នៅរសៀលថ្ងៃទី១៤ ខែកញ្ញាឆ្នាំ២០១៥នេះ កម្លាំងចម្រុះខណ្ឌសែនសុខ បានសហការ ជាមួយព្រះរាជ្ញារង អម​សាលាដំបូងរាជធានីភ្នំពេញ លោក កែវ សុជាតិ ចុះធ្វើការឃាត់ខ្លួន ក្រុមគ្រួសាររកស៊ីខុសច្បាប់មួយកន្លែង ជំនាញ​ខាងចាក់កន្ទុយលេខ នៅផ្ទះលេខ៥៦ ផ្លូវលំភូមិត្រពាំងឈូក សង្កាត់ទឹកថ្លា ខណ្ឌសែនសុខ រាជធានី​ភ្នំពេញ។ ក្រុមអាជ្ញាធរ បានឃាត់ខ្លួន ស្រ្តីបុរសជាម្ចាស់ផ្ទះចំនួន០៤នាក់ និងសម្ភារៈប្រើប្រាស់ សម្រាប់ចាក់​កន្ទុយ​លេខ មួយចំនួនទៀត។

ជនប្រព្រឹត្តទីមួយ ឈ្មោះ សុខ ទីណា អាយុ៤៨ឆ្នាំជាប្តី ទីពីរឈ្មោះ ចាន់ ដានី អាយុ ៣៦ឆ្នាំជាប្រពន្ធ រួមទាំង​អ្នក​ស្នាក់នៅជាមួយ និងជួយជ្រោមជ្រែង ក្នុងរបរខុសច្បាប់នេះ ពីរនាក់ទៀត ឈ្មោះ គង់ រ៉ែម អាយុ២៦ឆ្នាំ និង​ម្នាក់​ទៀតឈ្មោះ ចាន់ នី អាយុ៤៩ឆ្នាំ។ ក្នុងពេលចុះបង្ក្រាប សមត្ថកិច្ចនគរបាល​បានរកឃើញ វត្ថុតាងមួយ​ចំនួន​ដូច​ជា សៀវភៅកត់កន្ទុយលេខ ជាច្រើនក្បាល ប្រាក់រៀលមួយលាន ហាសិបប្រាំបីម៉ឺនរៀល និងប្រាក់ដុល្លារ ជាង​១០០ដុល្លារ រួមទាំងម៉ូតូពីរគ្រឿង និងទូរស័ព្ទ០២គ្រឿង ផងដែរ។

តាមសម្តីប្រជាពលរដ្ឋ នៅទីតាំងខាងលើ បានប្រាប់ទស្សនាវដ្ដីមនោរម្យ.អាំងហ្វួឲ្យដឹងថា ទីតាំងចាក់កន្ទុយ​លេខនេះ មិនដែលមាន មន្រ្តីនគរបាលណា ចុះធ្វើអន្តរាគមន៍នោះទេ រហូតដល់រសៀលនេះ ទើបមានកិច្ច​អន្តរាគមន៍ ធ្វើឲ្យអ្នកភូមិត្រពាំងឈូក នៅម្តុំទីតាំងផ្ទះចាក់កន្ទុយលេខ មានការភ្ញាក់ផ្អើលយ៉ាងខ្លាំង។ ប៉ុន្តែ​អ្នកភូមិនៅទីនោះ ហាក់ដូចជាសម្ដែង ការសប្បាយចិត្ត ដោយពួកគាតបានគិតថា នឹងមានសភាព​ស្ងប់ស្ងាត់​ជាង​ពីមុន។ អ្នកភូមិខ្លះនិយាយថា មិនសូវបារម្ភខ្លាច មានបញ្ហាលួចម៉ូតូ ឬឆក់កាបូបច្រើនដូចមុនទៀត ព្រោះ​អ្នក​ញៀន«ចាក់កន្ទុយលេខ» ត្រូវការលុយមកប្រព្រឹត្ត ឬមកចាក់៕