ការចុះផ្សាយពីរឿងរ៉ាវផ្ទាល់ខ្លួន របស់តារាកំប្លែង អ្នកនាង ខ្ញុង ពីសំណាក់សារព័ត៌មានក្នុងស្រុកមួយចំនួន បានធ្វើឲ្យអ្នកនាង ស្រេង សុកាន់ដា ហៅ ខ្ញុង ចេញមុខមកធ្វើប្រតិកម្មខ្លាំងៗ។ មិនត្រឹមតែការចុះ​ផ្សាយ​របស់​សារព័ត៌មានទេ តែអ្នកនាង ខ្ញុង ក៏បានសម្ដែងការមិនសប្បាយចិត្ត ទៅលើការបេញ្ចេញយោបល់ ឬការបន្ទរ របស់អ្នកប្រើប្រាស់បណ្ដាញសង្គមមួយចំនួន ដែលមានលក្ខណៈជេរប្រទេច និងការរិះគន់ មិនប្រកប​ដោយ​ការ​ស្ថាបនានោះ។

តើការក្ដៅក្រហាយរបស់នាង ស្រេង សុកាន់ដា មានដល់កម្រិតណា ទើបតារាកំប្លែងដ៏មានប្រជាប្រិយរូបនេះ ទ្រាំមិនបាន រហូតចេញជាវីដេអូប្រតិកម្ម នៅលើបណ្ដាញសង្គម តបមកខាងសារព័ត៌មាន និងក្រុមអ្នកលេង​ហ្វេសប៊ុកវិញ?

តាមពិតទៅ ការចុះផ្សាយនោះ ជាការដកស្រង់សម្ដី​របស់អ្នកនាង ខ្ញុង ខ្លួនឯង ដែលបានផ្ដល់កិច្ចសម្ភាស ទៅ​សារព័ត៌មាន​ក្នុងស្រុកនោះ។ តារាមេម៉ាយកូនមួយរូបនេះ បានថ្លែងនៅក្នុងកិច្ចសម្ភាសនោះថា៖ «​ធ្លាប់មាន​ប្តី​ម្ដង​ហើយ ហើយក៏​មិន​រើសអើង​ថា ចាស់​ក្មេង​ទេ ប៉ុន្តែ​ក៏​មិន​ទទួលយក​ដែរ​ បើ​បុរស​នោះ​មានទ្រព្យ​តិចជាង​ខ្ញុំ ព្រោះ​ខ្ញុំ​មិន​ចង់យក​ប្តី​ មក​ចិញ្ចឹម​នោះទេ​»។

ការថ្លែងរបស់នាង ខ្ញុង មិនពិបាកឲ្យអ្នកផងយល់នោះទេ បើគេយោងទៅលើចំណូល​ ពី​សិល្បៈរបស់នាង ដែល​បានធ្វើឲ្យនាង មានជីវភាពធូរធា មានផ្ទះធំទ្រនំខ្ពស់នៅ មានរថយន្ដសេរីទំនើបជិះ... ។ល។ បើអញ្ចឹង តើ​បុរសដែលមានទ្រព្យច្រើនជាងនាង គួរតែជានរណាទៅ? អាចថា ជាមហាសេដ្ឋីផងក៏មិនដឹង។ នេះបើ​តាម​ការចុះផ្សាយ របស់សារព័ត៌មានទាំងនោះ។

តែផ្ទុយទៅវិញ ការលើកឡើងរបស់សារព័ត៌មានទាំងនោះ ត្រូវបាននាង ខ្ញុង ចាត់ទុកថា ជាការពន្លើសដើម្បី​ផល​ប្រយោជន៍ផ្ទាល់ខ្លួន។ នៅក្នុងវីដេអូថតដោយខ្លួននាង បង្ហោះនៅលើទំព័រហ្វេសប៊ុកផ្លូវការ របស់​តារា​កំប្លែង នាង ខ្ញុង បានថ្លែងថា បើខាងសារព័ត៍មាន ទទួលបានព័ត៌មានពីនាងប៉ុណ្ណា សូមចុះតែប៉ុណ្ណឹងបាន​ហើយ សូមកុំពន្លើស ឬប្រឌិតរឿង របស់តារាបន្ថែម ដើម្បីតែផលប្រយោជន៍របស់ខ្លួន ដោយបំផ្លាញដល់​កិត្តិយស របស់អ្នកដ៏ទៃ។

បន្ថែមពីលើករណីរបស់សារព័ត៌មាន តារាកំប្លែងរូបនេះ ក៏បានសំនូមពរ ដល់អ្នកលេងហ្វេសប៊ុកទាំងអស់ សូម​កុំប្រើពាក្យជេប្រទេច ឬពាក្យ អសុរស មកលើអ្នកដ៏ទៃ ទាំងមិនទាន់ដឹងថា រឿងនោះពិត ឬមិនពិតផង។ នាងបន្តទៀតថា សូមគិត ពិចារណា ឲ្យបានច្បាស់លាស់ មុននឹងធ្វើការរិះគន់ ឬជេរប្រមាថ ចំពោះអ្នកណា​ម្នាក់៕

-----------------