបំបែកផ្លូវ។»

លោក សួន សេរីរដ្ឋា បានលើកសំដីលោក សម រង្ស៊ី ដែលធ្លាប់និយាយជាមួយលោកថា ការបង្កើត​គណបក្ស​ថ្មីនេះ (គណបក្សអំណាចខ្មែរ) ជាការបំបែកសម្លេង ពីគណបក្សសង្គ្រោះជាតិ។ មេបក្សអំណាចខ្មែរ បាន​អះ​អាង​ទៀតថា៖ «នេះជាការប្រមូលផ្តុំសម្លេង អ្នកសេ្នហាជាតិពិតប្រាកដ ដែលចង់ទៅដល់គោលដៅ... គាត់ (លោក សម រង្ស៊ី) ទេ ជាអ្នករត់ចោលអ្នកស្នេហាជាតិ។ គាត់ទេ ដែលជាអ្នកបំបែកផ្លូវ អ្នកស្នេហាជាតិ។»

ទស្សនានាវដ្តីមនោរម្យ.អាំងហ្វូ មិនអាចសុំប្រតិកម្មតប នឹងការអះអាងរបស់លោក សួន សេរីរដ្ឋា ពីអ្នកនាំ​ពាក្យគណបក្សសង្គ្រោះជាតិបានទេ ក្នុងថ្ងៃនេះដោយគ្មានអ្នកទទួលទូរស័ព្ទ។ តែលោក សម រង្ស៊ី ធ្លាប់​បាន​អះអាង និងលើកឡើងថា លោកមិនដែលចាប់អារម្មណ៍ នូវការលើកឡើង របស់គណបក្សតូចៗ ថាយ៉ាង​ណា​នោះឡើយ៕