មនុស្សយន្ដប្រែរូបពិត ១០ឆ្នាំបន្ទាប់ពីចេញបញ្ចាំងក្នុងភាពយន្ដ
ជាលទ្ធផល ដែលគួរអោយកត់សម្គាល់ ចេញពីការស្រាវជ្រាវ ដែលបានធ្វើក្នុងរយះពេលដប់ឆ្នាំមកនេះ បន្ទាប់ពីភាពយន្ដទីមួយ នៃរឿង«មនុស្សយន្តប្រែរូប (Transformers)» របស់ផលិតកម្មភាពយន្ត នៅហូលីវូដ បានចេញបញ្ចាំងនៅតាមរោង។
មនុស្សយន្ត ប្រែរូបពីរថយន្ត។ រូបថត ក្រុមហ៊ុន។
ក្នុងការជូនដំណឹងដំបូងៗ ជារូបថតនោះ វាបានធ្វើអោយយើងជឿថា ជាការកាត់តរូបភាពមួយ ប្រកបដោយភាពប៉ិនប្រសព្វ របស់អ្នកជំនាញណាម្នាក់។ តែនេះមិនមែនដូច្នេះឡើយ ក្រុមហ៊ុនផលិតមនុស្សយន្តរបស់ប្រទេសជប៉ុនមួយ ឈ្មោះ ប៊្រាវ រ៉ូបូទីក (Brave Robotics) បានសម្រេចជាស្ថាពរ នូវមនុស្សយន្ដមួយដូច មនុស្សយន្ដនៅក្នុងភាពយន្ដ ដែលអាចប្រែរូបពីរថយន្ដ។ មនុស្សយន្ដនេះ មានទំហំតូចជាង១២ដង ហើយអាចធ្វើដំណើរបន្លាស់ទីបាន នៅគ្រប់ពេល ទាំងពេលវានៅជារថយន្ដ ឬក្លាយជាមនុស្សយន្ត។
មិនត្រឹមតែប៉ុណ្ណោះ វាមានសមត្ថភាពអាចថតវីដេអូបាន ដោយប្រើបច្ចេកវិទ្យា«គ្មានខ្សែរ (WiFi)» និងអាចបាញ់កាំជ្រួច (កាំជ្រួចផ្លាស្ទីក) បានថែមទៀត។
ជាជំហ៊ានដំបូង ក្រុមហ៊ុនផលិតមនុស្សយន្តនេះ តែត្រឹមទំហំនេះសិន តែក្រុមហ៊ុនមានគម្រោង នឹងផលិតមនុស្សក្នុងទំហំពិតមួយ នៅឆ្នាំ២០៣០ខាងមុខ ហើយនឹងអាចទទួលមនុស្ស អោយចូលទៅបញ្ជា នៅក្នុងនោះបានទៀត។ មនុស្សយន្ដទំហំពិតនេះ នឹងបំពាក់ទៅដោយវិទ្យាសាស្ត្រ កម្រិតខ្ពស់យ៉ាងទំនើប។
យើងនៅចាំមើល ពីមនុស្សយន្ដទំហំពិតនេះ ក្នុងជាង១៨ឆ្នាំទៅមុខ។ ប៉ុន្តែអ្វីដែលគួរអោយយើងជឿជាក់បាន ជនជាតិជប៉ុនមានទម្លាប់មួយយ៉ាងពិសេស ដែលមិនសូវជាចេះលេងសើច ជាមួយនឹងគម្រោងដែលខ្លួនឯង បានប្រកាសរួចហើយនោះទេ៕
សូមទស្សនាវីដេអូទាំងពីរ និងរូបភាពមួយចំនួន ដែលនិយាយពីផលិតផលសម្រេច នៃមនុស្សយន្តនេះ និងការសិក្សាពិសោធន៍នានា ក្នុងពេលធ្វើមនុស្សយន្ត៖
------------------------------------------------
ដោយ ៖ កេសរកូល - ភ្នំពេញ ថ្ងៃទី០៦ ខែមករា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ