មានផ្ទះ មានដី បែរជាត្រូវគេធ្វើជញ្ជាំងរបង បិតមិនឲ្យចេញចូលរួច។ ករណីនេះ ត្រូវបានពលរដ្ឋ​ដែលរងការ​ប៉ះ​ពាល់ បរិហារពីការប្រើប្រាស់អំណាច របស់ជនមួយចំនួន ដើម្បីធ្វើការរំលោភបំពាន ទៅលើសិទ្ធិពលរដ្ឋ និងដី​សមូហភាព។ តែសម្រាប់អាជ្ញាធរមូលដ្ឋានវិញ បានពន្យល់ថា មិនមែនគ្មានភ្លើង ហើយមានផ្សែង​នោះ​ទេ។ រឿង​រ៉ាវបានកើតឡើង នៅក្នុងផ្សារភ្នំដិល ភូមិភ្នំដិល ឃុំតាំងក្រាំង ស្រុកបាធាយ ខេត្ដកំពង់ចាម តាំង​ពី​ច្រើន​ខែ​មក​ហើយ តែរហូតមកដល់ថ្ងៃនេះ គេមិនទាន់ឃើញ មានដំណោះស្រាយអ្វីនៅឡើយ។

លោក ម៉ុត សៀងហៃ ដែលត្រូវជាកូនប្រុសម្ចាស់ផ្ទះ ដែលរងការប៉ះពាល់នេះ បានអះអាងថា ក្រុម​គ្រួសារ​លោក ត្រូវបានសមាជិកក្រុមប្រឹក្សាស្រុក បាធាយ ម្នាក់ឈ្មោះ គង់ ណន អាងអំណាចជា«ជីតា» របស់​អភិបាល​ស្រុក​បាធាយ មកធ្វើរបងថ្ម លើដីផ្សារភ្នំឌិល (ដីសមូហភាព) ហើយបានបិទច្រកចេញ-ចូលផ្ទះ បើកជាហាងលក់​គុយទាវ របស់គ្រួសារលោក ស្ថិតនៅចុងឬក្រោយ ផ្សារភ្នំដិល។

ក្នុងកិច្ចសម្ភាស ជាមួយទស្សនាវដ្តីមនោរម្យ.អាំងហ្វូ លោក សៀងហៃ បានឲ្យដឹងថា ក្នុងចំណោមផ្ទះចុង​ផ្សារ​ជាច្រើននោះ មិនត្រូវបានលោក គង់ ណន ធ្វើរបង ឬជញ្ជាំងបិទទេ តែផ្ទុយមកវិញ លោក គង់ ណន បានបិទ​តែហាងលក់គុយទាវ របស់ឪពុកម្តាយលោក តែមួយប៉ុណ្ណោះ (ខណផ្ទះថ្មធំ និងផ្ទះជិតនោះមួយចំនួនទៀត នៅ​ក្បែរផ្ទះរបស់លោក មិនត្រូវបានបិទឡើយ)។ លោក ម៉ុត សៀងហៃ បានរៀបរាប់ទៀតថា មុននឹងកណី​នេះ​កើត​ឡើង លោក គង់ ណន បានដើរផ្តិតមេដៃ ពីពលរដ្ឋផ្សេងទៀត ក្រោមហេតុផលថា ស្នើរដាក់​អំពូល​ភ្លើង​បំភ្លឺ។ លុះក្រោយមក ក៏ស្រាប់តែយកស្នាមមេដៃ ដែលភាគច្រើន ជាកូនក្មួយរបស់ខ្លួន ជាង៣០នាក់នោះ មកសំអាង​ថា គាំទ្រឲ្យធ្វើរបងបិទច្រកចូលផ្ទះលោកតែម្តង។

ម្ដាយឪពុករបស់លោក សៀងហៃ គឺអ្នកស្រី អួង សុខុម អាយុ៥០ឆ្នាំ ជាអ្នកលក់គូយទាវ​ក្នុងហាងនេះ និង​លោក ឈឹម សៀងហុង អាយុ៦៥ឆ្នាំ ជាប្ដី ហើយកំពុងមានជំងឺលើសឈាម ប្រចាំកាយផង។ លោក សៀងហៃ បាន​បន្តទៀតថា លោក គង់ ណន សមាជិកក្រុមប្រឹក្សា បញ្ជាឲ្យកូនក្មួយរបស់ខ្លួន រៀប​របង​បិទ​ច្រក​ចេញ-ចូល នៅ​ថ្ងៃទី៦ ខែសីហា ហើយបានរំកិលរោង និងពាងទឹក មកដាក់ពាំង នៅថ្ងៃទី១៧ ខែសីហា​បន្ថែមទៀត ធ្វើឲ្យក្រុម​គ្រួសារ​លោក កាន់តែពិបាក ក្នុងការចេញចូលខ្លាំងឡើង។

រហូតមកដល់ថ្ងៃទី២៦ ខែកញ្ញា ដំណោះស្រាយចំពោះវិវាតនេះ នៅមិនទាន់មានពន្លឺនៅឡើយ បើទោះជា​គ្រួសារ​ពលរដ្ឋ ដែលរងការប៉ះពាល់ខាងលើ បានស្វែងរកកិច្ចអន្តរាគមន៍ ពីអាជ្ញាធរមូលដ្ឋាន គ្រប់ជាន់ថ្នាក់ក៏​ដោយ។ លោក ម៉ុត សៀងហៃ បានបរិហារទៀតថា អាជ្ញាធរទាំងថ្នាក់ឃុំ និងថ្នាក់ស្រុក គឺសុទ្ធតែឃុបឃិត និង​ត្រូវ​គ្នា ដូច​ប៉ី និងទ្រ។

លោក កុយ ណន មេឃុំតាំក្រាំង ស្រុកបាធាយ បានថ្លែងប្រាប់ទស្សនាវដ្តីមនោរម្យ.អាំងហ្វូ ទទួលស្គាល់ថា ការ​បិទររបងថ្ម ដែលធ្វើឡើងដោយលោក គង់ ណន នោះពិតជា«មិនត្រឹមត្រូវឡើយ» ប៉ុន្តែទាំងនេះ សុទ្ធ​តែ​មាន​មូលហេតុរបស់វា។ លោកបានធ្វើការរំលឹកថា ដើមឡើយផ្ទះនោះ មានសភាពតូចទេ តែក្រោយមក ស្រាប់​​តែ​ធ្វើ​ធំឡើងៗ ដោយមិនបានប្រាប់អាជ្ញាធរមូលដ្ខាន ឲ្យបានដឹង។ ចំពោះដំណោះស្រាយវិញ ត្រូវបាន​លោកមេឃុំ​អះ​អាងថា សំណុំរឿងបានឡើង ទៅដល់ថ្នាក់ស្រុក ហើយកំពុងធ្វើការសម្របសម្រួល។

គេនៅមិនទាន់ដឹងថា តើការសង់ហាងគុយទាវ ជាការកាប់កាប់ដីធ្លី ធ្វើអាជីវកម្ម ពី​សំណាក់​​ពលរដ្ឋខាងលើ ដោយ​មាន​ការអនុញ្ញាត  ឬយ៉ាងណាទេ។ ទាក់ទងនឹងករណីនេះ លោក ម៉ុត សៀងហៃ បានរៀបរាប់ថា៖ «នៅ​​ក្នុង​ផ្សារ​ភ្នំ​ដិល​​ទាំងអស់ហ្នឹង ដីនៅទីនោះ មិនមែនជាដីរបស់បុគ្គលណាមួយ ឬមានកម្មសិទ្ធិផ្ទាល់ខ្លួន ជា​អចលនៈ​​ទ្រព្យ​អ្វី​ឡើយ។ ជាដីរបស់រដ្ឋទាំងអស់ ប្រជាពលរដ្ឋរស់នៅទីនោះ តាមបែបវប្បធម៌ និងប្របៃណី ក្នុង​ការ​សាង​សង់​​រោង និងផ្ទះជុំវិញផ្សារ។» លោក សៀងហៃ បានចាត់ទុកថា នេះ ជាការរំលោភ​បំពាន​សិទ្ធិ​ពលរដ្ឋ និង​ដី​សមូហភាព យ៉ាងពិតប្រាកដ។

លោក ឡោ ចាន់លី អភិបាលស្រុកបាធាយ ដែលត្រូវជា«ចៅ» របស់លោក គង់ ណន់ មិនអាចភ្ជាប់​ទំនាក់​ទំនង ដើម្បីសុំការបកស្រាយបានទេ ក្នុងថ្ងៃនេះ។ ទស្សនាវដ្តីមនោរម្យ.អាំងហ្វូ ក៏មិនអាចសុំការបញ្ជាក់ ពី​លោក គង់ ណន សមាជិកក្រុមប្រឹក្សាស្រុកបាធាយ ចំពោះការចោទប្រកាន់ខាងលើនេះ បានដែរ។

បើតាមការអះអាង របស់លោក កុយ ណន មេឃុំតាំក្រាំងដដែល បានលើកឡើងថា ខាងស្រុកបានធ្វើការ​សម្រប​​សម្រួល ចំនួនពីរលើកហើយ។ ដើមឡើយ ខាងលោក ឈឹម សៀងហុង មិនព្រមទេ។ លុះលើកទីពីរ លោក ឈឹម សៀងហុង ព្រម តែលោក គង់ ណន មិនព្រមវិញម្តង។ លោកមេឃុំ បានបន្តថា បើភាគីមិន​ត្រូវ​គ្នាទេ ករណី​នេះ​នឹង​បញ្ជូន​ទៅ​កាន់​លោក លន់ លឹមថៃ អភិបាលខេត្ដកំពង់ចាម ដើម្បីដោះស្រាយបន្ត៕