ក្នុងកិច្ចប្រជុំពេញអង្គ របស់រដ្ឋសភាកម្ពុជា កាលពីថ្ងៃ៣០ ខែតុលា ឆ្នាំ២០១៥ កន្លងមកនេះ ក្រៅពីបង្រៀន​តំណាងរាស្រ្ត មកពីគណបក្សប្រជាជនកម្ពុជា ទាំង៦៨រូបនោះ លោក ហេង សំរិន ប្រធានរដ្ឋសភា ក៏បាន​បង្រៀន ប្រធានគណបក្សប្រជាជនកម្ពុជា និងជានាយករដ្ឋមន្រ្តី គឺលោក ហ៊ុន សែន ដែលកំពុងមានវត្តមាន ក្នុងអង្គប្រជុំរដ្ឋសភានោះដែរ។ ហើយលោក ហេង សំរិន ក៏បានបង្រៀន លោក ង៉ួន ញ៉ិល អនុប្រធានទីពីរ នៃរដ្ឋសភា និងលោក ស ខេង រដ្ឋមន្រ្តីក្រសួងមហាផ្ទៃ និងជាប្រធានក្រុមតំណាងរាស្រ្ត មតិភាគច្រើន ដែល​មានសន្លឹកឆ្នោតក្នុងដៃ ឲ្យគូស លើប្រអប់សរសេរថា «ព្រម»។

លោក ហេង សំរិន បានប្រកាស ក្នុងអង្គប្រជុំសភាទាំងមូល ថាត្រូវគូសថា «ព្រម»។ ប៉ុន្តែគេមិនដឹងជាមកពីអ្វី ទើបបាន«នាំមាត់» ប្រធានរដ្ឋសភារូបនេះ ឲ្យច្រឡំនិយាយថា គូសលើប្រអប់«មិនព្រម»។ បន្ទាប់ភ្លាមៗ​នោះ​ដែរ លោកក៏បានព្យាយាម ធ្វើការបកស្រាយវិញដែរថា គូសលើប្រអប់«ព្រម» វិញ។

ក្នុងភាពមិនអស់ចិត្ត និងមន្ទិល លោក (ហេង សំរិន )បានធ្វើការពន្យល់ជាថ្មី ទៅកាន់​តំណាងរាស្រ្ត​ក្នុង​អង្គ​ប្រជុំ នៃរដ្ឋសភាទាំងមូលថា៖ «មិនព្រម មានន័យថា មិនដក (លោក កឹម សុខា) ហើយយើងមើលទៅ “ព្រម” ហ្នឹងហើយ បោះឲ្យចំ “ព្រម” ហ្នឹង។»

ឯអ្នកសារព័ត៌មាន ដែលកំពុងតែថតសម្លេង វីដេអូ និងរូបថតផងនោះ បានសម្តែងនូវការហូសចិត្ត ដែល​ប្រធាន​រដ្ឋសភារូបនេះ បាននឹងកំពុងបង្រៀនតំណាងរាស្រ្ត និងនាយករដ្ឋមន្រ្តី ឲ្យចេះគូសលើសន្លឹកឆ្នោត ដែល​មាន​ប្រអប់បី តែឲ្យជ្រើសរើសយកតែមួយ លើប្រអប់ដែលមាន​សរសេរ​ថា «ព្រម» ដែលមានតម្លៃស្មើ នឹង​ការ​ទាមទារ​​ឲ្យ​ទម្លាក់លោក កឹម សុខា ពីតំណែងជាអនុប្រធានទីមួយ នៃរដ្ឋសភា៕