គេចាំបានថា ក្នុងឆ្នាំ២០១២ ក្នុងអាណត្តិទី៤ មុនការបោះឆ្នោត លោក ហ៊ុន សែន បានសន្យាថា បើអស់ព្រៃ លោក (ហ៊ុន សែន) នឹងកាត់ក្បាលរបស់លោក ដោយផ្ទាល់ចោល។ ជាមួយនឹងការដាក់គម្នាប លើមន្រ្តី​ក្រោម​ឱវាទ និងឈ្មួញទាំងឡាយ ដែលកំពង់រកស៊ីកាប់ឈើ លោកបានលើកឡើងថា បើអ្នកទាំងនោះ ហ៊ានបន្ត​កាប់​ឈើទៀត លោកនឹងបញ្ឈប់រោងចក្រ ឬក៏ដកព្រៃនោះមកវិញ។

នោះពេលនោះ លោកបានថ្លែងដូច្នេះថា៖ «សូមសាកលមើលទៅ បើមិនគោរពក៏សូមសាក បើមិនដកយកព្រៃ បិទរោងចក្រទេ ខ្ញុំហ៊ានកាត់ករខ្ញុំ ក្រវាត់ចោល នេះជាសម្តីនាយករដ្ឋមន្រ្តី។ ខ្ញុំចាញ់រឿងអីក៏សុខចិត្ត តែរឿង​និយាយ ជាមួយប្រជាពលរដ្ឋហើយ មិនបានធ្វើនេះ គឺខ្ញុំមិនព្រមចាញ់ទេ ខ្ញុំត្រូវធ្វើឲ្យបាន។ (...) ហ៊ុន សែន ហ៊ាននិយាយ គឺហ៊ានធ្វើ។ ខ្ញុំមិនបានមកបោកទេ ហើយខ្ញុំក៏មិនចេះបោក ហ៊ុន សែន គឺមិនចេះបោក។ ហ៊ុន សែន ប្រែមក គឺ “ត្រង់”។»

» សូមស្តាប់ការលើកឡើង របស់លោកនាយករដ្ឋមន្រ្តីដូចខាងក្រោម៖

ករណីមូយទៀត ក្នុងឆ្នាំ២០១៣ មុនការបោះឆ្នោត លោកនាយករដ្ឋមន្រ្តីកម្ពុជា បានបង្ហាញនូវការស្ទង់មតិ ពី​ប្រជាពលរដ្ឋប្រមាណ ជាង២០០០នាក់ សម្រាប់ការចូលរួម ការបោះឆ្នោតថ្នាក់ជាតិ ថ្ងៃទី២៨ ខែកក្កដា ឆ្នាំ​២០១៣​នោះ។ សម្រាប់មតិពលរដ្ឋ ទាំង២០០០នាក់នោះ លោកអះអាងថា មានសម្លេងគាំទ្រគណបក្ស​ប្រជាជន​កម្ពុជា ប្រមាណ៦៧ ភាគរយ។ ក្នុងពលរដ្ឋ ទាំង២០០០នាក់ដដែលនោះ បានដាក់ជំនឿចិត្ត លើ​រូប​លោក មានរហូតដល់៨៧ភាគរយ។

លោក ហ៊ុន សែន បានថ្លែងសន្យា នៅពេលនោះថា៖ «ប៉ុណ្ណឹងល្មមយកហើយ បើគេមិនជឿ ៨៧ ភាគរយ ល្មមចេញហើយ។ (...) បើមនុស្សលែងជឿ ស្ថិតនៅក្រោម៦០ភាគរយ ខ្ញុំនឹងចាកចេញ មិន​តំណាង​ឲ្យបក្ស ក្នុងមុខតំណែងជានាយករដ្ឋមន្រ្តី។»

» សូមស្តាប់ការលើកឡើង របស់លោកនាយករដ្ឋមន្រ្តីដូចខាងក្រោម៖

លើកទីបីនេះ លោកបានសន្យាជាថ្មីទៀតថា បើផែនទីមកពីប្រទេសបារាំង ខុសពីផែនទីព្រំដែន ដែល​រដ្ឋាភិបាល​កំពុងប្រើប្រាស់នោះ លោកនឹងចុះពីតំណែងជានាយករដ្ឋមន្រ្តី ហើយដើរចូលពន្ធនាគារ​ដោយខ្លួន​ឯង រង់ចាំការកាត់ទោសតាមច្បាប់។

លោក ហ៊ុន សែន បានថ្លែងសន្យាជាសាធារណៈថា៖ «បើផែនទីខុសគ្នា ខ្ញុំនឹងប្រកាសចុះចេញ(ពីដំណែង) ខ្ញុំតាមដានការផ្ទៀងផ្ទាត់ផែនទី ទាំងមកពីអង្គការសហប្រជាជាតិ និងជាពិសេសផែនទីមកពីបារាំង ព្រោះ​បារាំង​ជាអ្នកគូស។ កាលណោះ បើខុស ខ្ញុំនឹងប្រកាសបញ្ចប់ការកាន់តំណែង ជាង៣៦ឆ្នាំរបស់ខ្ញុំ។ (...) ប្រសិន​បើផែនទី មកពីបារាំងខុសគ្នាជាមួយផែនទី ដែលចុះហត្ថលេខាជាមួយវៀតណាម ខ្ញុំព្រះករុណា នឹងប្រកាស​លាលែងពីតំណែងភ្លាម មិនធ្វើនាយករដ្ឋមន្រ្តីតទៅទៀត។ ហើយក៏ស្ម័គ្រ ចូលទៅកាន់មន្ទីរឃុំឃាំង រង់ចាំ​តុលាការ​កាត់ទោសតែម្តង។ ព្រោះនេះជាការទទួលខុសត្រូវ ជាប្រវត្តិសាស្រ្តដ៏ធំធេង។ (...) ហ៊ានស៊ីហ៊ាន​សង ចិត្តជាកូនប្រុស។»

» សូមអាន និងទស្សនា ការបកស្រាយ របស់លោកនាយករដ្ឋមន្រ្តី ហ៊ុន សែន ដោយចុចនៅលើទីនេះ។

រាល់ការសន្យាទាំងបីខាងលើនេះ ត្រូវបានមតិមួយចំនួនលើកឡើងថា ជាការ«សន្យាខ្យល់» របស់លោក​នាយករដ្ឋមន្រ្តី ដោយគ្មានទំនួលខុសត្រូវ និងមិនបានគិតពីប្រយោជន៍រួម ប្រយោជន៍ជាតិ និងប្រយោជន៍​ប្រជា​ពលរដ្ឋទូទាំងប្រទេស ក្រៅពីការក្រាញអំណាច ក្នុងតំណែងជានាយករដ្ឋមន្រ្តីនោះឡើយ៕