រដ្ឋសភាកម្ពុជាបច្ចុប្បន្ន ហាក់ដូចជា«គ្មានន័យ» ឯ«គណកម្មការនានា នៃរដ្ឋសភា» ក៏គ្មានតម្លៃដូចគ្នាដែររ ព្រោះក្នុងរយៈកាលកន្លងមកនេះ ការធ្វើច្បាប់នៅកម្ពុជា ហាក់ស្ថិតក្នុងការសម្រេច របស់មនុស្សតែ ពីរនាក់​ប៉ុណ្ណោះ។ នេះបើតាមការលើកឡើង របស់លោក កែម ឡី អ្នកស្រាវជ្រាវ ផ្នែកសង្គម និងនយោបាយ​ដ៏ល្បី​ឈ្មោះ នៅកម្ពុជា។

ក្នុងកិច្ចសម្ភាស ជាមួយអ្នកសារព័ត៌មាន ក្នុងថ្ងៃទី៧ ខែតុលា ឆ្នាំ២០១៥នេះ លោក កែម ឡី បានថ្លែងនូវ​ការ​មើលឃើញ របស់លោកថា ទាំងរដ្ឋសភា ទាំងគណៈកម្មការជំនាញ នៃរដ្ឋសភា រួមទាំងតំណាងរាស្រ្ត សុទ្ធតែ​ជាអ្នកដែលគ្មានតម្លៃ ក្នុងកិច្ចការពិភាក្សារ ឬធ្វើច្បាប់នោះឡើយ។

លោកបានថ្លែងឡើងថា៖ «បើគ្រប់គ្រងតែពីរនាក់ហ្នឹង តាក់តែងច្បាប់តែពីរនាក់ហ្នឹង ចាំបាច់មានសភា អស់​លុយប្រជាពលរដ្ឋធ្វើអ្វី? ខ្ញុំមើលទៅ ឃើញជាក់ស្តែងអញ្ចឹង។ បើយើងបន្តនីតិវិធីអញ្ចឹង ការធ្វើវិសោធកម្ម​ច្បាប់ ស្តីពីការបោះឆ្នោត ក្រុមប្រឹក្សាឃុំ-សង្កាត់ វាគ្មានន័យអ្វីទេ។ (...) បើប្រធានក្រុមតំណាងរាស្រ្ត ភាគតិច ភាគច្រើន គេចង់បានយ៉ាងម៉េច វាទៅចឹងហើយ គ្មានការពិគ្រោះយោបល់អ្វីទេ។ (...) ហើយតំណាងរាស្រ្ត ក៏ត្រូវបានបាត់បង់សិទ្ធិ គេមិនឲ្យនិយាយ ព្រោះអីប្រធានក្រុមភាគតិច ភាគច្រើនព្រមព្រាងគ្នាអនុម័ត អស់​ហើយហ្នឹង។ (...) បើទោះបីជាគាត់ជជែក ក៏គ្មានន័យអ្វីដែរ ក៏មិនអាចកែប្រែអ្វីបានដែរ បើគេព្រមព្រៀង​គ្នា​ហើយនោះ។»

លោក កែម ឡី ដែលជាស្ថាបនិកគណបក្សប្រជាធិបតេយ្យមូលដ្ឋាន បានសង្កត់ធ្ងន់ថា «រដ្ឋសភា»បច្ចុប្បន្ន​នេះ គ្មានន័យអ្វី ចំពោះច្បាប់ឡើយ។ ហើយរដ្ឋសភានេះដដែល ក៏កំពុងត្រូវបានរំលោភអំណាច ដោយ​រដ្ឋាភិបាល ដែលជាអង្គនីតិប្រតិបត្តិ តាមរយៈប្រធានក្រុម តំណាងរាស្រ្តមតិភាគច្រើន នៃរដ្ឋសភា។

លោកបញ្ជាក់ថា៖ «ក្នុងក្រុមតំណាងរាស្រ្តមតិភាគច្រើន មានលោក ស ខេង លោក គាត ឈន់ និង ម៉ែន សំអន។ អ្នកទាំងបីនេះ សុទ្ធតែនៅក្នុងប៉ុស្តិ៍ ជាឧបនាយករដ្ឋមន្រ្តី ជារដ្ឋាភិបាល។ ដល់ពេលបីនាក់នោះ ទៅ​អនុម័តជាមួយអ្នកខាងនោះ(ប្រធានតំណាងរាស្រ្តមតិភាគតិច) សភាគ្មានន័យអ្វីទេ។»

លោកបានអះអាងបន្តថា «អញ្ចឹង រដ្ឋាភិបាលរំលោភសភា ពេញទីតែម្តង។ សភាចង់មានការជជែក លើ​ច្បាប់​នោះទៀតចប់បាត់។ ហើយច្បាប់ភាគច្រើន ឡើងពីរដ្ឋាភិបាលមក។ មកដល់សភា ប្រធានក្រុមភាគតិច​ស្កាត់ ដើម្បីយកអនុម័តខ្លួនឯងបាត់ហើយ។ ខ្ញុំមើលទៅ ឃើញអាក្រក់ជាងមុន ឆ្ងាយណាស់។ »៕