បើគេនិយាយពីភាពជោគជ័យដ៏ភ្ញាក់ផ្អើល របស់បទចម្រៀង «Gangnam Style» នៃអ្នកចម្រៀងកូរ៉េខាងត្បូងម្នាក់នោះ នៅក្នុងអំឡុងពេលចុង ឆ្នាំ២០១២កន្លងមកនេះ នៅក្នុងប្រទេសបារាំងឯណេះវិញ មានចម្រៀងមួយបទ ក៏បានធ្វើអោយ​គេនឹកឃើញ និងចាក់យកមកស្ដាប់ជាច្រើនដងដែរ។ ចម្រៀងនោះ មានចំណងជើងថា «Poussin Piou» ឬកូនមាន់ «ពីយូ»។ ដោយសារតែជោគជ័យរបស់វា មានបណ្ដាជនជាច្រើន បានប្រែក្លាយទំនុកបទចម្រៀងនេះ ដោយជំនួស​ដោយ​ទំនុកបទចម្រៀងដទៃៗទៀត ដើម្បីកំសាន្ដផ្ទាល់ខ្លួន បម្រើបុព្វហេតុអ្វីមួយ ឬជាការចំអកឡកឡឺយទៅអ្វីមួយ។

«គណបក្ស អ៊ុយ អឹម ប៉េ មិនដឹងជា"អាចម៍"ស្អីទេ»។  រូបភាពចម្លងពីអេក្រង់ របស់វីដេអូ។

សូមបញ្ជាក់ថា តាំងពីដាក់ក្លីបវីដេអូរបស់ខ្លួន ក្នុងគេហទំព័រចែកផ្សាយវីដេអូ យូធូប (Youtube) មកទល់នឹងពេលនេះ ចម្រៀងកូនមាន់«ពីយូ»នេះ មានមនុស្សចុចចូលទៅមើល ជាង ១៦លាននាក់។ សូមអញ្ជើញ ទស្សនាក្លីបវីដេអូ នៃចម្រៀង​នេះ ដូចតទៅ៖

ដោយឡែកកម្មវីធីមួយឈ្មោះថា ហ្គីញ៉ុលដឺឡាំងហ្វូ (Guignols de l’info) របស់ទូរទស្សន៍ឯកជន កាណាល់ភ្លីស (Canal+) ក្នុងប្រទេសបារាំង បានឆ្នៃបទចម្រៀងនេះ ដើម្បីរៀបរាប់ពីជម្លោះនយោបាយដ៏រ៉ាំរ៉ៃ នៅក្នុងគណបក្សស្ដាំនិយម អ៊ុយ អឹម ប៉េ របស់លោកអតីតប្រធានាធិបតី នីកូឡា ស្សាកូហ្សី (Nicolas Sarkozy)។ កម្មវិធីនេះ តែងយកតួអង្គអ្នក​នយោបាយ​ ឬ​អ្នកដែលមានឈ្មោះល្បីផ្សេងទៀត ទាំងក្នុងប្រទេសបារាំង ទាំងក្នុងពិភពលោក មកបង្កើតជាសាច់រឿង ចំអក ឬធ្វើឆាក​កំប្លុកកំប្លែង សម្រាប់ចាក់ផ្សាយតាមស្ថានីយនេះ នៅវេលាម៉ោង ០៧ម៉៥០នាទី យប់។ តែរាល់ការចំអក ឬឆាកកំប្លុកកំប្លែង​ណាក៏ដោយ ក៏សុទ្ធតែឆ្លុះបញ្ចាំងអោយឃើញ ពីសារធារណមតិទូទៅ ឬការវិភាគយល់ឃើញរបស់ អ្នកសារពត៌មាន ដែលគេមិនអាចចេញមកបកស្រាយបាន ជាចំហរ។

ចម្រៀងកូនមាន់ «ពីយូ» ដែលបម្លែងទៅជាចម្រៀងថ្មីនេះ ត្រូវបានគេដាក់ចំណងជើងអោយជាថ្មី ថា «ឡឺគ្រូប អា ហ្វីយ៉ុង (Le Groupe à Fillon) ឬក្រុមរបស់លោកហ្វីយ៉ុង»។ លោកហ្រ្វង់ស៊័រ ហ្វីយ៉ុង (François Fillon) អតីតនាយករដ្ឋមន្ត្រីបារាំង សម័យលោកប្រធានាធិបតី សាកូហ្សី ដែលបានជម្ទាស់នឹងលទ្ធផល នៃការបោះឆ្នោតជ្រើសរើសប្រធានរបសបក្ស កាល​ពីថ្ងៃអាទិត្យទី ១៨វិច្ឆិកា កន្លងទៅ ដែលបេក្ខជនម្នាក់ទៀត គឺលោកហ្សង់ ហ្វ្រង់ស៊័រ កូប៉េ (Jean-François Copé) បាន​ប្រកាសថាខ្លួនលោក ជាអ្នកឈ្នះក្នុងការបោះឆ្នោតផ្ទៃក្នុងនេះ។

ជម្លោះផ្ទៃក្នុងរបស់គណបក្សនេះ បានបែកអូរហូជាស្ទឺង ហើយរហូតមកដល់បច្ចុប្បន្ន គេនៅមិនទាន់ដឹងពីដំណោះស្រាយ ច្បាស់លាស់ និងពិតប្រាកដ ដើម្បីទំលាយភាពទាល់ច្រកនេះនៅឡើយ។ ហើយដើម្បីសរុបសេចក្ដី នៃជម្លោះមិនចេះចប់​មិនចេះហើយនេះ កម្មវិធីរបស់ទូរទស្សន៍មួយនេះ បានសង្ខេបបញ្ហានេះឡើងវិញ និងបានបញ្ចប់ចម្រៀង នៅឃ្លាចុង​ក្រោយថា «គណបក្ស អ៊ុយ អឹម ប៉េ មិនដឹងជា"អាចម៍"ស្អីទេ»។ សូមទស្សនាវីដេអូនេះ៖

-------------------------------------------------------
ដោយ សេក មនោរកុមារ - ប៉ារីស​ ថ្ងៃទី១១ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ