«កុំ​ឲ្យ​នរណា​ផ្សេង ថើប​មាត់​ទារក​របស់​អ្នក!»

សូមពិចារណា... មុននឹងអ្វីៗ ត្រូវហួសពេល។ នេះជាសារព្រមាន ហើយក៏ជាការចែករំលែក នូវបទ​ពិសោធន៍ របស់​ស្ត្រី​ជា​ម្ដាយ​ម្នាក់ ដែលកូនខ្ចីរបស់ខ្លួន ត្រូវបានរងគ្រោះ ព្រោះការប៉ះពាល់​អោបថើប ពី​សំណាក់​មនុស្ស​ខាង​ក្រៅ​គ្រួសារ។
Loading...
  • ដោយ: ឈូករ័ត្ន អត្ថបទ និងយកការណ៍៖ ឈូករ័ត្ន ([email protected]) - បារីស ថ្ងៃទី២០ តុលា ២០១៥
  • កែប្រែចុងក្រោយ: October 25, 2015
  • ប្រធានបទ: សុខភាព
  • អត្ថបទ: មានបញ្ហា?
  • មតិ-យោបល់

អ្នកស្រី ក្លែរ អេនដឺសុន (Claire Henderson) អ្នកម្ដាយវ័យក្មេងមួយរូប ដែលកំពុងនឹកស្ដាយក្រោយ បាន​បង្ហោះ​សារ«ព្រមាន»មួយ នៅលើគណនីហ្វេសប៊ុករបស់ខ្លួន ដើម្បីប្រាប់ដល់ម្ដាយឪពុក របស់ទារកដទៃទៀត ឲ្យ​ធ្វើការ​ហាមប្រាម កុំឲ្យនរណាម្នាក់ផ្សេង ក្រៅពីមនុស្សនៅក្នុងគ្រួសារ អោបថើបកូនខ្ចីរបស់ខ្លួន។

កូនរបស់នាង ទារិកា ប្រូគី (Brooke) បានចូលទៅសម្រាកពេទ្យ តាំងពី៥ថ្ងៃមកហើយ (បើគិតទៅនឹងថ្ងៃ ដែល​នាងបានបង្ហោះសារ នៅលើហ្វេសប៊ុក) ដោយសារអាការៈពងបែក រោលរាលនៅលើផ្ទៃមុខ បំពង់ករ និងនៅ​លើ​បបូរមាត់។ នាងតូចបានរងគ្រោះ ដោយសារមេរោគ អ៊ែរប៉េស (herpès simplex ឬគ្រុនពងបែក)  ដែលអាចធ្វើ​ឲ្យ​កុមារី ប្រូគី មានគ្រោះថ្នាក់ធ្ងន់ធ្ងរ (ដល់ជីវិត) បើព្យាបាលមិនទាន់។

រស់នៅក្នុងក្រុង «Doncaster» នៃចក្រភពអង់គ្លេស អ្នកស្រីបានពន្យល់ នៅលើទំព័រហ្វេសប៊ុករបស់ខ្លួនថា គ្រប់​មនុស្ស ដែលបានចាប់កូនរបស់នាង យកទៅ​អោប​ថើបនោះ សុទ្ធតែមនុស្សស្អាតល្អ មិនមែនមើលពី​ខាង​ក្រៅ ជាអ្នកស្មោគរោគនោះឡើយ។ អ្នកស្រីបាន​សរសេរ​ថា៖ «វាហាក់ដូចជាចង់មានការភ្ញាក់ផ្អើល នៅ​ចំពោះ​សារ​របស់​ខ្ញុំ។ ប៉ុន្តែ ប្រូគី បានស្ថិតក្នុងការសង្គ្រោះ ដោយការ​បន្តោងសេរ៉ូម អស់រយៈ​ពេល៥ថ្ងៃ។ កូនស្រី​ខ្ញុំ ពិត​ជា​មាន​សំណាង​ណាស់។»

«សូមកុំទុកឲ្យនរណាម្នាក់ អោបថើបកូនខ្ចីរបស់អ្នក ពីលើមាត់ឲ្យសោះ បើទោះជាមនុស្សនោះ គ្មានរោគ​សញ្ញា​អ្វីក៏ដោយ។ មនុស្សប្រមាណជា ៨៥% មានផ្ទុកមេរោគប្រភេទនេះ។» នេះជាបទពិសោធន៍ ដែលអ្នកស្រី ក្លែរ ថ្លែង​ទៅកាន់ឪពុកម្ដាយទាំងឡាយ ក្នុងលោក។

សូមរំលឹកជូនថា ជំងឺគ្រុនពងបែក ចម្លងតាមការរស់នៅកខ្វក់ និងការប៉ះពាល់តាមមាត់។ ទារកទើបនឹងកើត ដែលមានអង្គការពារប្រាណ នៅខ្សោយនោះ ងាយនឹងរងគ្រោះ ព្រោះមេរោគគ្រុនពងបែក ជាទីបំផុត។ មេរោគ​​នេះ អាច​សំងំ​នៅស្ងៀម មិនមានចេញអាការៈអ្វី នៅក្នុងខ្លួនមនុស្ស ក្នុងរយៈពេលរាប់សិបឆ្នាំ មុន​នឹង​ផ្ទុះ​រោគ​សញ្ញា នៅថ្ងៃ​ណា​មួយ។ នៅពេលដែលមនុស្សណាម្នាក់ បានធ្លាក់ខ្លួនឈឺជំងឺនេះ នៅពេលនោះ គេពិបាក​ក្នុង​ការ​ព្យាបាលវា ឲ្យជាសះណាស់ ឬអ្នកជំងឺអាចស្លាប់តែម្ដង៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...