គណបក្សមួយរើសអើងពូជសាសន៍ នឹងធ្វើឲ្យកម្ពុជាមានសង្គ្រាម?
- ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី២៥ កញ្ញា ២០១៥
- កែប្រែចុងក្រោយ: September 28, 2015
- ប្រធានបទ: នយោបាយ
- អត្ថបទ: មានបញ្ហា?
- មតិ-យោបល់
-
គណបក្សសង្គ្រោះជាតិប្រឆាំង«ដាច់ខាត» នូវការរើសអើងជាតិសាសន៍ មិនថាសាសន៍ណានោះឡើយ។ នេះជាការថ្លែងអះអាង របស់លោក កឹម សុខា តបនឹងការលើកឡើង ក្នុងពេលកន្លងមក រប់ស់នាយករដ្ឋមន្ត្រីកម្ពុជា លោក ហ៊ុន សែន និងអ្នកគាំទ្រគណបក្សកាន់អំណាច ដែលតែងអះអាងថា គណបក្សសង្គ្រោះជាតិ ជាគណបក្សរើសអើង ជាពិសេសរើសអើង ចំពោះ«ជាតិសាសន៍វៀតណាម»។
ថ្លែងក្នុងពិធីបុណ្យ «រ៉ូយ៉ាហាជី» ជាមួយប្រជាពលរដ្ឋខ្មែរ-ឥស្លាម នៅភូមិអូរលយ ឃុំជើងគ្រាវ ស្រុករលាប្អៀរ ខេត្តកំពង់ឆ្នាំង អនុប្រធានទីមួយនៃរដ្ឋសភា និងអនុប្រធានគណបក្សសង្គ្រោះជាតិ បានប្រកាសថា គណបក្សសង្រ្គោះជាតិ មិនធ្លាប់មាន «គោលនយោបាយ រើសអើងជាតិសាសន៍» នោះឡើយ។ លោក កឺម សុខា បានចាត់ទុកអ្នករិះគន់ទាំងឡាយ ដែលគិតថា ខ្មែរមានការរើសអើងជាតិសាសន៍នោះ ថាជាការគិតខុស។
កម្ពុជានឹងមានសង្គ្រាម ព្រោះបក្សមួយរើសអើង?
បញ្ហានៃការរើសអើងជាតិសាសន៍ ត្រូវបានលោក ហ៊ុន សែន យកមកថ្លែង នៅក្នុងពិធីបិទសន្និបាត ស្តីពីការប្រឡងប្រណំាង ទីក្រុងស្អាត រមណីយដ្ឋានស្អាត សេវាល្អ កាលពីថ្ងៃទី២២ ខែកញ្ញាកន្លងមក ដោយលោកបានរិះគន់ចំៗ ទៅកាន់គណបក្សសង្គ្រោះជាតិ ប្រសិនជាគណបក្សប្រឆាំង ឡើងកាន់អំណាចនោះ កម្ពុជានឹងមានសង្គ្រាម ព្រោះតែគោលនយោបាយ នៃគណបក្សនេះ មានការរើសអើងវណ្ណៈ និងចាត់ទុកប្រទេសជិតខាង ជាសត្រូវរបស់ខ្លួន។
បុរសខ្លាំងកម្ពុជា ដែលកាន់អំណាច តាំងពីជាង៣ទសវត្សន៍ មកហើយនេះ បានថ្លែងឡើងថា៖ «នែ! អស់លោក ជាឧកញ៉ាទាំងឡាយ សុទ្ធតែជាសត្រូវវណ្ណៈ។ គេនឹងរឹបអូស អូតែល ឲ្យអ្នកក្រ។ អញ្ចឹង តើវានឹងសុខទេ ដែលខ្ញុំនិយាយថា វានឹងកើតសង្រ្គាម។ មិនមែនគ្មានហេតុផលទេ ព្រោះដោយសារចំណុចពីរ ដែលត្រូវលើកយកមកនិយាយ។ ចំណុចទីមួយ គឺចាត់ទុកអ្នកមាន ជាសត្រូវរបស់គេ បាត់ទៅហើយ។ ចំណុចទីពីរ យកប្រទេសជិតខាងជាសត្រូវ អញ្ចឹងរឿងអី វាមិនកើតសង្រ្គាម។»
ប៉ុន្តែមេដឹកនាំគណបក្សប្រឆាំង មិនបានទុកឲ្យការថ្លែងទាំងអស់នេះ ត្រូវបានធ្វើដោយគ្មានប្រតិកម្មនោះឡើយ។ លោក កឹម សុខា បានថ្លែងថា៖ «គណបក្សសង្រ្គោះជាតិ ជាគណបក្សមួយគោរពនូវសិទ្ធិ សេរីភាព ជំនឿសាសនា ទំនៀមទម្លាប់ ប្រពៃណី ទាំងអស់។ ហើយយើងដាច់ខាតប្រឆាំង នឹងការរើងអើងពូជសាសន៍។ ក៏ប៉ុន្តែយើងត្រូវការពារ នូវអធិបតេយ្យភាព បូរណភាពទឹកដី សម្រាប់ពួកយើងទាំងអស់គ្នា។»
ការរើសអើង... ជាការព្រួយបាម្ភ របស់ប្រទេសនីមួយៗ!
ក្នុងអំឡុងពេល មកបំពេញបេសកម្មជាផ្លូវការ នៅកម្ពុជាប្រមាណជា៩ថ្ងៃ របស់អ្នកស្រី រ៉ូណា ស្មីត (Rhona Smith) អ្នករាយការណ៍ពិសេស របស់អង្គការសហប្រជាជាតិ (អ.ស.ប) ទទួលបន្ទុកសិទ្ធិមនុស្ស ប្រចាំកម្ពុជា ទាំងប្រមុខរដ្ឋាភិបាល ទាំងថ្នាក់ដឹកនាំគណបក្សសង្គ្រោះជាតិ សុទ្ធតែបានស្នើទៅ មន្ត្រីអង្គការសហប្រជាជាតិរូបនេះ ឲ្យជួយពិនិត្យ ទៅលើការ«រើសអើងពូជសាសន៍»នៅកម្ពុជា។
អ្នកស្រី រ៉ូណា ស្មីត បានថ្លែងនៅសន្និសីទសារព័ត៌មាន ក្រោយបញ្ចប់ដំណើរទស្សនកិច្ច នៅប្រទេសកម្ពុជាថា៖ «តាមទស្សនៈរបស់ខ្ញុំ ការរើសអើងពូជសាសន៍ គឺជាបញ្ហានៃការព្រួយបារម្ភ របស់ប្រទេសនីមួយៗ។ (...) នៅក្នុងលំហរនយោបាយកម្ពុជា មិនគួរមានការរើសអើងពូជសាសន៍ ការស្អប់ខ្ពើមជនបរទេស និងការរើសអើង ប្រភេទណាមួយឡើយ។»
» ខាងក្រោមនេះ ជាការលើកឡើងទាំងស្រុង របស់លោក កឹម សុខា ក្នុងខួបលើកទី២២ នៃការប្រកាសដាក់ឲ្យប្រើប្រាស់រដ្ឋធម្មនុញ្ញ នៅខេត្តកំពង់ឆ្នាំង៖
------------