ករណីគ្រោះថ្នាក់ចរាចរណ៍នេះបានកើតឡើង នៅវេលាម៉ោង ១១ និង ៣០ នាទីថ្ងៃទី១៧ ខែកញ្ញា ឆ្នាំ២០១៥ នៅ​តាមបណ្តោយផ្លូវជាតិ៦A ត្រង់ចន្លោះស្ពានលេខ២៣ និង២៤ ស្ថិតនៅក្នុង ភូមិក្រងស្វាយ ឃុំស្វាយអំពារ ស្រុក​មុខកំពូល ខេត្តកណ្តាល។ បុរសរងគ្រោះ ត្រូវបានគេស្គាល់ឈ្មោះ ជា សារ៉ាត អាយុ៤៨ឆ្នាំ រស់នៅ​ភូមិឃុំកើត​ហេតុ ខាងលើ។

តាមសំដីប្រជាពលរដ្ន នៅកន្លែងកើតហេតុ បានប្រាប់ឲ្យដឹងថា គេឃើញបុរសស្រវឹងស្រាខាងលើ ជិះម៉ូតូ​ម្នាក់​ឯង មកបុកគូទរថយន្តមួយទំហឹង ដែលកំពុងចតនៅចិញ្ចើមផ្លូវ។ អ្នកបើកបររថយន្ដ បានឡើងលើរថយន្ត​របស់​ខ្លួន ដើម្បីយកប្លាស្ទិច (កៅស៊ូតង) មកគ្របថ្មពីលើ។ បុរសស្រវឹងស្រា ដែលបានជិះម៉ូតូ មកបុកគូទរថយន្ត កំពុង​ចតនៅស្ងៀមនេះ បានស្លាប់ភ្លាមៗ នៅនឹងកន្លែង។

បុរសរងគ្រោះ ជិះម៉ូតូហុងដាឌ្រីម C១២៥ ពណ៍ខ្មៅ ពាក់ស្លាក់លេខ ភ្នំពេញ១W-៧៩៩៧ បើកបរក្នុងទិសដៅ​ស្របគ្នា។ រីឯរថយន្តដឹកថ្ម ប្រភេទ ហ៊ីយ៉ាន់ដាយ ពណ៍ស ពាក់ស្លាកលេខ ភ្នំពេញ ៣A-៧៧៥២ បើកបរដោយ​បុរសម្នាក់ឈ្មោះ យ៉ាន់ សុជាតា អាយុ២៧ឆ្នាំ មានទីលំនៅភូមិច្រកកូវ ឃុំពាម ស្រុកសាមគ្គីមានជ័យ ខេត្ត​កំពង់ឆ្នាំង។

តាមសំដីអ្នកបើកបរឡាន បានឲ្យដឹងថា មុននឹងគាត់ចតរថយន្ត គាត់បានមើលឆ្វេងស្តាំ គ្មានឃើញម៉ូតូទេ។ តែ​ពេលឡើងលើដំបូលរថយន្ត ដើម្បីយកកៅស៊ូតង់ មកគ្របថ្ម មិនទាន់នឹងបានគ្របផង ស្រាប់តែគេស្រែក​ប្រាប់​ថា ម៉ូតូបុកគូទរថយន្តរបស់គាត់ហើយ។ ភ្លាមៗនោះ ម្ចាស់រថយន្តបានចុះពីលើមក មើលឃើញម៉ូតូបុក​គូទរថយន្ត​របស់​គាត់មែន។

ក្រោយការកើតហេតុ ក្រុមសមត្តកិច្ចបានចុះមកធ្វើការវាស់វែង រួចបានយករថយន្ត និងម្ចាស់ ព្រមទាំងម៉ូតូ ទៅ​កាន់​ការិយាល័យចរាចរណ៍ស្រុក ដើម្បីធ្វើការដោះស្រាយគ្នា តាមច្បាប់។ រីឯសាកសពជានរងគ្រោះ ត្រូវបាន​សមត្ថកិច្ច​ប្រគល់ឲ្យសាច់ញាតិ យកទៅធ្វើបុណ្យតាមប្រពៃណី៕